ഭാരതത്തിന്റെ വിദ്യാഭ്യാസമേഖലയുടെ സമഗ്രമായ അഴിച്ചുപണിയും പരിഷ്കരണവും വിഭാവനചെയ്യുന്ന നയരേഖയാണ് കേന്ദ്രസര്ക്കാര് പ്രഖ്യാപിച്ച ‘ദേശീയ വിദ്യാഭ്യാസനയം 2020’. നരേന്ദ്രമോദി സര്ക്കാര് അംഗീകരിച്ച പുതിയ വിദ്യാഭ്യാസനയം ഭാവാത്മകമായ പദ്ധതികളും നൂതനമായ ആശയങ്ങളും ഉള്ക്കൊള്ളുന്നതാണ്. നീണ്ട മുപ്പത്തിനാലുവര്ഷങ്ങള്ക്കുശേഷമാണ് വിദ്യാഭ്യാസരംഗത്ത് ദിശാബോധം നല്കാന് ഒരു ദേശീയ നയം കേന്ദ്രസര്ക്കാര് അംഗീകരിക്കുന്നത്. 1986-ല് ആണ് നിലവിലുണ്ടായിരുന്ന വിദ്യാഭ്യാസനയം രാജീവ് ഗാന്ധി സര്ക്കാര് പ്രഖ്യാപിക്കുന്നത്. 1992-ല് അതില് ചിലമാറ്റങ്ങള് വരുത്തിയെങ്കിലും ലോകമെമ്പാടും ഈ കാലഘട്ടത്തില് ഉണ്ടായ വിദ്യാഭ്യാസവിപ്ലവം നമ്മുടെ രാജ്യം അവഗണിച്ചു. വാജ്പേയ് സര്ക്കാര് ചില മാറ്റങ്ങള്ക്ക് ശ്രമിച്ചപ്പോള് കാവിവല്ക്കരണം എന്ന് ആരോപിച്ച് പ്രചണ്ഡമായ പ്രചരണം നടത്തി അതിനെ പരാജയപ്പെടുത്താന് കോണ്ഗ്രസ്സും ഇടതുപക്ഷവും വര്ഗ്ഗീയ ശക്തികളെ കൂട്ടുപിടിച്ചത് ഇവിടെ വിസ്മരിക്കുന്നില്ല. വിവരസാങ്കേതിക രംഗത്ത് വമ്പിച്ച മാറ്റങ്ങള് ഉണ്ടായിട്ടും 1986-ല് അംഗീകരിച്ച രാജ്യത്തിന്റെ വിദ്യാഭ്യാസ നയം 2020 വരെ മാറ്റം കൂടാതെ തുടര്ന്നു. ഈ പശ്ചാത്തലത്തില് നിന്നുവേണം നരേന്ദ്രമോദി സര്ക്കാര് വിദ്യാഭ്യാസരംഗത്ത് സമഗ്രമായ മാറ്റത്തിനായിശ്രമം തുടങ്ങുന്നത് ചര്ച്ച ചെയ്യേണ്ടത്. 2015 ഒക്ടോബറില് പുതിയ ദേശീയ നയത്തിന്റെ കരടു തയ്യാറാക്കാന് കേന്ദ്ര സര്ക്കാര് ടി.എസ്.ആര്.സുബ്രഹ്മണ്യം കമ്മറ്റിയെ നിയോഗിച്ചു. 2016 മേയില് സുബ്രഹ്മണ്യം കമ്മറ്റി റിപ്പോര്ട്ട് നല്കുകയുണ്ടായി. കൂടുതല് സമഗ്രമായി വിദ്യാഭ്യാസനയം തയ്യാറാക്കാന് 2017ല് ഡോ. കസ്തൂരിരംഗന് ചെയര്മാനായ പന്ത്രണ്ട് അംഗ കമ്മറ്റിയെ നിയോഗിക്കുകയുണ്ടായി. 2019ല് കരടു നയരേഖ സമൂഹത്തിലെ വിവിധ ശ്രേണിയിലുള്ളവരുടെ അഭിപ്രായത്തിനായി സമര്പ്പിച്ചു. ചുരുക്കത്തില് ഏതാ ണ്ട് നാലുവര്ഷത്തെ നിരന്തരമായ ചര്ച്ചയ്ക്കൊടുവിലാണ് ദേശീയ വിദ്യാഭ്യാസനയം 2020 ജൂലായ് മാസത്തില് കേന്ദ്ര സര്ക്കാര് ഔദ്യോഗികമായി അംഗീകരിച്ചത്. എടുത്തു പറയേണ്ട വസ്തുത, കരടുനയം വ്യാപകമായ ചര്ച്ചകള്ക്ക് വിധേയമായതിനാല് 2020ലെ ദേശീയ വിദ്യാഭ്യാസനയം കാര്യമായ വിമര്ശനങ്ങള് ഒന്നും ക്ഷണിച്ചുവരുത്തിയില്ല. പൊതുവേ സമൂഹം ഈ ദേശീയ നയം സ്വാഗതം ചെയ്യുകയുണ്ടായി. സ്കൂള് വിദ്യാഭ്യാസമേഖലയും ഉന്നതവിദ്യാഭ്യാസ മേഖലയും സമഗ്രമായി പൊളിച്ചെഴുതുന്നതിനുള്ള രൂപരേഖയാണ് ദേശീയവിദ്യാഭ്യാസനയം 2020.
