നീ ചുറ്റി നില്ക്കും സ്വരാഞ്ചലം പാറിവ-
ന്നെന് മുഖത്തെപ്പുണര്ന്നു വീഴുന്നേരത്തെ
മുമ്പെങ്ങുമില്ലാത്ത വിധത്തില് രുചിക്കു,-
ന്നിനിപ്പിന് രൂപഭേദങ്ങളാദിമം പോല്.
‘ഇന്നു പ്രാതലെന്തെ’ന്നൊഴുക്കില് കലര്ന്ന്
നീ പഴേ പൊട്ടടര്ത്തിക്കണ്ണാടിക്കു തൊ-
ട്ടടുത്ത ചൂടലിന് ചോപ്പു ചൂണ്ടുവിരല്
തുമ്പത്തു നിര്ത്തി മൂളുന്നിഷ്ട ഗാനവും.
നീ നേരെയാക്കും കെട്ടഴിഞ്ഞ നീള്മുടി
ത്തുമ്പിലൂറും തുളസിയില് പ്രഭാതത്തിന്
തണ്ടു പൊട്ടും സൂക്ഷ്മ സ്വരത്തിലും ജീവ –
നേറി നില്കുന്നതിന് പ്രത്യേക ഘ്രാണവും.
നിന് നിഴല്തുമ്പത്തഭീഷ്ടകാര്യ സിദ്ധി-
ക്കക്ഷമ പൂവിടുന്നീ പൂച്ചമൗനവും,
ചട്ടുകം ഗ്യാസടുപ്പിന് കത്തലാസ്വദി-
ച്ചങ്ങിനേയിരിക്കും മൗനവും സ്വരമേ.
ചോപ്പു ‘മോപ്പഡി’ ലേരി* വന്നീ പുലര്ച്ചെ
മുറ്റത്തര ലിറ്റര് പാല്ക്കടല് തൂവലും,-
കണ്ടതേ, മുല്ല കാല്തുടം പാലളന്ന്
തന്നുച്ചിയില് കമഴ്ത്തി വിറച്ചു നില്പതും.
ഇന്നേരത്തടര്ന്നു വീഴും ശതാബ്ദിതന്
വൃദ്ധിക്ഷയത്തില് പൊങ്ങുമുള്ചൂളം കുത്തും.
നീയെണീറ്റു നി, ന്നിലക്കൈ ചുഴറ്റവേ
കാക്കവാരിധിക്കാര്തിരപൊക്കവും.
കേള്വിപ്പെടാത്തൊരേറ്റം നേര്ത്ത മുന്കാല
കോലാഹലത്തിന് ‘നിശ്ശബ്ദ’സാന്നിദ്ധ്യവും.
എങ്ങോ വരഞ്ഞിരിക്കും കുരയ്ക്കുള്ളിലെ-
ച്ചൊല്പ്പടിക്കുള്ള നില്പും, വാലാട്ടലും.
ദൂരേന്നു സ്കൂള്
ബസ്സിരമ്പിത്തളിര്ത്തിടും
വഴിക്കൊമ്പിലാകെപ്പടര്ന്ന പാടലും.
ചിറപ്പുത്സവത്തിന്നിമ്പവും രംഗവും.
ചിറഞ്ഞേല്ക്കുമീ വിത്തിലെത്തെയ്യവും.
നീയഭൗമ സ്ഥൂലവുംസൂക്ഷ്മവുമായി-
ട്ടെന്നിന്ദ്രിയം ത്രസിപ്പിച്ചു നിര്ത്തവേ
ആ ദേഹസ്വരാഞ്ചലം തൊട്ടിടങ്ങളില്
കൊത്തിവയ്ക്കപ്പെടുന്നാദിമ ഭംഗികള്.
* ചെറു പ്രദേശം.