ഡൽഹി ജെ.എന്‍.യു സർവ്വകലാശാലയും കോഴിക്കോട് MAGCOM ഉം ധാരണാപത്രം ഒപ്പ് വച്ചു. 

ന്യൂദല്‍ഹി: ഡൽഹി ജെ.എന്‍.യു സർവ്വകലാശാലയും കോഴിക്കോട് മഹാത്മാ ഗാന്ധി കോളേജ് ഓഫ് മാസ് കമ്മ്യൂണിക്കേഷനും (MAGCOM)  ധാരണാപത്രം ഒപ്പ് വച്ചു. ജെ.എന്‍.യു വൈസ് ചാൻസിലർ പ്രൊഫ. ശാന്തിശ്രീ ധുലിപുടി പണ്ഡിറ്റും MAGCOM ഡയറക്ടർ എ.കെ അനുരാജുമാണ്  ധാരണാപത്രത്തിൽ ഒപ്പ് വച്ചത്. ദേശീയ വിദ്യാഭ്യാസ നയം – NEP 2020 യുടെ ഭാഗമായി നൈപുണ്യ വികസനം ലക്ഷ്യമാക്കി രാജ്യത്തെ വിവിധ സ്ഥാപനങ്ങളുമായി ജെ.എന്‍.യു സർവ്വകലാശാല സഹകരിക്കാൻ തയ്യാറായിട്ടുണ്ട്. അതിന്റെ ഭാഗമായി ആണ് കോഴിക്കോട് കേന്ദ്രമാക്കി പ്രവർത്തിക്കുന്ന മാഗ്കോമുമായി സഹകരിക്കുന്നത് എന്ന് ജെ.എന്‍.യു വൈസ് ചാൻസിലർ മാധ്യമങ്ങളോട് പറഞ്ഞു. ഇത്തരത്തിൽ മാധ്യമപഠനരംഗത്തെ സ്ഥാപനവുമായി ഒരു ധാരണാപത്രത്തിൽ ഒപ്പുവച്ചതിൽ സന്തോഷമുണ്ടെന്നും അവർ കുട്ടിച്ചേർത്തു.

ലോകോത്തര സർവകലാശാലകളും ഉന്നതമാധ്യമ പഠന കേന്ദ്രങ്ങളുമായി സഹകരിച്ച് പ്രവർത്തിക്കുന്നതിന്‍റെ ഭാഗമായാണ് ജെഎൻയുമായി ധാരണാപത്രം ഒപ്പുവച്ചതെന്ന് മാഗ്കോം ഡയറക്ടർ എ. കെ. അനുരാഗ് പ്രതികരിച്ചു. ജെഎൻയു വൈസ് ചാൻസലറുടെ ചേംബറിൽ നടന്ന ചടങ്ങില്‍  പ്രജ്ഞാപ്രവാഹ്‌ ദേശീയ സംയോജകന്‍ ശ്രീ ജെ നന്ദകുമാർ, കേസരി മുഖ്യപത്രാധിപർ ഡോ.എന്‍.ആര്‍ മധു, ഓർഗനൈസർ മുഖ്യ പത്രാധിപർ ശ്രീ പ്രഫുല്ല കെത്കർ, ജെ.എൻ.യു സെന്റർ ഫോർ മീഡിയ സ്റ്റഡീസ് പ്രൊഫസർമാരായ മനുകൊണ്ട രബീന്ദ്ര നാഥ്, ശുചി യാദവ്, അസിസ്റ്റന്റ് പ്രൊഫ. ഡോ. ആർ.എൽ. റീറ്റ സോണി, സിഎസ് ആർഡി പ്രൊഫ. കൗശൽ ശർമ്മ എന്നിവർ  സന്നിഹിതരായിരുന്നു.