21-ാം നൂറ്റാണ്ടിലെ സാദ്ധ്യതകളെയും വെല്ലുവിളികളെയും നേരിടുന്നതിന് രാജ്യത്തെ യുവാക്കളെ തയ്യാറാക്കാന് വേണ്ട പരിഷ്കരണങ്ങള് പുതിയ വിദ്യാഭ്യാസനയത്തിലുണ്ട്. നിലവിലെ വിദ്യാഭ്യാസ പദ്ധതി ഒരു ഭാഗത്ത് വമ്പിച്ച നേട്ടങ്ങള് നേടി എങ്കിലും അത് സമൂഹത്തിലെ എല്ലാവിഭാഗങ്ങള്ക്കും ഒരുപോലെ പ്രാപ്തമായില്ല. നിലവാരമുള്ള വിദ്യാഭ്യാസം ചില കേന്ദ്രങ്ങളില് ഒതുങ്ങി. സ്വകാര്യമേഖലയുടെ വളര്ച്ചയോടെ സാധാരണക്കാര്ക്ക് ഉയര്ന്ന ഫീസ് നല്കി നിലവാരമുള്ള വിദ്യാലയങ്ങളില് കടന്നു ചെല്ലാന് കഴിയാതെയായി. ഭരണഘടന വിഭാവനചെയ്യുന്ന തുല്യത വിദ്യാഭ്യാസ മേഖലയില് അന്യമായി. ഈ പശ്ചാത്തലത്തില് പുതിയ വിദ്യാഭ്യാസനയം അഞ്ച് അടിസ്ഥാനതത്വങ്ങളിലാണ് രൂപപ്പെടുത്തിയത്. (1) Access എല്ലാവര്ക്കും കടന്നു ചെല്ലാന് കഴിയുന്ന സ്ഥാപനങ്ങള് (2) Equity തുല്യമായ അവസരം (3)Quality നിലവാരമുള്ള വിദ്യാഭ്യാസം (4) Affordability എല്ലാവര്ക്കും സാമ്പത്തികമായി താങ്ങാന് കഴിയുന്ന വിദ്യാഭ്യാസം (5) Accountability സമൂഹത്തോട് ഉത്തരവാദിത്തമുള്ള വിദ്യാഭ്യാസം. ഈ അഞ്ചു അടിസ്ഥാന തത്വങ്ങള് കേവലം ഒരു ആശയം എന്ന തലത്തിലല്ല മറിച്ച് പ്രായോഗികമായി നടപ്പിലാക്കാനുള്ള കര്മ്മ പദ്ധതികളും അത് നിരന്തരം അവലോകനം നടത്തുന്നതിനുള്ള സംവിധാനവും പുതിയ വിദ്യാഭ്യാസനയം ഉറപ്പാക്കുന്നു.
