സംഘടനാ പ്രവര്‍ത്തകര്‍ക്ക് പൂര്‍ണ്ണതയിലേക്കുള്ള പാഠപുസ്തകം

സംഘടനാ ശാസ്ത്രത്തിന്റെ മര്‍മ്മം അറിയുന്ന ആള്‍, പദവിയോ നിലയും വിലയുമോ അംഗീകാരമോ സാമ്പത്തിക ലാഭമോ ഒന്നും കാംക്ഷിക്കാതെ പ്രവര്‍ത്തിക്കുന്ന വ്യക്തി. അതാണ് അഖിലഭാരതീയ വിദ്യാര്‍ത്ഥി പരിഷത്തിനെ രാജ്യത്തെ ഏറ്റവും വലിയ വിദ്യാര്‍ത്ഥി പ്രസ്ഥാനമാക്കി മാറ്റിയതിന് പിന്നിലെ പ്രേരകശക്തി- പ്രൊഫ. യശ്വന്ത് റാവു കേല്‍ക്കര്‍.

രാഷ്ട്രപുനര്‍നിര്‍മ്മാണ പ്രക്രിയയില്‍ ഓരോരുത്തരും സ്വയം പ്രവര്‍ത്തിക്കുക എന്നതിലേക്ക് ചുരുങ്ങിപ്പോകാതെ ഭാവി തലമുറയിലേക്ക് കൈ മാറുകയെന്ന ദൗത്യം നിര്‍വ്വഹിക്കേണ്ടതുണ്ട്. അത്തരം ദൗത്യനിര്‍വ്വഹണം സ്വയം നടത്തുകയും അത് നടത്തി പുതുതലമുറക്ക് കൈമാറുകയും ചെയ്ത യശ്വന്തറാവു കേല്‍ക്കറുടെ ജീവിതവും പ്രവര്‍ത്തന രീതിയും ഇതള്‍ വിരിയുന്നതാണ് ‘പൂര്‍ണ്ണതയിലേക്ക് പ്രൊഫ. യശ്വന്തറാവു കേല്‍ക്കറുടെ ജീവിതരേഖ’ എന്ന പുസ്തകം.

പൂര്‍ണാങ്ക് കീ ഔര്‍ എന്ന ഹിന്ദിപുസ്തകം മലയാളത്തിലേക്ക് പരിഭാഷപ്പെടുത്തിയത് എബിവി പി മുന്‍ സംസ്ഥാന നേതാവും കോളേജദ്ധ്യാപികയുമായ എം.ജെ. ജയശ്രീ ആണ്. വിവര്‍ത്തനമാണെന്ന തോന്നലില്ലാത്തവിധം ഒഴുക്കുള്ള ഭാഷയാണ് പുസ്തകത്തിന്റെ പ്രത്യേകത.

ഏതൊരു സംഘടനാപ്രവര്‍ത്തകനും സഹപ്രവര്‍ത്തകരോട്, അഭ്യുദയകാംക്ഷികളോട്, എതിര്‍പക്ഷത്തുള്ളവരോട് എങ്ങിനെ ക്രിയാത്മകമായി പെരുമാറണമെന്ന് യശ്വന്ത് റാവുജിയുടെ ജീവിതത്തിലെ സംഭവങ്ങളിലൂടെ വെളിവാക്കുന്നു പുസ്തകം. സൗഹൃദത്താല്‍ പരസ്പരം കൂട്ടിയിണക്കപ്പെടുന്നവരുടെ സമൂഹമാണ് സംഘടനയെന്ന് ജീവിതം കൊണ്ട് യശ്വന്തറാവുജി തെളിയിച്ചു. അദ്ദേഹത്തോട് അടുപ്പമുള്ള നിരവധി പ്രവര്‍ ത്തകര്‍ നല്‍കിയ കുറിപ്പുകള്‍ ഭംഗിയായി എഡിറ്റ് ചെയ്താണ് പുസ്തകം സംവിധാനം ചെയ്തിരിക്കുന്നത്.

തന്റെ സമ്പൂര്‍ണ്ണ ജീവിതവും എബിവിപിയുടെ പ്രവര്‍ത്തനപദ്ധതിയുടെ രൂപീകരണത്തിനായി സമര്‍ പ്പിച്ച പ്രവര്‍ത്തകനെ ഇവിടെ വായിച്ചെടുക്കാം. മഹത്തായ ഉത്തരവാദിത്തങ്ങള്‍ വഹിച്ചുകൊണ്ട്, ജീവിതത്തില്‍ എങ്ങിനെ സന്തുലനം – കുടുംബജീവിതവും സംഘടനാപ്രവര്‍ ത്തനവും – നടത്താം എന്നതിന്റെ നിരവധി ഉദാഹരണങ്ങള്‍ പുസ്തകത്തിലുണ്ട്.
പൊതുപ്രവര്‍ത്തകന് വ്യക്തിപരമായും സാമൂഹികമായും എങ്ങിനെ സദാചാര മൂല്യങ്ങള്‍ നിലനിര്‍ത്താം, സത്യസന്ധത, അച്ചടക്കം, സമയനിഷ്ഠ, പെരുമാറ്റരീതികള്‍ എന്നിവ എങ്ങിനെ ആയിരിക്കണമെന്നെല്ലാമുള്ള സംഘടനാ തന്ത്രങ്ങള്‍ ഈ പുസ്തകവായനവഴി നേടിയെടുക്കാമെന്നതില്‍ സംശയമില്ല. ഒരു മുതിര്‍ന്ന സംഘടനാ പ്രവര്‍ത്തകന്‍ എന്ന നിലയില്‍ മറ്റ് പ്രവര്‍ത്തകര്‍ക്ക് മാതൃകയാവുന്ന നേതൃഗുണമുള്ള വ്യക്തിത്വമാണ് യശ്വന്തറാവു സ്വയം രൂപപ്പെടുത്തിയത്.

