സൂക്ഷ്മാണുസംഭവന്‍

സ്വയംഭൂവായ്, സര്‍വ്വവ്യാപിയായ്
വായുരൂപനായ് വന്ന
സൂക്ഷ്മാണുസംഭവന്‍
തൂണിലും, തുരുമ്പിലും
അധിനിവേശദന്തമുനകളാഴ്ത്തവേ
നിരങ്കുശം, നിഗൂഢഗുഹാമുഖങ്ങളില്‍
സമാധിസ്ഥരായ് ദൈവങ്ങള്‍ !
(നിസ്സംഗനിര്‍മ്മമങ്ങ-
ളവരല്ലാതെന്തു ചെയ്യും)
കൊറോണ പട്ടടയില്‍ക്കിടത്തിയ
ജഡങ്ങളില്‍നിന്നും
കുടിയൊഴിക്കപ്പെട്ട ദേഹികള്‍
അകലംപാലിച്ച് വിറങ്ങലിച്ചുനിന്നു
കണ്ണീരില്‍ക്കുതിര്‍ന്ന ചുംബന-
പ്പക്ഷികളെ, അംബരേ പറത്തിവിട്ട്
അന്ത്യചുംബനമേകിയകന്നൂ മക്കളും
(കൈതവമറിയാശൈശവത്തിലെ
പൈതലിന്‍ശീലമത്
കൈവിടുവത്‌സാധ്യമോ )
മഹാമാരികവര്‍ന്ന രണ്ടാമോണം
ദുരിതം കുടിയേറിയ ഗൃഹാന്തരം
അയല്‍വയല്‍പ്പൂക്കള്‍ക്കോ ഭ്രഷ്ട്
നാണ്യമില്ലാതെയുമുണ്ടായിട്ടും
കാളുന്നു, കത്തുന്നു വയറുകള്‍
സഞ്ചാരദുര്‍വ്യയമില്ല; ക്രഡിറ്റ്-
കാര്‍ഡുകളുരഞ്ഞ്,
സമ്പാദ്യം തേഞ്ഞുമാഞ്ഞില്ല
ഒരുമെയ്യായ് മാറിയ മിഥുനങ്ങളെല്ലാം
ഇരുമെയ്യായ് തീണ്ടാതിരിക്കയല്ലോ