പ്രകൃതിവന്ദന പാക്ഷികാചരണം നടത്തി

കൊച്ചി: പ്രകൃതി സംരക്ഷണത്തിനും ഭൂപോഷണത്തിനുമുള്ള തുടര്‍പ്രവര്‍ത്തനമെന്ന നിലയില്‍ പര്യാവരണ്‍ ഗതിവിധി വിഭാഗത്തിന്റെ ആഭിമുഖ്യത്തില്‍ പ്രകൃതി വന്ദന പാക്ഷികാചരണം നടത്തി.

Add Kesari Weekly as a preferred source on Google

ആഗസ്റ്റ് 15-ാം തിയതി സ്വാതന്ത്ര്യദിനത്തില്‍ ‘ദേശത്തിനായി ഒരു വ്യക്തി ഒരു മരം’ എന്ന ആഹ്വാനം കേരളീയസമൂഹം ഏറ്റെടുത്തു. പ്രമുഖ വ്യക്തികളടക്കം സ്വന്തം ഭവനങ്ങളില്‍ വൃക്ഷാരോപണം നടത്തി. കര്‍ക്കിടകമാസം അവസാനിക്കുന്ന ദിനമായ ആഗസ്റ്റ് 31ന് ശുചീകരണദിനമായി ആചരിച്ചു. ആഗസ്റ്റ് 17ന് ‘ചിങ്ങം ഒന്ന് തെങ്ങ് ഒന്ന്’ എന്ന ആഹ്വാനം ഏറ്റെടുത്ത് വിവിധ കേന്ദ്രങ്ങളില്‍ തെങ്ങിനങ്ങളുടെ മഹത്വം പ്രചരിപ്പിക്കുകയും വീടുകളില്‍ തെങ്ങ് വെയ്ക്കുകയും തൈകള്‍ വിതരണം ചെയ്യുകയും ചെയ്തു.

അഖിലേന്ത്യാതലത്തില്‍ ആചരിക്കുന്ന അമൃതാദേവി ദിനാചരണവും പ്രകൃതി വന്ദന ദിനാചരണവും ആഗസ്റ്റ് 28, 29 തീയതികളിലായി നടന്നു. ആഗസ്റ്റ് 29 ഞായറാഴ്ച പര്യാവരണ്‍ ഗതിവിധിയുടെ ആഹ്വാന പ്രകാരം രാവിലെ 10 മുതല്‍ 11 വരെയുള്ള സമയത്ത് ആബാലവൃദ്ധം ജനങ്ങള്‍ പ്രകൃതി വന്ദന പ്രതിജ്ഞ എടുത്തു. സ്വന്തം പുരയിടത്തിലേയും പൊതുസ്ഥലത്തേയും വൃക്ഷങ്ങളെ ആദരിക്കുന്ന ചടങ്ങുകള്‍ വ്യത്യസ്തമാര്‍ന്ന തരത്തില്‍ നിരവധി പ്രദേശങ്ങളില്‍ നടന്നു. തണല്‍ വൃക്ഷങ്ങളേയും നക്ഷത്രവനങ്ങളേയും പൂജിച്ചും രാഖിബന്ധിച്ചും പട്ടുചേല ചുറ്റിയുമാണ് പ്രകൃതിയോടുള്ള നന്ദി ഏവരും പ്രകടിപ്പിച്ചത്. സെല്‍ഫി വിത്ത് എ ട്രീ എന്ന പരിപാടിയും സമൂഹമാദ്ധ്യമങ്ങളിലൂടെ ജനങ്ങള്‍ ആഘോഷമാക്കി. മുത്തശ്ശിമരങ്ങളെ കണ്ടെത്തി ആദരിക്കുക എന്ന ചടങ്ങ് ഏറെ പുതുമയും കൗതുകവും ഉണര്‍ത്തി. ഇനി എല്ലാവര്‍ഷവും ആഗസ്റ്റ് 15 സ്വാതന്ത്ര്യദിനം മുതല്‍ ആഗസ്റ്റ് 31 പ്രകൃതിവന്ദന ദിനം വരെ പ്രകൃതിവന്ദന പാക്ഷികാചരണം നടത്തുമെന്ന് പര്യാവരണ്‍ ഗതിവിധി സംയോജകര്‍ അറിയിച്ചു.