മുതിർന്ന ആർ.എസ്സ്.എസ്സ് പ്രചാരകൻ ആർ.ഹരി അന്തരിച്ചു

മുതിർന്ന ആർ എസ്സ് എസ്സ് പ്രചാരകനും , പ്രശസ്ത എഴുത്തുകാരനും, ചിന്തകനും, പ്രഭാഷകനുമായ ആർ. ഹരി എന്ന ഹരിയേട്ടൻ അന്തരിച്ചു. ആദരാഞ്ജലി 🙏🏻

എറണാകുളം സ്വദേശിയായ ആർ. ഹരി 1930ൽ തെരുവിപറമ്പിൽ ടി. ജെ. രംഗഷേണായിയുടെയും പത്മാവതിദേവിയുടെയും 10 മക്കളിൽ രണ്ടാമനായി ജനിച്ചു. സെന്റ് ആൽബർട്സ് സ്കൂളിലെ പ്രാഥമിക വിദ്യാഭ്യാസകാലത്തും ഹൈസ്കൂളിലും സ്കോളർഷിപ്പോടുകൂടി പഠനം. മുത്തശ്ശിയുടെ പ്രേരണയിൽ 4-ാം ക്ലാസ്സുമുതൽ സംസ്കൃതപഠനം ആരംഭിച്ചു.

1944-ൽ നാഗപൂരിൽ നിന്ന് സംഘപ്രചാരകനായി എറണാകുളത്തെത്തിയ പുരുഷോത്തം ചിഞ്ചോൽക്കറുടെ സ്വാധീനത്തിൽ സംഘശാഖയുമായി ബന്ധപ്പെട്ടു.1946-ൽ കൊച്ചി മഹാരാജാസ് കോളേജിൽ ഇന്റർമീഡിയറ്റിന് ചേർന്നു. 1948-ൽ രസതന്ത്രത്തിൽ ബിരുദവിദ്യാർഥിയായിരിക്കെ ആർഎസ്എസിനെ നിരോധിച്ചതിനെത്തുടർന്ന് സത്യഗ്രഹമനുഷ്ഠിച്ച് റിമാൻഡിൽ കോഴിക്കോട്ടും ശിക്ഷിക്കപ്പെട്ട് കണ്ണൂർ സെൻട്രൽ ജയിലിലും അഞ്ചു മാസം തടവ് ശിക്ഷ അനുഭവിച്ചു. 1949-ൽ വീണ്ടും മഹാരാജാസ് കോളേജിൽ ചേർന്ന് സംസ്കൃതം, സാമ്പത്തികശാസ്ത്രം വിഷയങ്ങളിൽ ബിരുദപഠനം പൂർത്തിയാക്കി.

1951-ൽ രാഷ്ട്രീയ സ്വയംസേവക സംഘത്തിന്റെ പ്രചാരകനായി പറവൂർ താലൂക്കിൽ പ്രവർത്തനം ആരംഭിച്ചു. 1953 മുതൽ 62 വരെ തൃശൂർ ജില്ലാ പ്രചാരക്, 1963 മുതൽ 68 വരെ കേരളത്തിന്റെ തെക്കും വടക്കും ഭാഗങ്ങളിൽ വിഭാഗ് പ്രചാരക് എന്നീ ചുമതലകളിൽ പ്രവർത്തിച്ചു. 1975-77 കാലത്ത് അടിയന്തരാവസ്ഥക്കെതിരായ പ്രവർത്തനങ്ങളെ ഏകോപിപ്പിക്കുവാൻ ദേശവ്യാപകമായി സഞ്ചരിച്ചു കൊണ്ട് ഒളിവിൽ പ്രവർത്തിച്ചു. 1978-ൽ കേരള പ്രാന്ത ബൗദ്ധിക് പ്രമുഖ്, 1980-ൽ സഹപ്രാന്തപ്രചാരക് എന്നീ ചുമതലകൾ വഹിച്ചു. 1983 മുതൽ 94 വരെ പ്രാന്തപ്രചാരക് ആയിരിക്കെ, അതോടൊപ്പം 1990-ൽ അഖിലഭാരതീയ സഹബൗദ്ധിക് പ്രമുഖ്, 1991 മുതൽ അഖില ഭാരതീയ ബൗദ്ധിക് പ്രമുഖ് എന്നീ ചുമതലകളും ഏറ്റെടുത്തു.അഞ്ചു വർഷം മുംബൈ കേന്ദ്രമായും പിന്നീട് 2005 വരെ നാഗ്പൂർ കേന്ദ്രമായും അഖിലഭാരതീയ ബൗദ്ധിക് ശിക്ഷൺ പ്രമുഖ് എന്ന ചുമതല വഹിച്ചു. ഈ സന്ദർഭത്തിലാണ് പരമ. പൂജനീയ. ഗുരുജിയുടെ ‘സമ്പൂർണ സാഹിത്യസംഗ്രഹം’ 12 വാല്യങ്ങളിലായി ഗുരുജി സമഗ്ര’ എന്നു പേരിൽ അദ്ദേഹം ഹിന്ദിയിൽ തയ്യാറാക്കിയത്. 2005-ൽ ബൗദ്ധിക് പ്രമുഖ ചുമതലയിൽ നിന്ന് മാറിയതിനുശേഷം 2006 വരെ അഖില ഭാരതീയ കാര്യകാരി സദസ്യൻ’ എന്ന നിലയിൽ പ്രവർത്തിച്ചു.

2001-ൽ ലിത്വാനിയയിൽ ചേർന്ന ക്രിസ്തു പൂർവ മതങ്ങളുടെ പ്രതിനിധിസഭയിൽ പങ്കാളിയായി. സംഘപ്രവർത്തനങ്ങളുമായി ബന്ധപ്പെട്ട് അഞ്ച് ഭൂഖണ്ഡങ്ങളിലായി 22 രാജ്യങ്ങളിൽ സന്ദർശനം നടത്തി. പതിനൊന്ന് ഭാഷകളിൽ പാണ്ഡിത്യമുള്ള ശ്രീ. ആർ. ഹരി മലയാളം, ഹിന്ദി, മറാത്തി, കൊങ്കണി, സംസ്കൃതം, ഇംഗ്ലീഷ് ഭാഷകളിലായി 45-ഓളം പുസ്തകങ്ങളും നിരവധി ലേഖനങ്ങളും എഴുതിയിട്ടുണ്ട്.

സംഘചുമതലകളിൽ മാത്രം വ്യാപൃതനായിരുന്ന അദ്ദേഹം 2006ന് ശേഷം ചുമതലകളിൽ നിന്ന് വിമുക്തനായെങ്കിലും എറണാകുളത്തെ പ്രാന്തകാര്യാലയം കേന്ദ്രമാക്കി പ്രവർത്തകർക്കും സമൂഹത്തിനും പ്രേരണയും മാർഗദർശനവും നൽകി പ്രവർത്തിച്ചു