വിദ്യാഭ്യാസം സമൂഹ നന്മയ്ക്കാകണമെന്നും പൊതുവിദ്യാഭ്യാസ മണ്ഡലം ജനാധിപത്യസാമൂഹിക ക്രമത്തിന്റെ അടിസ്ഥാനശിലയാകണമെന്നും ദേശീയ വിദ്യാഭ്യാസനയം പ്രഖ്യാപിക്കുന്നു. നിലവാരമുള്ള വിദ്യാഭ്യാസം എല്ലാ വിഭാഗങ്ങള്ക്കും ഒരുപോലെ ലഭ്യമായാല് മാത്രമേ രാഷ്ട്രനിര്മ്മിതിയും വ്യക്തിനിര്മ്മിതിയും സാദ്ധ്യമാകൂ. സാമൂഹ്യനീതി ഉറപ്പാക്കുന്നതിനും സാമ്പത്തിക പുരോഗതി കൈവരിക്കുന്നതിനും ശാസ്ത്ര അനുബന്ധവും പുരോഗതിയും നേടുന്നതിനും സാംസ്കാരിക പൈതൃകം സംരക്ഷിക്കുന്നതിനും രാഷ്ട്രത്തിന്റെ ഐക്യം കാത്തുസൂക്ഷിക്കുന്നതിനും വിദ്യാഭ്യാസപദ്ധതി ലക്ഷ്യമാക്കുന്നു. ദേശീയ വിദ്യാഭ്യാസം 2020 വിദ്യാഭ്യാസ മണ്ഡലത്തിന്റെ സമഗ്രമായ പൊളിച്ചെഴുത്ത് ലക്ഷ്യമാക്കുന്നു. പാഠ്യപദ്ധതിയും പാഠ്യക്രമവും പദ്ധതി നിര്വ്വഹണവും ഘടനയും നിയന്ത്രണസംവിധാനവും പുനരാവിഷ്കരിക്കും. സ്കൂള് വിദ്യാഭ്യാസം നിര്ബ്ബന്ധിതവും സാര്വ്വത്രികവും ആക്കി. മൂന്നു വയസ്സുമുതല് പതിനെട്ടുവയസ്സുവരെയുള്ള കുട്ടികളെ പൂര്ണ്ണമായും വിദ്യാഭ്യാസ പദ്ധതിയുടെ ഭാഗമാക്കും. രാജ്യത്തിന്റെ ജി.ഡി.പിയുടെ ആറുശതമാനം (6%) വിദ്യാഭ്യാസത്തിനായി മാറ്റിവയ്ക്കും നിലവാരമുള്ള വിദ്യാഭ്യാസം മൗലിക അവകാശമായി പ്രഖ്യാപിക്കുന്ന നയം രാജ്യത്തെ വിദ്യാഭ്യാസ സ്ഥാപനങ്ങളെ ലോകനിലവാരത്തിലേയ്ക്ക് ഉയര്ത്താന് വേണ്ട പദ്ധതികളാണ് ആസൂത്രണം ചെയ്യുന്നത്. ഭാരതത്തെ വിജ്ഞാനത്തിന്റെ സൂപ്പര് പവറായി മാറ്റുകയാണ് ലക്ഷ്യം. മാനവവിഭവവികസന മന്ത്രാലയത്തെ വിദ്യാഭ്യാസ മന്ത്രാലയം എന്ന് പുനര്നാമകരണം ചെയ്തുകൊണ്ടാണ് പുതിയ തുടക്കം കുറിച്ചിരിക്കുന്നത്.
സ്കൂള് വിദ്യാഭ്യാസം
സമഗ്രമായ പുനഃക്രമീകരണമാണ് സ്കൂള് വിദ്യാഭ്യാസ മേഖലയില് ഉണ്ടാവുന്നത്. മൂന്നു വയസ്സു മുതല് ആരംഭിച്ച് പതിനെട്ടു വയസ്സുവരെ തുടരുന്ന സ്കൂള് വിദ്യാഭ്യാസം നാലായി വിഭജിച്ചിരിക്കുന്നു. ഫണ്ടേഷന് തലത്തില് മൂന്നു വയസ്സുമുതല് എട്ടു വയസ്സു വരെയുള്ള (3-8) അഞ്ചു വര്ഷങ്ങള് ഉണ്ട്. ഇതില് ആദ്യത്തെ മൂന്നുവര്ഷം പ്രീപ്രൈമറിതലമാണ്. തുടര്ന്ന് ഒന്നും രണ്ടും ക്ലാസുകളും കൂടെ ഈ വിഭാഗത്തില് ഉള്പ്പെടുന്നു. എട്ടു വയസ്സുമുതല് പതിനൊന്നു വയസ്സുവരെയുള്ള മൂന്ന്, നാല്, അഞ്ച് ക്ലാസുകള് പ്രിപ്പറേറ്ററി (preparatary )വിഭാഗത്തില്പെടും. ആറ്, ഏഴ്, എട്ടു ക്ലാസുകള് മിഡില് ലവലില്പ്പെടുന്നു. പതിനൊന്നു വയസ്സു മുതല് പതിനാലു വയസ്സുവരെയുള്ള കുട്ടികളാണ് ഈ വിഭാഗത്തില് ഉള്ക്കൊള്ളുന്നത്. പതിനാലു വയസ്സുമുതല് പതിനെട്ടു വയസ്സുവരെയുള്ള കുട്ടികളെ ഉള്ക്കൊള്ളുന്നു ഒന്പതും, പത്ത്, പതിനൊന്ന്, പന്ത്രണ്ട് ഡിവിഷനുകള് ഹൈസ്കൂള് വിഭാഗത്തില്പ്പെടും. ഹൈസ്കൂള് വിഭാഗത്തില് രണ്ടുതലങ്ങള് ഉണ്ടാവും. ഒന്പത്, പത്ത് ഡിവിഷനുകള് ആദ്യഭാഗങ്ങളും പതിനൊന്ന്, പന്ത്രണ്ട് ഡിവിഷനുകള് രണ്ടാംഭാഗത്തും ഉള്പ്പെടും.
