അമ്മേ, മൂകാംബികേ

പൊന്നിന്‍ പുലരി വന്നെത്തിവണങ്ങുന്ന-
ഐശ്വര്യ ദേവതേ നിന്റെ മുമ്പില്‍
മന്ത്രങ്ങളറിയാത്തൊരടിയന്‍ വരും – വെറും
ആത്മനൈവേദ്യം നടയ്ക്കുവെക്കാന്‍,
സപ്തര്‍ഷിമാര്‍ പണ്ടു പാടിപ്പുകഴ്ത്തിയ
പാദത്തില്‍ വീണു നമസ്‌ക്കരിക്കാന്‍,
മൂകനെ വാചാലനാക്കുന്ന ദിവ്യമാം
ശ്രീചക്രരൂപം തെളിഞ്ഞുകാണാന്‍,
പൂങ്കുയില്‍ സാധകം ചെയ്യുവാനെത്തുന്ന-
സ്വരമണ്ഡപത്തിലിരുന്നു പാടാന്‍,
ഈ ജന്മസാഗരത്തിരകളില്‍ നിന്നെനി-
ക്കെന്നെന്നുമായി കരയ്ക്കു കേറാന്‍,
അജ്ഞാനമെല്ലാമകന്നെന്നറയ്ക്കുള്ളി-
ലാദിവ്യരൂപം തെളിഞ്ഞുകാണാന്‍
ഞാനെന്നുമെന്നും വിളിക്കുമ്പൊഴൊക്കെയും
ചാരത്തണഞ്ഞു തലോടലില്ലേ
ഇന്നെനിക്കുള്ള സൗഭാഗ്യങ്ങളൊക്കെയും
അമ്മ ചൊരിഞ്ഞുള്ള പുണ്യമല്ലേ
കുഞ്ഞായ നാളിലെന്‍ നാവിന്മേലന്നമ്മ-
ആദ്യാക്ഷരവും കുറിച്ചതല്ലേ
ആ ദിവ്യസന്നിധിയോര്‍ത്തിടുമ്പോള്‍ മനം-
സൗപര്‍ണ്ണികാതീര്‍ത്ഥമായിടുന്നു
എന്നെ ഞാനാക്കിയോരമ്മേ, ജഗന്മയി
കാരുണ്യവാരിധേ, കുമ്പിടുന്നേന്‍.