സംഘടനയിലെ ഏറ്റവും ഉന്നതനായ കാര്യകര്‍ത്താവായിരുന്നിട്ടും തന്റെ അഭിപ്രായം അന്തിമമാണെന്ന് ഒരിക്കലും യശ്വന്തറാവുജി പറഞ്ഞിരുന്നില്ല. പൊതുതീരുമാനത്തെയാണ് അദ്ദേഹം എപ്പോഴും അംഗീകരിച്ചിരുന്നത്. ഏതൊരു സംഘടനാപ്രവര്‍ത്തകനും ഇതായിരിക്കണം മാതൃകയെന്ന് പുസ്തക വായനയില്‍നിന്ന് മനസ്സിലാക്കാം. പ്രവര്‍ത്തകരുടെ ജീവിതത്തില്‍ അവരുടെ ജീവിതപ്രശ്‌നങ്ങള്‍, കുടുംബം, ജോലി, പലവിധ താല്പര്യങ്ങള്‍ ഇതിനൊക്കെയായി സമയം ചിലവഴിക്കേണ്ടതുണ്ട്. അതോടൊപ്പം സാമൂഹ്യകാര്യത്തില്‍ രാഷ്ട്രകാര്യത്തിന് മുന്‍ഗണന എന്ന ചിന്ത യശ്വന്തറാവു കേല്‍ക്കര്‍ തന്റെ ജീവിതത്തിലൂടെ പ്രവര്‍ത്തകര്‍ക്ക് കാട്ടിത്തന്നു. ഒരു പ്രവര്‍ത്തകന്റെ അഭാവത്തില്‍ അയാളെക്കുറിച്ച് പറയരുതെന്ന് അദ്ദേഹം ഒരു യോഗത്തില്‍ നല്‍കിയ സൂചന ഒരു സംസ്ഥാനസംഘടനാകാര്യദര്‍ശി ഈ പുസ്തകത്തില്‍ ഓര്‍ക്കുന്നുണ്ട്. ഇത്തരം നിരവധി അനുകരണീയമായ സംഭവങ്ങള്‍ പുസ്തകത്തിലുടനീളമുണ്ട്.

1987 ഡിസം. 6ന് യശ്വന്തറാവുജി വിധിക്ക് കീഴടങ്ങും വരെ കര്‍മ്മനിരതനായിരുന്നു. അരനൂറ്റാണ്ടുകാലത്തോളം നടത്തിയ സംഘടനാപ്രവര്‍ ത്തനം ഏതൊരാള്‍ക്കും മാതൃകയും പ്രചോദനവുമായി മാറുംവിധമാണ് പുസ്തകരചന നിര്‍വ്വഹിക്കപ്പെട്ടത്. ഓരോ പ്രവര്‍ത്തകന്റെയും ‘സ്വയം സേവകത്വം’ സത്യവും സമര്‍പ്പിത വും ആയിരിക്കണമെന്നതിന് അദ്ദേ ഹം ഊന്നല്‍ നല്‍കിയിരുന്നു. ക്ഷേത്രങ്ങള്‍ ഈശ്വരവിശ്വാസത്തിന്റെ ‘ശാഖ’കളാണെന്നും സംഘശാഖകള്‍ ഹിന്ദുത്വത്തിന്റെയും രാഷ്ട്രപുനര്‍നിര്‍മ്മാണത്തിന്റെയും ക്ഷേത്രങ്ങളാണെന്നും സ്വജീവിതം കൊണ്ട് യശ്വന്തറാവുജി കാണിച്ചുതന്നു. ഏതൊരു സംഘടനാ പ്രവര്‍ത്തകനും അനിവാര്യമായും അത്യന്താപേക്ഷിതമായും വായിക്കേണ്ടതും അതുവഴി പൂര്‍ണ്ണതയിലേക്ക് എത്തിച്ചേരാനുള്ള പന്ഥാവുമായിരിക്കും ഈ പുസ്തകം.

പൂര്‍ണ്ണതയിലേക്ക്
പ്രൊഫ. യശ്വന്ത്‌റാവു കേല്‍ക്കറുടെ ജീവിതരേഖ
സങ്കലനം : അഖിലഭാരതീയ വിദ്യാര്‍ത്ഥി പരിഷത്ത്
വിവ: എം.ജെ. ജയശ്രീ
കുരുക്ഷേത്രപ്രകാശന്‍, കൊച്ചി
പേജ്: 167 വില: 140