കവിത

അക്ഷരപ്പൂട്ടു ഭേദിച്ചു പുസ്തക-
ക്കെട്ടറുത്തു കവിത പുറത്തെത്തി
മര്‍ത്യജന്മ മഹാസങ്കടത്തിന്റെ
രക്തകിന്നരം മീട്ടാനൊരുങ്ങുന്നു.
ധീരസുസ്ഥിര പ്രാജ്ഞനെന്നാകിലും
നീര്‍നിറഞ്ഞു കവിതയ്ക്കു കണ്‍കളില്‍
കണ്ണുനീരിനാല്‍ കാണുന്നതൊക്കെയും
ഉണ്‍മ തന്‍മുഖം ജന്മദുഃഖംമുഖം.
ജീവിതം കഷ്ടകാണ്ഡങ്ങളാടുന്ന
ഭീതിതാന്ധ ഭവാര്‍ത്തിതന്‍ തീരഭൂ-
വീഥിയില്‍ ദുരന്താര്‍ത്ഥമുറഞ്ഞൊരു
വാക്കുപോല്‍ നിലകൊള്‍വൂ കവിതയും.
അന്ധകാളിമയാളും ദിഗന്തങ്ങള്‍
വെന്തുപെയ്യും മനസ്സിന്‍ വിലാപങ്ങള്‍
രക്തഗന്ധത്തില്‍ മുങ്ങിക്കുളിച്ചിരുള്‍-
പ്പക്ഷി കാറ്റായ് പറക്കുന്നു ചുറ്റിലും
ക്രാന്തദര്‍ശി കവിതയ്ക്കു കാഴ്ചകള്‍
മാഞ്ഞുപോവുന്നു പ്രാണന്റെയേകാന്ത
നാളവും മിഴിപൂട്ടുന്നു, 1പാതയില്‍
ചത്തപെണ്ണിനെ കാക്കകള്‍ കൊത്തുന്നു.
അന്തരാത്മാവഗാധമാമജ്ഞാത
സങ്കടാബ്ധിയിലാഴുന്ന വേളയില്‍,
നിന്ദ്യമെന്നു പഠിച്ച നരത്വത്തി-
ന്നന്ധകൂപങ്ങള്‍ വായ്പിളര്‍ന്നീടുന്നു
2വംഗസാഗര തീരത്തൊരന്തിയില്‍
വെന്തടങ്ങും ചിതയുടെ ചാരത്ത്
ഉറ്റവര്‍ പരേതര്‍ക്കായൊരുക്കിയ
മണ്‍കലത്തിലെ ചോറുതിന്നും കഷ്ട-
ജന്മവും നരത്വത്തിന്നു നിന്ദ്യമോ?
3ഹാ, വിജിഗീഷുമൃത്യോ മടങ്ങുക
ആദിയന്തങ്ങളില്ലിവിടൊന്നിനും
നിന്ദ്യമാം നരജന്മങ്ങള്‍ വാഴ്‌വിന്റെ
രംഗവേദിയില്‍ ശോകാന്തമാടട്ടെ
…. …. …. …. …. …. ….
ജീവിതം കഷ്ടകാണ്ഡങ്ങളാടുന്ന
ഭീതിതാന്ധ ഭവാര്‍ത്തിതന്‍ തീരഭൂ-
വീഥിയില്‍ ദുരന്താര്‍ത്ഥമുറഞ്ഞൊരു
വാക്കുപോല്‍ നിലകൊള്‍വൂ കവിതയും.

1. അക്കിത്തം
2. ബാലചന്ദ്രന്‍ ചുള്ളിക്കാടിന്റെ ‘അന്നം’ എന്ന കവിത ഓര്‍ക്കുക.
3. കടപ്പാട്: വൈലോപ്പിള്ളി