കോഴിക്കോട്: ആശയപരമായ ഭിന്നതയും വ്യത്യസ്ത നിലപാടും ഉള്ളവരുടെ ഒത്തുചേരലിന് അയിത്തം കല്പിക്കുകയും സംവാദത്തിന്റെ വേദികളെ ഇല്ലാതാക്കുകയും ചെയ്യുന്ന പ്രവണത സാംസ്കാരിക കേരളത്തിന് ഭൂഷണമല്ലെന്ന് തപസ്യ കലാസാഹിത്യ വേദി. കോഴിക്കോട്ട് കേസരി ഭവനില് സംഘടിപ്പിച്ച സാംസ്കാരിക പരിപാടിയില് മുസ്ലീംലീഗ് നേതാവ് കെ.എന്.എ. ഖാദര് പങ്കെടുത്തതിനെ വിവാദമാക്കിയവരും എതിര്ത്തവരും തടയാന് ശ്രമിക്കുന്നത് സമൂഹത്തിലെ സംവാദ സാധ്യതകളെയും സമവായ ശ്രമങ്ങളെയുമാണ്. പ്രത്യയശാസ്ത്രം, രാഷ്ട്രീയം, മതം തുടങ്ങിയ വിഷയങ്ങളില് വിഭിന്ന ചേരികളില് നിലകൊള്ളുന്നവര് പരസ്പരം സംവദിക്കുന്നതും യോജിക്കാവുന്ന മേഖലകളില് യോജിക്കുന്നതും കേരളത്തിന്റെ ബൗദ്ധിക മണ്ഡലത്തില് നാം മുമ്പ് പലവട്ടം കണ്ടതാണ്. അത്തരം കൊടുക്കല് വാങ്ങലുകളെ നിഷേധിക്കുന്നതും വ്യക്തികള്ക്കും പ്രസ്ഥാനങ്ങള്ക്കും അയിത്തം കല്പിക്കുന്നതും അംഗീകരിക്കാനാവില്ല.
കെ.എന്.എ. ഖാദറിനെതിരായുണ്ടായ നീക്കം തീവ്രമതനിലപാടുള്ള ചില സംഘടനകളും ചില മാധ്യമങ്ങളും ചേര്ന്ന് നടത്തിയ ഗൂഢാലോചനയുടെ ഭാഗമാണെന്നാണ് മനസ്സിലാവുന്നത്. ബുദ്ധ പ്രതിമയുടെ അനാച്ഛാദനച്ചടങ്ങില് പങ്കെടുത്ത് നടത്തിയ പ്രസംഗത്തില് മുഴുവന് അദ്ദേഹം പങ്കുവച്ചത് സാമൂഹ്യസൗഹാര്ദ്ദത്തിന്റെയും പ്രകൃതിസ്നേഹത്തിന്റെയും വിവിധ മതദര്ശനങ്ങളുടെയും മാഹാത്മ്യത്തെ കുറിച്ചാണ്. ചടങ്ങില് സംസാരിച്ച മറ്റുള്ളവരും അതുതന്നെയാണ് വിശദീകരിച്ചത്. സാംസ്കാരിക സമന്വയത്തിന്റെ ഇത്തരം ആവേഗങ്ങള്ക്ക് ദുരുദ്ദേശ്യപൂര്വ്വം തടയിടാനാണ് ഇത് വിവാദമാക്കിയവര് ശ്രമിച്ചതെന്നും തപസ്യ സംസ്ഥാന അധ്യക്ഷന് പ്രൊഫ. പി.ജി. ഹരിദാസും ജനറല് സെക്രട്ടറി അനൂപ് കുന്നത്തും പ്രസ്താവനയില് ചൂണ്ടിക്കാട്ടി.