അദ്ധ്വാനത്തിന്റെ മഹത്വം

പ്രശസ്ത ചലച്ചിത്രസംവിധായകനായ സത്യന്‍ അന്തിക്കാട് ഒരിക്കല്‍ ചെന്നൈയിലെ വോണ്ടി ബസാറിലൂടെ യാത്ര ചെയ്യുമ്പോള്‍ പാകമാകാത്ത ട്രൗസറും പഴകിയ ഷര്‍ട്ടും ധരിച്ച ഒരു കുട്ടി അദ്ദേഹത്തിന്റെ കയ്യില്‍ പിടിച്ചു. ചെവി ക്ലീന്‍ ചെയ്യുന്ന ‘ബഡ്‌സ്’ വില്പനയായിരുന്നു അവന്റെ തൊഴില്‍. അതിലൊരു കെട്ട് വാങ്ങുവാന്‍ ആ കുട്ടി അദ്ദേഹത്തെ നിര്‍ബന്ധിച്ചു. തനിക്കതിന്റെ ആവശ്യമില്ലെന്നു പറഞ്ഞ് അദ്ദേഹം ബസാറിന്റെ തിരക്കുകളിലേക്കു മുങ്ങി.

എന്നാല്‍ കുറച്ചു സമയം കഴിഞ്ഞു അദ്ദേഹം തിരിച്ചു വരുമ്പോള്‍ ആ പയ്യന്‍ വീണ്ടും അദ്ദേഹത്തെ പിടികൂടി. അദ്ദേഹം ആ ബഡ്‌സ് നിരസിച്ചിട്ട് അതിന്റെ വിലയേക്കാള്‍ വിലവരുന്ന ഏതാനും അഞ്ചുരൂപാ നാണയങ്ങള്‍ അവനു നേരെ നീട്ടി.
അവന്‍ അതുവാങ്ങി സന്തോഷത്തോടെ പോക്കറ്റിലിടുമെന്നാണ് കരുതിയത്. എന്നാല്‍ ആ കൊച്ചുപയ്യന്റെ പ്രതികരണം അദ്ദേഹത്തെ അത്ഭുതപ്പെടുത്തുന്നതായിരുന്നു.

”വേണ്ട സാര്‍ എനിക്കിതുവേണ്ട. ഇതില്‍ ഒന്നുപോലും വാങ്ങിയില്ലെങ്കിലും സാരമില്ല സര്‍. വെറുതെ എനിക്കൊന്നും വേണ്ട. എന്റെ അമ്മ പറഞ്ഞിട്ടുണ്ട് ആരില്‍ നിന്നും വെറുതെ ഒന്നും വാങ്ങരുതെന്ന്.” ആ കുട്ടിയുടെ അഭിമാനബോധത്തിനു മുന്നില്‍ സത്യന്‍ അന്തിക്കാട് നമ്രശിരസ്‌കനായി.