സംഘത്തിന്റേത് സേവനത്തിന്റെയും സമര്‍പ്പണത്തിന്റെയും യാത്ര: ദലായ് ലാമ

നാഗ്പൂര്‍: നൂറ് വര്‍ഷത്തെ സംഘയാത്ര സേവനത്തിന്റേതും സമര്‍പ്പണത്തിന്റേതുമാണെന്ന് വിജയദശമി ആശംസാ സന്ദേശത്തില്‍ ദലായ് ലാമ. എല്ലാ സ്വയംസേവകര്‍ക്കും ഹൃദയം നിറഞ്ഞ അഭിനന്ദനങ്ങള്‍. ഭാരതം അനേകം സമ്പ്രദായങ്ങളുടെയും ദര്‍ശനങ്ങളുടെയും അറിവിന്റെയും ഉത്ഭവഭൂമിയാണ്. ഇതുകൊണ്ടാണ് ഈ നാടിനെ ‘വിശ്വഗുരു’ എന്ന് വിളിച്ചുവരുന്നതെന്ന് അദ്ദേഹം ചൂണ്ടിക്കാട്ടി. ഏതാനും ശതാബ്ദങ്ങളായി നേരിട്ടു വന്ന തിരിച്ചടികളില്‍ നിന്ന് ഭാരതം മുക്തമാവുകയാണ്. നിരവധി അനുകൂല ഘടകങ്ങളിലൂടെ, ഭാരതത്തിന്റെ പാരമ്പര്യങ്ങളും മൂല്യങ്ങളും വീണ്ടും ജീവസ്സുറ്റതായി. അതിനൊപ്പം ഭാരതീയ സംസ്‌കൃതിയുടെ സംരക്ഷണത്തിനും പോഷണത്തിനും നിലകൊണ്ട സംഘത്തിന് നിരവധി വെല്ലുവിളികള്‍ നേരിടേണ്ടി വന്നു. വ്യക്തിപരമായ ആഗ്രഹങ്ങള്‍ ഉപേക്ഷിച്ച്, ഒരുമ എന്ന ചിന്താഗതിയുടെ അടിസ്ഥാനത്തിലാണ് സംഘം വളര്‍ന്നത്. സംഘത്തിലെ ഒരോരുത്തരും സമര്‍പ്പിതജീവിതം എങ്ങനെ നയിക്കണം എന്നാണ് പഠിക്കുന്നത്. സംഘം എല്ലായ്‌പ്പോഴും ഭാരതീയ സമൂഹത്തെ ആത്മീയമായും, ഭൗതികമായും, സാമൂഹികമായും, വിദ്യാഭ്യാസപരമായും, സാംസ്‌കാരികമായും, സാമ്പത്തികമായും വളര്‍ത്തുന്നതിനും, വികസിപ്പിക്കുന്നതിനുമാണ് പ്രവര്‍ത്തിക്കുന്നതെന്ന് അദ്ദേഹം ചൂണ്ടിക്കാട്ടി. നാല് പതിറ്റാണ്ടായി സംഘത്തെ തനിക്ക് അടുത്തറിയാമെന്നും സ്വയംസേവകരുടെ പ്രവര്‍ത്തനങ്ങള്‍ പ്രേരണാദായകമാണെന്നും ദലായ് ലാമ പറഞ്ഞു.

Add Kesari Weekly as a preferred source on Google