ഭാരതത്തെ അഖണ്ഡമാക്കുന്നത് ഹിന്ദുത്വം: ഡോ. മോഹന്‍ ഭാഗവത്

നാഗ്പൂര്‍: പ്രാചീനകാലം മുതല്‍ ഭാരതം അഖണ്ഡമായിരുന്നുവെന്നും അതിന്റെ ആധാരം ഹിന്ദുത്വബോധമായിരുന്നെന്നും ആര്‍എസ്എസ് സര്‍സംഘചാലക് ഡോ.മോഹന്‍ ഭാഗവത്. ഓര്‍ഗനൈസര്‍, പാഞ്ചജന്യ വാരികകള്‍ക്ക് അനുവദിച്ച പ്രത്യേക അഭിമുഖത്തില്‍ സംസാരിക്കുകയായിരുന്നു അദ്ദേഹം.
സമാജം ഹൈന്ദവബോധം മറന്നപ്പോഴാണ് ഭാരതത്തില്‍ ഭിന്നിപ്പുണ്ടായത്. ഹിന്ദുത്വം നമ്മുടെ അസ്തിത്വമാണ്, ദേശീയതയാണ്, സംസ്‌കാരമാണ്. എല്ലാറ്റിനെയും ഉള്‍ക്കൊള്ളാനുള്ള വിശാലത അതിനുണ്ട്. അത് ഇന്നാട്ടിലെ മുസ്ലീം ജനവിഭാഗത്തിന് ദോഷകരമല്ല. എന്നാല്‍ വേറിടല്‍വാദങ്ങള്‍ക്ക് ഭാരതത്തില്‍ ഇടമില്ലെന്നും അദ്ദേഹം പറഞ്ഞു.

സംഘം ദൈനംദിന രാഷ്ട്രീയത്തില്‍ ഇടപെടാറില്ല. എന്നാല്‍ രാഷ്ട്രനീതിയുടെ വിഷയത്തില്‍ ശക്തമായ അഭിപ്രായമുണ്ട്. രാഷ്ട്രീയത്തിന്റെ ദിശ ദേശീയ നയങ്ങള്‍ക്കും താല്‍പ്പര്യങ്ങള്‍ക്കും അനുകൂലമാണോ എന്ന കാര്യത്തില്‍ സംഘം എപ്പോഴും ജാഗ്രത കാട്ടാറുണ്ട്. രാഷ്ട്രീയം തെറ്റായ വഴിത്തിരിവിലേക്ക് നീങ്ങുകയും സാമൂഹിക ഉണര്‍വിനെ പ്രതികൂലമായി ബാധിക്കുകയും ചെയ്ത കാലത്തൊക്കെ അത്തരം ഉത്കണ്ഠ സംഘം പ്രകടമാക്കിയിട്ടുണ്ടെന്നും അദ്ദേഹം പറഞ്ഞു.

ലൈംഗിക ന്യൂനപക്ഷങ്ങളും സമൂഹത്തിന്റെ ഭാഗമാണ്. ട്രാന്‍സ് ജെന്‍ഡര്‍, സ്വവര്‍ഗരതി അടക്കമുള്ള ലൈംഗിക ന്യൂനപക്ഷങ്ങളെ സംബന്ധിച്ച വിഷയങ്ങളൊന്നും ഭാരതത്തിന് പുതിയതല്ല. ഈ സമൂഹത്തിന്റെ ഭാഗമായി, ജീവിക്കാനുള്ള എല്ലാ അവകാശവും അവര്‍ക്കുണ്ട്. ഇത്തരം കാര്യങ്ങളില്‍ ആര്‍എസ്എസ് ആശ്രയിക്കുന്നത് നമ്മുടെ പാരമ്പര്യ ജ്ഞാനത്തെയാണ്. ഇത്രകാലം പാശ്ചാത്യ രാജ്യങ്ങളാണ് ലോകത്തെ ഭരിച്ചത്. എന്നാലിന്ന് ലോകം ഭാരതീയ ചിന്തകളിലേക്ക് വരികയാണെന്നും അദ്ദേഹം കൂട്ടിച്ചേര്‍ത്തു.