മിസോറാം ടൂറിസത്തെ കേരളവുമായി ബന്ധപ്പെടുത്തും – ഗവര്‍ണ്ണര്‍ അഡ്വ.പി.എസ്. ശ്രീധരന്‍പിള്ള

ഐസ്വാള്‍ (മിസോറാം): മിസോറാമിന്റെ 15-ാമത് ഗവര്‍ണ്ണറായി അഡ്വ.പി.എസ്. ശ്രീധരന്‍പിള്ള നവംബര്‍ 5ന് ചുമതലയേറ്റ ചടങ്ങ് വര്‍ണ്ണാഭവും പ്രൗഢഗംഭീരവുമായിരുന്നു. രാജ്ഭവന്‍ അങ്കണത്തില്‍ പ്രത്യേകം കെട്ടിയുയര്‍ത്തിയ വേദിയിലായിരുന്നു കാലത്ത് 11.30ന് സത്യപ്രതിജ്ഞാ ചടങ്ങ്. മിസോറാം – ഗോഹട്ടി ഹൈക്കോടതി ചീഫ് ജസ്റ്റിസ് അജയ് ലാംബയാണ് സത്യവാചകം ചൊല്ലിക്കൊടുത്തത്. വേദിയിലെത്തിയ ശ്രീധരന്‍പിള്ളയെ മുഖ്യമന്ത്രിയും മന്ത്രിമാരും ഉദ്യോഗസ്ഥരും ചേര്‍ന്ന് സ്വീകരിച്ചു. തുടര്‍ന്ന് ക്യാബിനറ്റ് ചീഫ് സെക്രട്ടറി ലാല്‍നുമാവിഗെ ചുന്‍ഗെയ് പുതിയ ഗവര്‍ണ്ണറെ നിയമിച്ചു കൊണ്ടുള്ള രാഷ്ട്രപതിയുടെ ഉത്തരവ് വായിച്ചു ഒപ്പുവെച്ചു. തുടര്‍ന്ന് പി.എസ്. ശ്രീധരന്‍പിള്ളയെ ഗവര്‍ണ്ണര്‍ പദവി ഏറ്റെടുക്കുന്ന ചടങ്ങിലേക്ക് ക്ഷണിച്ചു.

ഇംഗ്ലീഷിലാണ് ശ്രീധരന്‍പിള്ള സത്യവാചകം ചൊല്ലിയത്. പത്ത് മിനിറ്റ് മാത്രം നീണ്ടുനിന്ന ഔദ്യോഗിക ചടങ്ങില്‍ മുഖ്യമന്ത്രി സോറാംതാംഗെ, മന്ത്രിമാര്‍, എം.എല്‍.എമാര്‍, ബിജെപി മിസോറാം സംസ്ഥാന പ്രസിഡന്റ്, മിസോറാമിലെ ബിജെപി എം.എല്‍.എ. ഡോ.ചക്മ, ബിജെപി അഖിലേന്ത്യാ സെക്രട്ടറി ബി. സത്യകുമാര്‍, കേരളത്തില്‍ നിന്നുള്ള ബിജെപി നേതാക്കളായ ബി.രാധാകൃഷ്ണ മേനോന്‍, ബാബു വര്‍ഗ്ഗീസ്, പി.എം. ശ്യാമപ്രസാദ്, അയനിക്കാട് ശശിധരന്‍ തുടങ്ങിയവരും കുടുംബാംഗങ്ങളും ശ്രീധരന്‍പിള്ളയുടെ 100 ജൂനിയര്‍ അഭിഭാഷകരെ പ്രതിനിധീകരിച്ച് അഡ്വ.ജോസഫ് തോമസ്, യുഹാനോന്‍മാര്‍, മെത്രാപ്പൊലീത്ത മിലിത്തിയോസ് എന്നിവരടക്കം 56 പേരും കേരളത്തില്‍ നിന്ന് പങ്കെടുക്കുകയുണ്ടായി.

കേരളവും മിസോറാമും തമ്മില്‍ പല കാര്യങ്ങളിലും സാമ്യമുണ്ടെന്നും മിസോറാമിലേക്ക് കേരളത്തില്‍ നിന്നുള്ള ടൂറിസ്റ്റുകളെ കൊണ്ടുവരുന്ന കാര്യം സംസ്ഥാന സര്‍ക്കാരുമായി ആലോചിച്ച് പദ്ധതി ആവിഷ്‌കരിക്കുമെന്നും ചുമതലയേറ്റശേഷം ‘കേസരി’യുമായി സംസാരിക്കവെ പി.എസ്. ശ്രീധരന്‍പിള്ള പറഞ്ഞു. മിസോറാമിലെ കരകൗശല ഉല്പന്നങ്ങള്‍ക്ക് കേരളത്തില്‍ മാര്‍ക്കറ്റ് കണ്ടെത്താനും കേരളത്തിലെ കയറുല്പന്നങ്ങള്‍ ഉള്‍പ്പെടെയുള്ളവ മിസോറാമിലേക്ക് എത്തിക്കാനുമുള്ള പദ്ധതികള്‍ക്കായി ബന്ധപ്പെട്ടവരുമായി ചര്‍ച്ച നടന്നു വരികയാണെന്നും അദ്ദേഹം പറഞ്ഞു. കേന്ദ്രത്തിലെ എന്‍.ഡി.എ മുന്നണിയില്‍ പെട്ട മിസോറാം നാഷണല്‍ ഫ്രണ്ടാണിവിടെ ഭരണ കക്ഷി.

ബി.ജെ.പി. സംസ്ഥാന പ്രസിഡന്റായിരിക്കെയാണ് ഒക്‌ടോ.28ന് ശ്രീധരന്‍പിള്ളയെ ഗവര്‍ണ്ണറായി രാഷ്ട്രപതി നിയമിക്കുന്നത്. നേരത്തെ കുമ്മനം രാജശേഖരന്‍ 2018 മെയ് മുതല്‍ 2019 മാര്‍ച്ച് 8 വരെ ഇവിടെ ഗവര്‍ണ്ണറായിരുന്നു. 2011 മുതല്‍ 2014 വരെ വക്കം പുരുഷോത്തമനായിരുന്നു മിസോറാം ഗവര്‍ണ്ണര്‍.