ബംഗളുരു: കൊളോണിയല് മനഃസ്ഥിതികളും ആശയങ്ങളും പൂര്ണ്ണമായും ഇല്ലാതാക്കാന് വേണ്ട ബൗദ്ധിക സാഹചര്യം ഒരുങ്ങണമെന്ന് ആര്എസ്എസ് സര്കാര്യവാഹ് ദത്താത്രേയ ഹൊസബാളെ പറഞ്ഞു. ബംഗളുരു ജയനഗര് ആര്വി ടീച്ചേഴ്സ് കോളേജില് നടന്ന വിക്രമ വാരികയുടെ 75-ാം വാര്ഷികാഘോഷവേളയില് സംസാരിക്കുകയായിരുന്നു അദ്ദേഹം.
പണ്ഡിതന്മാരിലേക്കും എഴുത്തുകാരിലേക്കും വായനക്കാരിലേക്കും സമാജത്തിന്റെ സര്വ്വതലങ്ങളിലേക്കും രാഷ്ട്രാവബോധവും ആത്മാഭിമാനവും നിറയണം, ദേശീയതയുടെ ആഖ്യാനം മുഖ്യധാരയിലെത്തേണ്ട കാലമായി. പതിറ്റാണ്ടുകളായി അക്കാദമിക രംഗത്തും പ്രചാരരംഗത്തും അധികാരം പുലര്ത്തിയ ശക്തികള് രാഷ്ട്രത്തിന്റെ തനിമയ്ക്കെതിരെ വ്യാജ പ്രചരണങ്ങള് നടത്തുകയായിരുന്നു. മുഖ്യധാരയില് ആധിപത്യം ചെലുത്തിയത് അടിമത്തത്തിന്റെയും അധിനിവേശത്തിന്റെയും ആശയങ്ങളാണ്. അമൃതകാലം സത്യത്തെ ആവിഷ്ക്കരിക്കാനുള്ള സമയമാണ്. ഒരു ആശയയുദ്ധമാണിത്. നമ്മുടെ ചരിത്രത്തെയും മൂല്യങ്ങളെയും പാരമ്പര്യങ്ങളെയും നിഷേധാത്മകമായി ചിത്രീകരിക്കുന്നതായിരുന്നു പാശ്ചാത്യരും രാജ്യവിരുദ്ധരുമായ ആളുകള് സൃഷ്ടിച്ച വ്യാജമായ ആഖ്യാനങ്ങള്. സത്യത്തെ ആവിഷ്ക്കരിച്ച പ്രബലമായ ആഖ്യാനങ്ങള് ഉണ്ടായിരുന്നിട്ടും അതെല്ലാം ബോധപൂര്വ്വം തമസ്ക്കരിക്കപ്പെട്ടു. അദ്ദേഹം തുടര്ന്നു.
ആദിചുഞ്ചനഗിരി മഠാധിപതി നിര്മ്മലാനന്ദനാഥ സ്വാമികള്, ആര്എസ്എസ് ദക്ഷിണമധ്യക്ഷേത്ര സംഘചാലക് വി. നാഗരാജ്, വിക്രമ എഡിറ്റര് രമേശ ദൊഡ്ഡപുര എന്നിവര് ചടങ്ങില് സംബന്ധിച്ചു.