സാമൂഹിക പ്രതിബദ്ധതയുള്ള ചരിത്രകാരന്‍

എംജിഎസ്സിനെക്കുറിച്ചുള്ള ലേഖനങ്ങളടങ്ങിയ കേസരി (മെയ് 9) വായിച്ചു. ഏതാനും വര്‍ഷങ്ങള്‍ക്ക് മുമ്പ് മലയാള മനോരമയില്‍ സ്ഥിരമായി ഒരു പംക്തി ഉണ്ടായിരുന്നു (ഇപ്പോള്‍ നിലവില്‍ ഇല്ല). അതിന്റെ തലക്കെട്ട് ‘കേരളത്തില്‍ സംഭവിക്കാന്‍ പാടില്ലാത്തത്’ എന്നായിരുന്നു. ഈ പംക്തിയില്‍ കേരളത്തിലെ സാമൂഹിക രംഗത്തെ വിവിധ മേഖലകളിലെ പ്രഗല്‍ഭരായ വ്യക്തികള്‍ കേരളത്തിലെ സംഭവ വികാസങ്ങളെ സംബന്ധിച്ച് തലക്കെട്ടിന് അനുയോജ്യമായി എഴുതിയിരുന്നു. ഇതില്‍ ഒരു ദിവസം പ്രത്യക്ഷപ്പെട്ടത് നമ്മളെ വിട്ട് പിരിഞ്ഞ എം.ജി.എസ്.നാരായണന്‍ സാറായിരുന്നു. അദ്ദേഹം എഴുതിയ വിഷയം കണ്ണിലൂരിലെ പിഞ്ചു കുഞ്ഞുങ്ങളുടെ മുന്നിലിട്ട് അധ്യാപകനായിരുന്ന യുവമോര്‍ച്ചയുടെ സംസ്ഥാന വൈസ് പ്രസിഡന്റ് കെ.ടി.ജയകൃഷ്ണന്‍ മാസ്റ്ററെ നിഷ്‌ക്കരുണം വെട്ടി കൊലപ്പെടുത്തിയത് സംബന്ധിച്ചായിരുന്നു. സധൈര്യം ഇതവതരിപ്പിക്കാന്‍ മുന്നില്‍ വന്ന ഒരു ചരിത്രകാരന്‍ കൂടിയായിരുന്നു എംജിഎസ്. എംജിഎസ്സിന്റെ സാമൂഹിക പ്രതിബദ്ധതയ്ക്ക് തെളിവാണ് ഈ സംഭവം.