പുതിയ ദേശീയ വിദ്യാഭ്യാസനയം ഏറ്റവും കൂടുതല് ഊന്നല് നല്കുന്നത് ഒരു കുട്ടിയുടെ സ്വഭാവരൂപീകരണത്തില് നിര്ണ്ണായക കാലഘട്ടമായ പ്രീപ്രൈമറി-പ്രൈമറി തലത്തിലാണ്. നിലവില് അടിസ്ഥാന ജനവിഭാഗങ്ങള്ക്ക് നിലവാരമുള്ള പ്രീപ്രൈമറി വിദ്യാഭ്യാസം ലഭിക്കുന്നില്ല. എല്ലാവിഭാഗത്തില്പ്പെട്ട കുട്ടികള്ക്കും മൂന്നു വയസ്സുമുതല് ആറുവയസ്സുവരെ നിലവാരമുള്ള പ്രീപ്രൈമറി വിദ്യാഭ്യാസം സൗജന്യമായും നിര്ബ്ബന്ധിതമായും ലഭ്യമാക്കുന്നതിനുള്ള പദ്ധതിയാണ് ആവിഷ്കരിച്ചിരിക്കുന്നത്. 2030 നകം എല്ലാ കുട്ടികള്ക്കും നിലവാരമുള്ള പ്രീപ്രൈമറി വിദ്യാഭ്യാസം ഒരുപോലെ ലഭ്യമാക്കുന്നതിനുള്ള വിപ്ലവകരമായ നയമാണ് സ്വീകരിച്ചിരിക്കുന്നത്. സാമ്പത്തികമായും സാമൂഹികമായും പിന്നാക്കം നില്ക്കുന്ന പ്രദേശങ്ങള്ക്കും കുടുംബങ്ങള്ക്കും പ്രത്യേക പരിഗണന ഈ പദ്ധതിയിലുണ്ട്. അംഗനവാടികളെയും പ്രീപ്രൈമറി വിദ്യാലയങ്ങളെയും ഉയര്ന്ന ഭൗതിക സാഹചര്യങ്ങള് നല്കി ശാക്തീകരിക്കും. അദ്ധ്യാപകര്ക്ക് അതിനാവശ്യമായ പരിശീലനം കൊടുക്കും. മൂന്നു വയസ്സുമുതല് എട്ടുവയസ്സുവരെയുള്ള വിദ്യാഭ്യാസം കേവലം പാഠപുസ്തകങ്ങള് വഴിയല്ല മറിച്ച് കുട്ടികളിലൂടെയും പ്രവര്ത്തനപരിചയത്തിലൂടെയും നല്ല സ്വഭാവ രൂപീകരണത്തിന് ഉതകുന്ന ശൈലിയാണ് സ്വീകരിക്കുന്നത്. പ്രിപ്പറേറ്ററി ക്ലാസ്സുകളിലാണ് (3-5) പുസ്തകങ്ങളെ കൂടുതല് പരിചയപ്പെടുത്തുന്നത്. ആറാം ക്ലാസുമുതല് വിഷയങ്ങളെ പരിചയപ്പെടുത്തുന്നു. സമഗ്രമായ പുരോഗതിയും വ്യക്തിത്വനിര്മ്മാണവും സ്കൂള് വിദ്യാഭ്യാസത്തിന്റെ അടിസ്ഥാനലക്ഷ്യമാണ്.
ദേശീയ വിദ്യാഭ്യാസനയത്തിന്റെ കാതലായ നയം എന്നത് അത് മാതൃഭാഷയ്ക്ക് നല്കുന്ന പ്രാധാന്യമാണ്. കഴിയുന്നതും അഞ്ചാം ക്ലാസുവരെ വിദ്യാഭ്യാസം മാതൃഭാഷയിലാവണം എന്ന് നയം നിര്ദ്ദേശിക്കുന്നു. അതേസമയം ത്രിഭാഷാപഠനം അത് പ്രോത്സാഹിപ്പിക്കുന്നു. രാജ്യത്തിന്റെ ബഹുഭാഷാവൈവിധ്യം ഉള്ക്കൊണ്ട് വിദ്യാഭ്യാസനയം സ്വീകരിച്ചതുകൊണ്ടാണ് വിവാദങ്ങള് ഒഴിവാക്കപ്പെട്ടത്. സമൂഹത്തിലെ പാര്ശ്വവല്ക്കരിക്കപ്പെട്ട ജനസമൂഹത്തിന് നിലവാരമുള്ള വിദ്യാഭ്യാസം സൗജന്യമായി പ്രീപ്രൈമറിതലം മുതല് നിര്ബ്ബന്ധിതമായി ഒരുപോലെ ലഭ്യമാക്കുന്ന നടപടികളും പുതിയ നയം ആവിഷ്കരിച്ചിട്ടുണ്ട്. പ്രീപ്രൈമറിതലം മുതല് കുട്ടികളുടെ ശാരീരികവും മാനസികവുമായ ആരോഗ്യവും പോഷകമൂല്യമുള്ള സൗജന്യ ഭക്ഷണവും ഉറപ്പാക്കുന്നു.
