സേവനപ്രവര്‍ത്തനങ്ങള്‍ പ്രേരണാത്മകമാകണം: രാജ്കുമാര്‍ മഠാലേ

തിരുവനന്തപുരം: സേവനപ്രവര്‍ത്തനങ്ങള്‍ പ്രചാരണത്തിന് വേണ്ടിയാകരുതെന്നും അത് ജനങ്ങളെ സേവാ കാര്യങ്ങള്‍ ചെയ്യാന്‍ പ്രേരിപ്പിക്കുന്നതിനാകണമെന്നും ആര്‍എസ്എസ് അഖിലഭാരതീയ സഹസേവാ പ്രമുഖ് രാജ്കുമാര്‍ മഠാലേ അഭിപ്രായപ്പെട്ടു. സേവാവിഭാഗ് നടത്തിവരുന്ന സേവാഗാഥയുടെ മലയാള വെബ്‌സൈറ്റിന്റെ ഉദ്ഘാടനം നിര്‍വഹിച്ചു കൊണ്ട് തിരുവനന്തപുരം പ്രസ് ക്ലബ് ഹാളില്‍ സംസാരിക്കുകയായിരുന്നു അദ്ദേഹം.

സേവാഗാഥയിലൂടെ ലക്ഷ്യം വെക്കുന്നത് കേവലമായ പ്രചാരണപ്രവര്‍ത്തനം മാത്രമല്ല മറിച്ച് മാതൃകാപരമായി സേവന പ്രവര്‍ത്തനങ്ങള്‍ നടത്തുന്നവരെയും വിജയഗാഥരചിച്ചവരെയും സമാജത്തിന് യഥാവിധി പരിചയപ്പെടുത്തുകയും അതിലൂടെ സുമനസ്സുകളെ സേവന പ്രവര്‍ത്തനങ്ങള്‍ നടത്താന്‍ പ്രേരിപ്പിക്കുകയുമാണ് അതിന്റെ ലക്ഷ്യം. നിസ്വാര്‍ത്ഥമായ സേവന പ്രവര്‍ത്തനം മനസ്സിന് ആനന്ദം നല്കുന്നതോടൊപ്പം ജീവിത സംതൃപ്തി ഉറപ്പാക്കുമെന്നും അദ്ദേഹം കൂട്ടിച്ചേര്‍ത്തു.

ദേശീയ സേവാഭാരതി സംസ്ഥാന അദ്ധ്യക്ഷന്‍ ഡോ. രഞ്ജിത്ത് ഹരി അദ്ധ്യക്ഷത വഹിച്ചു. സേവാഭാരതി ദേശീയ അദ്ധ്യക്ഷന്‍ പന്നാലാല്‍ ബന്‍സാലി, സേവാഗാഥ അഖിലഭാരതീയ സംയോജിക വിജയലക്ഷ്മി സിംഗ്, ആര്‍എസ്എസ് ക്ഷേത്രീയ സേവാപ്രമുഖ് കെ.പത്മകുമാര്‍, പ്രാന്ത സഹകാര്യവാഹ് ടി.വി. പ്രസാദ്ബാബു, സേവാഭാരതി സംസ്ഥാന ജനറല്‍ സെക്രട്ടറി ഡി.വിജയന്‍, തിരുവനന്തപുരം ജില്ലാ അദ്ധ്യക്ഷന്‍ ഡോ. രാജ്‌മോഹന്‍ എന്നിവര്‍ സംസാരിച്ചു.