No products in the cart.
യെച്ചൂരിക്ക് ചൈനയിലേയ്ക്ക് ഒരു വിമാനടിക്കറ്റ്
ശാകല്യന്‍
മാര്‍ക്‌സിസ്റ്റു പാര്‍ട്ടി ജനറല്‍ സെക്രട്ടറി സീതാറാം യെച്ചൂരിയെ നമുക്കൊന്ന് ചൈനയിലേക്ക് വിമാനം കയറ്റിവിടാം. കാശ്മീരിനുവേണ്ടി വാദിക്കുന്ന ഇടതുബുജികളെയും കൂടെ അയയ്ക്കാം. അവര്‍ അവിടെ ചെന്ന് ചൈനീസ് പ്രസിഡണ്ടും പാര്‍ട്ടിചെയര്‍മാനുമായ സി ജിങ്ങ് പിങ്ങിന് ഒരു സ്റ്റഡിക്ലാസ് കൊടുക്കട്ടെ! ജിങ് പിങ്ങിന് യെച്ചൂരിയുടെ ഒരു സ്റ്റഡിക്ലാസ് അത്യാവശ്യമായിരിക്കുന്നു. ദേശീയത പഴഞ്ചനും പിന്തിരിപ്പനും സംഘപരിവാറുകാരുടെ തത്വശാസ്ത്രവുമാണെന്ന് ജിങ്പിങ്ങിന് ഇത്രകാലമായിട്ടും അറിഞ്ഞുകൂട. ബഹുദേശീയവാദമാണ് കമ്മ്യൂണിസ്റ്റുകാര്‍ക്കു യോജിച്ചത് എന്നും ആ മരമണ്ടന് അറിയില്ല. അതിനാല്‍ സ്റ്റഡിക്ലാസ് നിര്‍ബ്ബന്ധമാണ്.
ജിങ്പിങ്ങിന്റെ തലയ്ക്ക് പിടിച്ചിരിക്കുന്നത് ദേശീയത എന്ന ബൂര്‍ഷ്വാ കാഴ്ചപ്പാടാണ്. സഖാവ് ജിങ്പിങ് ഹോങ്കോങ്ങിലെ കുട്ടികളെയും ചെറുപ്പക്കാരെയുമെല്ലാം ദേശീയബോധം പഠിപ്പിക്കാന്‍ തീരുമാനിച്ചിരിക്കുന്നു. നാലു ദിവസം പ്രസിഡണ്ട് ജിങ്പിങ്ങിന്റെ നേതൃത്വത്തില്‍ ചേര്‍ന്ന ചൈനീസ് കമ്മ്യൂണിസ്റ്റ് പാര്‍ട്ടിയാണ് ഈ തീരുമാനമെടുത്തത്. ഭാഗികമായി സ്വയംഭരണമുള്ള ഹോങ്കോങ്ങില്‍ ചൈനീസ് ആധിപത്യത്തിനെതിരെ ശക്തമായ പ്രക്ഷോഭം നടക്കുകയാണ്. ഇതിനെതിരെയാണ് യുവാക്കളില്‍ ചൈനയുടെ ചരിത്രവും സംസ്‌കാരവും പഠിപ്പിക്കാനുള്ള വിദ്യാഭ്യാസപദ്ധതി നടപ്പാക്കാന്‍ പോകുന്നത്. ”പ്രദേശത്തിനു ദീര്‍ഘകാലമായ പുരോഗതിയും സ്ഥിരതയും” ഉണ്ടാക്കാന്‍ ചൈനീസ് ഭരണസ്വാധീനം ശക്തമാക്കുന്നതിന്റെ ഭാഗമാണിത്. ഹോങ്കോങ്ങിലെ ബേസിക് ലോകമിഷന്‍ ഡയറക്ടര്‍ ഷെന്‍ ചുന്‍യോ ആണ് ഇക്കാര്യം പറഞ്ഞത്.
കാശ്മീരിലെ വിഘടനവാദത്തെ ഇല്ലാതാക്കി ആ പ്രദേശത്തിന്റെ വികസനവും ദേശീയ അഖണ്ഡതയും ശക്തമാക്കാനാണ് മോദി സര്‍ക്കാര്‍ 370-ാം വകുപ്പ് റദ്ദാക്കിയത്. ഇതിനെ നഖശിഖാന്തം എതിര്‍ക്കുന്നവരാണ് യെച്ചൂരിയും കൂട്ടരും. അതിനാല്‍ ജിങ്പിങ്ങിന് സ്റ്റഡിക്ലാസ്സെടുക്കാന്‍ യോഗ്യതയുള്ള പാര്‍ട്ടി കേഡര്‍ സഖാവ് യെച്ചൂരിതന്നെ!
Latest
Discussion about this post