സര്വ്വശിക്ഷാ അഭിയാന്, വിദ്യാഭ്യാസ അവകാശനിയമം എന്നിവ നടപ്പാക്കിയ രാജ്യത്തെ സ്കൂള് വിദ്യാഭ്യാസ മേഖലയിലെ ഏറ്റവും ദുഃഖകരമായ വശം പഠനംപൂര്ത്തിയാക്കാതെയുള്ള വിദ്യാര്ത്ഥികളുടെ കൊഴിഞ്ഞുപോക്ക് ആണ്. അഞ്ചാം ക്ലാസ് കഴിയുമ്പോള് തന്നെ അടിസ്ഥാന ജനവിഭാഗങ്ങളില് പെട്ട വലിയൊരു വിഭാഗം കുട്ടികള് വിദ്യാലയം ഉപേക്ഷിക്കുന്നു. സാമൂഹികവും സാമ്പത്തികവുമായ ചുറ്റുപാടുകളാണ് ദരിദ്രവിഭാഗങ്ങളിലെ കുട്ടികളെ വിദ്യാഭ്യാസമേഖലയില് നിന്ന് പുറത്തുപോകാന് പ്രേരിപ്പിക്കുന്നത്. നിലവില് ഒമ്പത്, പത്ത് ഡിവിഷനുകളില് കൊഴിഞ്ഞു പോകുന്ന കുട്ടികളുടെ എണ്ണം 10.3 ശതമാനമായിരുന്നെങ്കില് പതിനൊന്ന്, പന്ത്രണ്ട് ഡിവിഷനുകള് ആകുമ്പോള് അത് 48.5 ശതമാനമായി ഉയരുന്നു. 2015-ലെ കണക്കുപ്രകാരം ഏതാണ്ട് 6.2 കോടി വിദ്യാര്ത്ഥികളാണ് ആറാംക്ലാസിനുശേഷം വിദ്യാഭ്യാസം മതിയാക്കി പുറത്തുപോയത്. ഈ പശ്ചാത്തലത്തില് പുതിയ വിദ്യാഭ്യാസ നയത്തിന്റെ ഊന്നല് നൂറുശതമാനം (100%) വിദ്യാര്ത്ഥികളെയും പതിനെട്ടു വയസ്സുവരെ വിദ്യാലയങ്ങളില് നിന്ന് കൊഴിഞ്ഞുപോകാതെ നിലനിര്ത്തുക എന്നതാണ്. സാമൂഹ്യനീതിയുടെ പശ്ചാത്തലത്തില് നിന്നുവേണം സര്ക്കാരിന്റെ ഈ കരുതലിനെ കാണേണ്ടത്. ജാതിയുടെയോ മതത്തിന്റെയോ പേരിലോ, സാമ്പത്തിക പിന്നാക്കാവസ്ഥയുടെ പേരിലോ ഒരു വിദ്യാര്ത്ഥിപോലും വിദ്യാഭ്യാസ മേഖലയില് നിന്നും പുറത്തു പോകാന് പാടില്ല എന്ന് പുതിയ വിദ്യാഭ്യാസനയം പ്രഖ്യാപിക്കുന്നു. പട്ടികജാതി, പട്ടികവര്ഗ്ഗ, പിന്നാക്ക, ന്യൂനപക്ഷ വിഭാഗങ്ങളിലെ കുട്ടികളാണ് വിദ്യാഭ്യാസ മണ്ഡലത്തില് നിന്ന് പലപ്പോഴും പുറത്താകുന്നത്. പുതിയനയം ഈ വിഭാഗങ്ങളുടെ വിദ്യാഭ്യാസം ഉറപ്പാക്കുന്നു. അതിനാവശ്യമായ ഭൗതിക സാഹചര്യം മെച്ചപ്പെടുത്തുക എന്നതാണ് അതിനുള്ള ഒരു മാര്ഗ്ഗം. നിലവിലുള്ള വിദ്യാലയങ്ങളെ നിലവാരമുള്ള വിദ്യാലയങ്ങള് ആക്കി മാറ്റുന്നതിനുള്ള വ്യവസ്ഥയും ഇതിലുള്പ്പെടുന്നു. വിദ്യാഭ്യാസം ഏവര്ക്കും ലഭ്യമാക്കുന്നതിനുവേണ്ടി ഗ്രാമീണ മേഖലകളിലും വിദ്യാഭ്യാസത്തില് പിന്നില് നില്ക്കുന്ന പ്രദേശങ്ങളിലും പുതിയ വിദ്യാലയങ്ങളും ഹോസ്റ്റല് സംവിധാനവും ലഭ്യമാക്കും. പഠനം നിര്ത്തിപുറത്തു പോകുന്ന കുട്ടികളെ കണ്ടെത്തി വിദ്യാലയങ്ങളിലേക്ക് മടക്കി കൊണ്ടുവരുന്നതിനും പഠനത്തില് പിന്നാക്കം നില്ക്കുന്ന വിദ്യാര്ത്ഥികള്ക്ക് പ്രത്യേക പരിശീലനം നല്കുന്നതിനും വ്യവസ്ഥയുണ്ട്. വിദ്യാഭ്യാസപരമായി