വടക്കോട്ടു തലവെച്ചുറങ്ങരുത് എന്നത് വാമൊഴിയിലൂടെ പകര്ന്നു കിട്ടിയ ഒരറിവാണ്. തെക്കോട്ടോ കിഴക്കോട്ടോ തലവെച്ചു കിടന്നുറങ്ങണമെന്നാണ് നാട്ടാചാരം. വടക്കോട്ടു തലവെച്ചുറങ്ങരുത് എന്ന് മുത്തശ്ശിമാര് ചെറുപ്പത്തിലേ നമ്മെ പഠിപ്പിക്കുന്നു. ഭൂമിയുടെ കാന്തിക മണ്ഡലവുമായി ബന്ധപ്പെടുത്തി പരിശോധിച്ചാല് ഇതിന്റെ ശാസ്ത്രീയത നമുക്ക് മനസ്സിലാകും. ഭൂമിതന്നെ ഒരു കൂറ്റന് കാന്തമാണ്. വടക്കുനോക്കി യന്ത്രം എപ്പോഴും തെക്കുവടക്കായി നില്ക്കുന്നത് ഇതിന്റെ അടിസ്ഥാനത്തിലാണ്. കാന്തികശക്തി ഉത്തര ധ്രുവത്തില് നിന്ന് പുറപ്പെട്ട് ദക്ഷിണ ധ്രുവത്തില് അവസാനിക്കുന്നു.
നാം വടക്കോട്ട് തലവെച്ചുറങ്ങിയാല് ശരീരത്തിന്റെ കാന്തിക മണ്ഡലവും ഭൗമകാന്തികബലവും തമ്മില് വികര്ഷണമുണ്ടാകുന്നു. വിപരീത ധ്രുവങ്ങള് തമ്മിലാണല്ലോ ആകര്ഷണമുണ്ടാകുന്നത്. നാം തെക്കോട്ട് തലവെച്ചുറങ്ങുമ്പോള് ഭൗമകാന്തികബലവും ശാരീരിക കാന്തിക ബലവും തമ്മില് ആകര്ഷണമുണ്ടാകുന്നു. ഇതുമൂലം ശരീരത്തിന്റെ സ്വാഭാവിക കാന്തികബലത്തിന് ശൈഥില്യം സംഭവിക്കുന്നില്ല. വടക്കോട്ടുള്ള കിടപ്പുമൂലം ശരീരത്തിന് അസ്വസ്ഥതകള് ഉണ്ടാകുന്നു. കാന്തമാപിനികള് കണ്ടെത്തുന്നതിന് മുമ്പേ ഇക്കാര്യം നമ്മുടെ പൂര്വ്വികര്ക്കറിയാമായിരുന്നു.
ഇതുപോലെ തന്നെ പ്രധാനമാണ് കിഴക്കോട്ട് തലവെച്ചുറങ്ങുന്നതും. പടിഞ്ഞാറുനിന്ന് കിഴക്കോട്ട് സൂര്യനെ 6500 കിലോമീറ്റര് വേഗത്തില് ഭൂമി ചുറ്റിക്കൊണ്ടിരിക്കുകയാണല്ലോ. നാമേതൊരു വാഹനത്തില് കയറുമ്പോഴും മുന്നോട്ടുള്ള സീറ്റുകളാണിഷ്ടപ്പെടുന്നത്. വണ്ടിയുടെ വേഗത്തിനെതിരെ ഇരിക്കുന്നത് നമുക്ക് സുഖം തരാത്ത യാത്രയാണ്. അതുപോലെ ഭൂമിയുടെ യാത്രയ്ക്ക് അനുകൂലമായി കിടന്നുറങ്ങണം. ആയതിനാല് കിഴക്കോട്ടും തലവെച്ചുറങ്ങുന്നത് അഭികാമ്യമായി കണക്കാക്കുന്നു.
തെക്കും കിഴക്കും തലവെച്ചുറങ്ങുന്നത് ഉത്തമവും, പടിഞ്ഞാറോട്ട് തലവെച്ചുറങ്ങുന്നത് അധമവും, വടക്കോട്ട് തലവെച്ചുറങ്ങുന്നത് ഏറ്റവും അധമവുമാണ്. പത്തായത്തിനു പുറത്തുറങ്ങുന്നതും ഗോശാലയുടെ മുകളിലുറങ്ങുന്നതും, അടുക്കള, പൂജാമുറി എന്നിവയുടെ മുകളിലുറങ്ങുന്നതും വാസ്തുശാസ്ത്രം വിലക്കുന്നു. വലതുവശത്തേക്ക് രാവിലെ
ഇറങ്ങുവാന് തക്കരീതിയില് കട്ടിലുകള് ഇടേണ്ടതും അഭികാമ്യമായി കരുതിയിരുന്നു.
പ്രകൃതിയുടെ അയന ചലനങ്ങള്ക്ക് ഭാരതീയര് വളരെയധികം പ്രാധാന്യം നല്കിയിരുന്നു. ദിക്കുകളിലേക്ക് മാത്രമേ കെട്ടിടങ്ങള് നമ്മുടെ നാട്ടില് പണിയുകയുള്ളു. ആയതിനാല് കട്ടിലുകള് മുറികളില് ഇടുമ്പോഴും ഈ ദിശാമാനം കൃത്യമായി പാലിക്കുവാന് നമുക്ക് സാധിയ്ക്കുന്നു. വിദിക്കുകളായ വടക്ക് കിഴക്ക്, തെക്ക് കിഴക്ക്, തെക്കു പടിഞ്ഞാറ്, വടക്കു പടിഞ്ഞാറ് എന്നീ ദിശകളിലേക്ക് വീടു പണിയുന്നതും കട്ടിലുകളിടുന്നതും നമ്മുടെ പൂര്വ്വികര് അനുവദിച്ചിരുന്നില്ല. പടിഞ്ഞാറു നിന്ന് കിഴക്കോട്ട് സാങ്കല്പികമായ അച്ചുതണ്ടില് ഭൂമി സ്വയം കറങ്ങുകയും 365 ദിവസംകൊണ്ട് തെക്കുനിന്ന് വടക്കോട്ട് പരിവാഹത്തിലുടെ സൂര്യനെ ഭൂമി ചുറ്റുകയും ചെയ്യുമ്പോള് അതിനനുകൂലമായ രീതികള് മാത്രമേ മനുഷ്യന് ആരോഗ്യവും സംതൃപ്തിയും നല്കുകയുള്ളു.