സേവനം സ്വഭാവമാകണം: സുരേഷ് ജോഷി

പൂനെ: സേവനം സമാജത്തിലെ ഓരോരുത്തരുടെയും സ്വഭാവവും മനോഭാവവുമായി മാറണമെന്ന് ആര്‍എസ്എസ് അഖിലഭാരതീയ കാര്യകാരി സദസ്യന്‍ സുരേഷ് ജോഷി പറഞ്ഞു. സേവാവര്‍ധിനി എന്ന സന്നദ്ധപ്രസ്ഥാനം വനോവാരി മഹാത്മാ ഫൂലെ സംസ്‌കൃതിക് ഭവനില്‍ സംഘടിപ്പിച്ച സേവാ തരംഗ് പരിപാടിയില്‍ പങ്കെടുത്തു സംസാരിക്കുകയായിരുന്നു അദ്ദേഹം.

സേവനം യോഗം ചേര്‍ന്ന് ആസൂത്രിതമായി ചെയ്യേണ്ടുന്ന ഒന്നല്ല. അത് സ്വമേധയാ ചെയ്യേണ്ടതാണ്. സേവനത്തെ സഹായമായല്ല, കടമയായാണ് കാണേണ്ടത്. ദുരിതം ബാധിച്ചവര്‍, ജീവിതം വഴി മുട്ടിയവര്‍, രോഗികള്‍ തുടങ്ങി എല്ലാ ദുര്‍ബല ജനവിഭാഗങ്ങളും നമ്മളെ പോലെ ഭൂമിയില്‍ ജീവിക്കുന്നവരാണെന്നും അതിന് അവര്‍ക്കും അവകാശമുണ്ടെന്നുമുള്ള സാഹോദര്യഭാവമാവണം സേവനത്തിന്റെ അടിസ്ഥാന വികാരമെന്നും അദ്ദേഹം പറഞ്ഞു. എംഎല്‍എ സുനില്‍ കാംബ്ലെ, സേവാവര്‍ധിനി പ്രസിഡന്റ് ഡോ. പ്രമോദ് ചൗധരി, വര്‍ക്കിങ് പ്രസിഡന്റ് കിഷോര്‍ ദേശായി, വ്യവസായി സുധീര്‍ മേത്ത, യോഗിത ആപ്‌തെ, മന്ദര്‍ പോഫാലെ, പെര്‍സിസ്റ്റന്റ് ഫൗണ്ടേഷന്റെ സൗരഭ് ധനോര്‍ക്കര്‍, സോഹന്‍ മാധവ് ഫൗണ്ടേഷന്‍ സെക്രട്ടറി സൗരഭ് പട്വാര്‍ഡ് എന്നിവര്‍ വിവിധ വിഷയങ്ങളില്‍ സംസാരിച്ചു.