പിന്നാക്കം നില്ക്കുന്ന മേഖലകളില് പ്രത്യേക എഡ്യുക്കേഷന് സോണുകള് സൃഷ്ടിക്കും. പെണ്കുട്ടികളുടെ വിദ്യാഭ്യാസത്തിന് പ്രത്യേക പരിഗണനകൊടുക്കാന് ജെന്ഡര് ഇന്ക്ലുഷന് ഫണ്ട്സ്വ(Gender Inclusion Fund) രൂപിക്കാന് വിദ്യാഭ്യാസനയം ലക്ഷ്യമാക്കുന്നു. ട്രാന്സ്ജെന്ഡേഴ്സിനും ദിവ്യാംഗര്ക്കും കൂടെ ഇതിന്റെ ആനുകൂല്യം ലഭിക്കും.
തുല്യത കൈവരിക്കുന്നതിനുള്ള ഘടനാപരമായ സംവിധാനങ്ങള് ഈ നയം ഉറപ്പാക്കിയിട്ടുണ്ട്. സാമൂഹികമായും സാമ്പത്തികമായും പിന്നാക്കം നില്ക്കുന്ന കുട്ടികള്ക്ക് പ്രൈമറിതലം മുതല് പ്രത്യേക പരിരക്ഷ ഉറപ്പാക്കും. അവരെ സ്കൂളില് എത്തിക്കുന്നതിനും നിലനിര്ത്തുന്നതിനും പഠനപ്രക്രിയയില് പിന്നോട്ട് പോകാതിരിക്കുന്നതിനും പ്രത്യേക ശ്രദ്ധ ഉണ്ടാവും. പഠനത്തിന്റെ മികച്ച നിലവാരം കൈവരിക്കുന്നതിനും നിരന്തരം പരിശോധിക്കുന്നതിനും വ്യവസ്ഥയുണ്ട്. പ്രത്യേക വിദ്യാഭ്യാസമേഖലയില് ഉള്ള കുട്ടികള്ക്ക് മികവിന്റെ അടിസ്ഥാനത്തില് വിവിധ സ്കോളര്ഷിപ്പ് പദ്ധതികളുമുണ്ട്. കൂടാതെ സ്കൂളുകളില് കൗണ്സിലിങ്ങ് സംവിധാനവും ഉണ്ടാവും. മാത്രമല്ല പിന്നാക്ക മേഖലകളില് കൂടുതല് നവോദയ സ്കൂളുകളും കേന്ദ്രീയ വിദ്യാലയങ്ങളും ആരംഭിക്കുന്നതിനും പദ്ധതികള് ആവിഷ്കരിച്ചിട്ടുണ്ട്.
പുതിയ വിദ്യാഭ്യാസനയം പ്രകാരം പതിനഞ്ച് വര്ഷമാണ് ഒരു കുട്ടി സ്കൂള് വിദ്യാഭ്യാസത്തിന് മാറ്റിവയ്ക്കുന്നത്. നിലവില് നിര്ബ്ബന്ധിത സൗജന്യവിദ്യാഭ്യാസം ആറുവയസ്സുമുതല് പതിനാലുവയസ്സുവരെയാണെങ്കില് (6-14) പുതിയ നയത്തില് മൂന്നു വയസ്സുമുതല് പതിനെട്ടു വയസ്സുവരെയാണ് (3-18) നിര്ബ്ബന്ധിത സൗജന്യ വിദ്യാഭ്യാസം. മുകളില് സൂചിപ്പിച്ചതുപോലെ ഇതില് ആദ്യത്തെ മൂന്നുവര്ഷം പ്രീപ്രൈമറിതല വിദ്യാഭ്യാസമായിരിക്കും. 5+3+3+4 എന്ന തലത്തിലാണ് സ്കൂള് പാഠ്യക്രമം പ്രീപ്രൈമറിതലം മുതല് പന്ത്രണ്ടാം ക്ലാസുവരെ നിശ്ചയിച്ചിരിക്കുന്നത്. നാലു വര്ഷമാണ് ഹൈസ്കൂള് വിഭാഗത്തില്പ്പെടുന്നത്. പത്താം ക്ലാസിലും പന്ത്രണ്ടാംക്ലാസിലും സംസ്ഥാനതല ബോര്ഡ് പരീക്ഷയുണ്ടാവും. മൂന്ന്, അഞ്ച്, എട്ടു ക്ലാസുകളില് സംസ്ഥാനതല പരീക്ഷകള് ഉണ്ടാവും. നിരന്തരമൂല്യനിര്ണ്ണയം ഈ പഠനക്രമത്തിന്റെ ഭാഗമാണ്. പാഠ്യ-പാഠ്യേതര വിഷയങ്ങളിലെ പ്രകടനം വിലയിരുത്തപ്പെടും. ചുരുക്കത്തില് വിദ്യാര്ത്ഥിയുടെ സമഗ്രമായ വളര്ച്ചയും പുരോഗതിയുമാണ് ദേശീയ വിദ്യാഭ്യാസനയം ലക്ഷ്യമാക്കുന്നത്.
