ശ്രദ്ധേയമായ മുഖലേഖനം

വളരെ സൂക്ഷ്മവും അതിനാല്‍ തന്നെ വളരെ തീവ്രവുമായ പ്രവര്‍ത്തന രീതികള്‍ അവലംബിക്കുന്ന ഡീപ് സ്റ്റേറ്റിന്റെയും അര്‍ബ്ബന്‍ നക്‌സലൈറ്റുകളുടെയും സ്വാധീനം തകര്‍ക്കുന്നതിന്റെ പ്രാധാന്യം എടുത്തു പറയുന്ന ഡോ. ജയപ്രസാദിന്റെ മുഖലേഖനം (മെയ് 16) ഏറെ ശ്രദ്ധേയമായിട്ടുണ്ട്. കലാ- സാംസ്‌കാരിക രംഗത്ത് ഭാരതത്തനിമ എടുത്തു കാട്ടുന്ന ‘മൃദുശക്തി’ (soft power) കൂടുതല്‍ ശക്തവും ആസൂത്രിതവുമായ രീതിയില്‍ ഭാരതം പ്രയോജനപ്പെടുത്തണം എന്ന അടിയന്തിരമായ അഭ്യര്‍ത്ഥന കൂടി ജയപ്രസാദിന്റെ വാക്കുകള്‍ക്കിടയില്‍ നിന്നും വായിച്ചെടുക്കാം.
ഓപ്പറേഷന്‍ സിന്ദൂറിന്റ സമാനതകളില്ലാത്ത വിജയത്തിന്റെ പശ്ചാത്തലത്തില്‍, ഭാരതത്തിന്റെ വൈവിധ്യപൂര്‍ണ്ണവും അതേസമയം ദേശസ്‌നേഹഭരിതവും അതോടൊപ്പം സാംസ്‌കാരിക ഐകമത്യം എന്ന ശക്തമായ അടിത്തറയില്‍ വാര്‍ക്കപ്പെട്ടതുമായ കലാ – സാംസ്‌കാരിക – പൗരാണിക സമ്പത്ത് ആസൂത്രിതമായി എടുത്തു കാട്ടുന്നത് ഡീപ് സ്റ്റേറ്റിന്റെതു പോലുള്ള ബൗദ്ധിക മുന്നേറ്റങ്ങള്‍ക്ക് ഏല്‍പ്പിക്കാവുന്ന കനത്ത സാംസ്‌കാരിക പ്രതിരോധമാണ്. കലാ – സാംസ്‌കാരിക രൂപങ്ങളുടെ വ്യാപകമായ ശേഖരം സ്വന്തമായുള്ള ആകാശവാണി, ദൂരദര്‍ശന്‍ തുടങ്ങി കേന്ദ്ര വാര്‍ത്താ വിതരണ പ്രക്ഷേപണ മന്ത്രാലയത്തിന് കീഴില്‍ പ്രവര്‍ത്തിക്കുന്ന സ്ഥാപനങ്ങളെ ‘മൃദു ശക്തി’ അടിസ്ഥാനമാക്കിയുള്ള മാധ്യമ യുദ്ധത്തിന്റെ -soft power mediated media war മുന്നണിപ്പോരാളികളാക്കി സജ്ജീകരിക്കുന്ന കാര്യവും ഗൗരവമായി പരിഗണിക്കേണ്ടതുണ്ട്.