സ്വര്‍ണ്ണഗദ്ദ

കാറ്റിനെ ഉഴുതുമറിക്കും
കാറ്റാടിപ്പാടത്ത്
പാട്ടുമൂളുന്നൂ പറവകള്‍

മല്ലീശ്വരന്‍ കോവിലിന്
മുന്നില്‍ തല താഴ്ത്തി
മുടന്തിപ്പോവുന്ന പശുക്കളുടെ നിര

മുകളിലെയില നിന്റേതല്ലെന്ന വിലക്കില്‍
മുന്‍കാലിലേക്ക് കുറുക്കിക്കെട്ടിയ
തലയിലേക്ക് അനുഗ്രഹത്തിന്റെതോ
ഉച്ചച്ചൂട്?

സഹ്യനും കടന്നെത്തുന്ന
ഉഷ്ണക്കാറ്റില്‍ തമിഴ്‌പ്പേച്ച്
ചിലപ്പതികാര ശീലുകള്‍

മനുഷ്യ വിഷത്തിലുറഞ്ഞു
നീലിച്ച മധുവിന്റെ നിലവിളിയില്‍
വേപ്പുമരങ്ങള്‍ നഗ്‌നം

അംബരം തുളച്ച ഗിരി ശിഖരങ്ങള്‍
വെട്ടിയൊഴിഞ്ഞെത്തും പടിഞ്ഞാറന്‍ കാറ്റ്
കുടിലുകള്‍ക്ക് മേലെ തുടി കൊട്ടാനായുന്നു

ശോഷിച്ച വരഗാറിന്‍
തപ്തനിശ്വാസത്തില്‍
കേള്‍ക്കുന്നു നാഞ്ചിയമ്മയെ

ആദിതാളം ഊര്‍ന്നുപോയ
കാടിന്റെ മക്കളുടെ
ചുടുനിശ്വാസങ്ങളോ
പെയ്യാമേഘങ്ങള്‍?

ഭൂപടങ്ങളിലെവിടെയും
അടയാളപ്പെടാതെ പോവുന്ന
ചില ഭൂഭാഗങ്ങളുണ്ട് ആള്‍ക്കൂട്ടത്തില്‍
തനിച്ചാവുന്ന മനുഷ്യനെപ്പോലെ

ചാരാകാശം നോക്കി,
പുളയുന്ന ജീവനുകളെ
ഉള്ളിലൊതുക്കി, പച്ചപ്പായല്‍
പൊതിഞ്ഞ പൊയ്ക കണക്കെ
സൗവ്വര്‍ണ്ണകാലം
സ്വപ്‌നം കണ്ട്
സ്വര്‍ണ്ണഗദ്ദ നിശ്ചലം.

(സ്വര്‍ണ്ണഗദ്ദ- അട്ടപ്പാടി മേഖലയിലെ പുതൂര്‍ പഞ്ചായത്തിലെ ഒരു ഗ്രാമം)