ആന്ധ്രാപ്രദേശ്: പുതിയ ദേശീയ വിദ്യാഭ്യാസ നയം ഭാരതത്തിന്റെ ആദ്ധ്യാത്മിക വൈവിധ്യതയെയും രാഷ്ട്ര ഏകാത്മതയെയും പ്രകടമാക്കുന്നതാണെന്ന് ആര്എസ്എസ് സഹസര്കാര്യവാഹ് ഡോ. മന്മോഹന് വൈദ്യ. വൈവിധ്യത എന്നാല് വിഭിന്നതയല്ല. ഏകാത്മതയാണ് അതിന്റെ ശക്തി. ഭാരതത്തിന്റെ പാരമ്പര്യം അതാണ്. ഭാഗ്യനഗറില് നടന്ന മൂന്നുദിവസത്തെ അഖിലഭാരതീയ സമന്വയ ബൈഠക്കിനു ശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
രാജ്യം സ്വാതന്ത്ര്യത്തിന്റെ 75-ാം വാര്ഷികം അമൃതോത്സവമായി ആഘോഷിക്കുമ്പോള് അതിനായി പോരാടിയ, ഇനിയും അറിയപ്പെടാത്ത ആയിരക്കണക്കിന് പോരാളികളുടെ ചരിത്രം ലോകത്തെ അറിയിക്കേണ്ടതുണ്ട്. സമരനായകരായി പട്ടികജാതി പട്ടികവര്ഗ്ഗങ്ങളിലും ഗോത്ര ജനവിഭാഗങ്ങളിലും പെട്ട അനേകം ധീരന്മാരുണ്ട്. അവര്ക്ക് ആവശ്യമായ പരിഗണന ലഭിക്കേണ്ടതുണ്ട്. അറിയപ്പെടാതെ പോയ 250 പോരാളികളുടെ ധീരോദാത്തമായ ജീവിതങ്ങള് കലാസാഹിത്യ മേഖലയില് പ്രവര്ത്തിക്കുന്ന സംസ്കാര്ഭാരതി രേഖപ്പെടുത്തിയിട്ടുണ്ട്. ഈ വിഷയത്തെ ഊന്നി എഴുപത്തഞ്ച് നാടകങ്ങളും തയ്യാറാക്കിയിട്ടുണ്ട്. കേന്ദ്ര സാംസ്കാരിക മന്ത്രാലയവും ഇത്തരത്തിലുള്ള പ്രവര്ത്തനങ്ങള് നടത്തുന്നുണ്ട്. പുതുതലമുറയ്ക്കിത് ഏറെ പ്രചോദനമാകുമെന്നും അദ്ദേഹം പറഞ്ഞു.
ലോകം കോവിഡിനെതിരെ പോരാടുകയാണ്. രോഗപ്രതിരോധ പ്രവര്ത്തനങ്ങളില് പരിശീലനം ലഭിച്ച പത്ത് ലക്ഷം ആര്എസ്എസ് പ്രവര്ത്തകരാണ് ഇപ്പോള് സേവനരംഗത്തുള്ളത്. ലക്ഷക്കണക്കിന് പ്രവര്ത്തകരാണ് രണ്ടാം തരംഗത്തില് സേവനരംഗത്തുണ്ടായിരുന്നത്.
കോളനിവത്കരണത്തിനെതിരായി ആര്എസ്എസ്സിന്റെ ആശയത്തില് നിന്നും പ്രചോദനമുള്ക്കൊണ്ട് വിവിധ മേഖലകളില് നിരവധി പേര് ആശയപോരാട്ടം നടത്തുന്നുണ്ട്. ലക്ഷക്കണക്കിന് യുവാക്കള് വെബ്സൈറ്റിലൂടെ അവരുടെ ആശയങ്ങള് പങ്കുവയ്ക്കുന്നുണ്ട്. സംഘത്തിന്റെ ലക്ഷ്യം ഭാരതത്തെ പരമമായ വൈഭവത്തിലേക്ക് ഉയര്ത്തുകയാണെന്നും ചോദ്യത്തിനുള്ള ഉത്തരമായി അദ്ദേഹം പറഞ്ഞു. അഖിലഭാരതീയ പ്രചാര് പ്രമുഖ് സുനില് അംബേദ്കറും വാര്ത്താ സമ്മേളനത്തില് പങ്കെടുത്തു.