ആറാം ക്ലാസുമുതല് നൈപുണ്യവികസനത്തിനും തൊഴിലധിഷ്ഠിത വിദ്യാഭ്യാസത്തിനും ഊന്നല് നല്കും. സെക്കന്ററിതലത്തില് വിദ്യാര്ത്ഥികള്ക്ക് താല്പര്യമുള്ള വിഷയങ്ങള് തിരഞ്ഞെടുക്കാന് അവസരമുണ്ടാകും. കല, കായിക, തൊഴില് താല്പര്യങ്ങള്ക്ക് പ്രത്യേക പരിഗണനയുണ്ടാവും. സ്കൂള് വിദ്യാഭ്യാസത്തിന്റെ നിലവാരം ഉറപ്പാക്കാന് സംസ്ഥാനതലത്തില് സ്റ്റേറ്റ് സ്കൂള് സ്റ്റാന്ഡേര്ഡ് അതോറിറ്റി(State School Standard Authority SSSA) യും ദേശീയതലത്തില് നാഷണല് അസസ്മെന്റ് സെന്റര് ഫോര് സ്കൂള് എഡ്യുക്കേഷന് (National Assment Centre for School Eduction – NACSE) എന്നിവയുണ്ടാവും. നിലവാരം ഉറപ്പിക്കുന്നതിനും നയപരമായ തീരുമാനങ്ങള് സ്വീകരിക്കുന്നതിനും വിവിധ സമിതികള് ഉണ്ടാവും. അദ്ധ്യാപകര്ക്ക് നിലവാരം ഉറപ്പാക്കുന്നതിനുള്ള വ്യവസ്ഥയ്ക്കും ദേശീയവിദ്യാഭ്യാസനയത്തില് വിഭാവനചെയ്യുന്നുണ്ട്.
ഉന്നതവിദ്യാഭ്യാസമേഖല
ദേശീയവിദ്യാഭ്യാസനയത്തിന്റെ അടിസ്ഥാനലക്ഷ്യമാണ് നിലവാരമുള്ള സര്വ്വകലാശാലകളും കോളേജുകളും രൂപപ്പെടുത്തുക എന്നത്. നിലവില് ഏതാണ്ട് അമ്പതിനായിരം കോളേജുകളും ആയിരത്തില്പരം സര്വ്വകലാശാലകളും രാജ്യത്ത് പ്രവര്ത്തിക്കുന്നു. ഇതില് പതിനായിരത്തോളം കോളേജുകള് ബി.എഡ്. കോളേജുകളാണ്. ഈ കലാലയങ്ങളെ മള്ട്ടി ഡിസിപ്ലിനറി കോളേജുകളാക്കി പരിവര്ത്തനം ചെയ്യും. അടിസ്ഥാനസൗകര്യങ്ങളുടെ അഭാവം, സ്ഥിരമായ അദ്ധ്യാപകരുടെ അഭാവം, അടിസ്ഥാന ജനവിഭാഗങ്ങള്ക്കും പിന്നാക്കവിഭാഗങ്ങള്ക്കും കടന്നുചെല്ലാന് കഴിയാത്ത അവസ്ഥ, അക്കാദമിക സ്വാതന്ത്ര്യത്തിന്റെ അഭാവം, തുടങ്ങിയവ ഇന്നത്തെ ഉന്നത വിദ്യാഭ്യാസ സ്ഥാപനങ്ങളുടെ പ്രശ്നങ്ങളാണ്. ദേശീയ വിദ്യാഭ്യാസനയം ഈ കാതലായ പ്രശ്നങ്ങളെ നേരിടാന് കര്മ്മ പദ്ധതികള് ആവിഷ്കരിക്കുന്നു. അതിനാവശ്യമായി സ്ഥാപനങ്ങളെ പുനഃക്രമീകരിക്കും. എല്ലാ ഉന്നതവിദ്യാഭ്യാസ സ്ഥാപനങ്ങളെയും ഗവേഷണത്തിന് ഊന്നല് കൊടുക്കുന്ന സ്ഥാപനങ്ങളായി മാറ്റും. കോളേജുകളെ സ്വതന്ത്രപദവിയുള്ള ആട്ടോണമസ് കോളേജുകളായി രൂപപ്പെടുത്തും. എല്ലാ കലാലയങ്ങളും മള്ട്ടി ഡിസിപ്ലിനറി സ്ഥാപനങ്ങളാക്കി മാറ്റും.
