കിറ്റില്‍ വീഴുന്ന മലയാളി!

സൗജന്യ പലവ്യഞ്ജനകിറ്റും ക്ഷേമ പെന്‍ഷനും കൊടുത്താല്‍ കയ്യിലെടുക്കാവുന്നതേയുള്ളു പ്രബുദ്ധനായ മലയാളിയെ! തെറ്റിദ്ധരിക്കണ്ട, കേരളമുഖ്യമന്ത്രി വിജയന്‍ സഖാവ് വൈരുദ്ധ്യാത്മിക ഭൗതികവാദ സിദ്ധാന്തപ്രകാരം സമര്‍ത്ഥിച്ചെടുത്തതാണിത്. കഴിഞ്ഞ തദ്ദേശസ്ഥാപന തിരഞ്ഞെടുപ്പില്‍ ഈ പ്രയോഗം കൊണ്ടാണ് ഇടതു മുന്നണി കരകയറിയത് എന്നാണ് സഖാവിന്റെ വാദം. കൊറോണയുടെ ആദ്യകാലത്തൊന്നും പലവ്യഞ്ജനകിറ്റ് കൊടുക്കാന്‍ തയ്യാറാവാത്ത സര്‍ക്കാര്‍ ഓണം മുതലാണ് അതിലെ കച്ചവടക്കണ്ണ് മനസ്സിലാക്കിയത്. മാലിന്യം ചേര്‍ന്ന ശര്‍ക്കരയും കഴിക്കാന്‍ കൊള്ളാത്ത പപ്പടവും താണതരം ധാന്യങ്ങളും കൊടുത്തിട്ട് ഒന്നാംകിട സാധനങ്ങളുടെ വില സര്‍ക്കാര്‍ ഫണ്ടില്‍ നിന്നും കീശയിലാക്കിയത് ഒരു നേട്ടം. പലവ്യഞ്ജനങ്ങള്‍ ഇടുന്ന സഞ്ചിയുടെ പേരില്‍ പോലും വെട്ടിപ്പുനടത്തി. എല്ലാമാസവും ഇത്തരം കിറ്റുകള്‍ റേഷന്‍ കടയിലൂടെ നല്‍കിയതോടെ സി.പി.എമ്മിന്റെ സ്വപ്‌നപദ്ധതിയായ സ്വര്‍ണ്ണക്കള്ളക്കടത്തിന്റെയും മുഖ്യമന്ത്രിയുടെ ഓഫീസ് കള്ളക്കടത്തുകാരുടെ സങ്കേതമായതും ബിനീഷ് കോടിയേരിയുടെ മയക്കുമരുന്നു കച്ചവടവും ഒക്കെ ജനം മറന്നു എന്നാണ് തിരഞ്ഞെടുപ്പുഫലം കാണിക്കുന്നത് എന്ന് വിജയന്‍ സഖാവ് സിദ്ധാന്തിക്കുന്നു.

അടുത്ത നിയമസഭാ തിരഞ്ഞെടുപ്പില്‍ ഭരണ തുടര്‍ച്ചയുണ്ടാവാന്‍ ഇതേ മാര്‍ക്‌സിയന്‍ തന്ത്രം ആവര്‍ത്തിക്കുന്നു എന്നാണ് സഖാവ് പ്രഖ്യാപിച്ചത്. 1500 രൂപയുടെ ക്ഷേമപെന്‍ഷനും പ്രതിമാസ പലവ്യഞ്ജനകിറ്റും തുടരാനാണ് തീരുമാനം. നക്കാപ്പിച്ച വെച്ചുനീട്ടിയാല്‍ കണ്ണുമയങ്ങി വോട്ടു ചെയ്യുന്നവരാണ് കേരളത്തിലെ വോട്ടര്‍മാര്‍ എന്ന രീതിയിലുള്ള സഖാവിന്റെ വിലയിരുത്തല്‍ ആത്മാഭിമാനികളായ മലയാളികളെ അപമാനിക്കലല്ലേ?