ഉന്നതവിദ്യാഭ്യാസമേഖലയിലെ നിലവിലുള്ള ഗ്രോസ് എന്റോള്മെന്റ് അനുപാതം (ജിഇആര്) നിലവില് 26.3 ശതമാനമാണ്. അത് 2030 ആകുമ്പോള് അമ്പതുശതമാനം (50%) ആക്കി ഉയര്ത്തുകയാണ് പ്രഖ്യാപിതലക്ഷ്യം. ഉന്നതവിദ്യാഭ്യാസമണ്ഡലത്തിന്റെ മുഖച്ഛായതന്നെ മാറ്റി ലിബറല് ആര്ട്ട് (Liberal Art) സിസ്റ്റത്തിലേക്ക് മാറും. പാഠ്യപദ്ധതി കൂടുതല് അയവുള്ളതാക്കും. ഡിഗ്രിതലപഠനം രണ്ടുതരത്തില് ഉണ്ടാവും. മൂന്നുവര്ഷത്തെ കോഴ്സും നാലുവര്ഷത്തെ കോഴ്സും ഉണ്ടാവും. ഡിഗ്രിതലത്തില് മള്ട്ടിപ്പിള് എന്ട്രി, മള്ട്ടിപ്പിള് എക്സിറ്റ് സമ്പ്രദായം വരും. ഒന്നാം വര്ഷം കഴിഞ്ഞ് ഡിപ്ലോമ നേടി പുറത്തുപോകാം. രണ്ടാവര്ഷം കഴിഞ്ഞ് പോകുന്നവര്ക്ക് അഡ്വാന്സ്ഡ് ഡിപ്ലോമ ലഭിക്കും. മൂന്നാംവര്ഷം പൂര്ത്തിയാകുന്നവര്ക്ക് ഡിഗ്രി ലഭിക്കും. നാലുവര്ഷമുള്ള ഡിഗ്രിപഠനം പൂര്ണ്ണമായും മള്ട്ടിഡിസിപ്ലിനറിയായിരിക്കും. നാലാംവര്ഷം ഗവേഷണ ആഭിമുഖ്യം വളര്ത്തുന്നതിന് ഊന്നല് നല്കും. നിലവിലെ എം.ഫില്(M.Phil) പ്രോഗ്രാം നിര്ത്തലാക്കും. പോസ്റ്റ് ഗ്രാജുവേറ്റ് തലത്തില് ഒരു വര്ഷം ഉള്ളപഠനവും രണ്ടുവര്ഷത്തെ പഠനവും ഉണ്ടാവും. മൂന്നുവര്ഷഡിഗ്രി കഴിഞ്ഞവര്ക്ക് രണ്ടുവര്ഷവും നാലുവര്ഷത്തെ റിസര്ച്ച് ഡിഗ്രി കഴിഞ്ഞവര്ക്ക് ഒരു വര്ഷവും കൊണ്ട് പോസ്റ്റ് ഗ്രാജുവേറ്റ് ഡിഗ്രി എടുക്കാന് കഴിയും. നാലുവര്ഷത്തെ റിസര്ച്ച് ഡിഗ്രി എടുത്തവര്ക്ക് പി.എച്ച്.ഡിയ്ക്ക് നേരിട്ട് ചേരാന് കഴിയും. മൂന്നുവര്ഷത്തെ ഡിഗ്രിപഠനം നടത്തിയവര്ക്ക് രണ്ടുവര്ഷത്തെ മാസ്റ്റര് ഡിഗ്രി കഴിഞ്ഞേ ഗവേഷണത്തിന് ചേരാന് കഴിയൂ. മാത്രമല്ല ഉന്നതവിദ്യാഭ്യാസരംഗത്ത് ഗുണനിലവാരം ഉറപ്പിക്കാന് ഐ.ഐ.ടി മാതൃകയില് മള്ട്ടി ഡിസിപ്ലിനറി എഡുക്കേഷന് ആന്റ് റിസര്ച്ച് യൂണിവേഴ്സിറ്റികള് (MERU) രാജ്യമെമ്പാടും ആരംഭിക്കും. ലോകനിലവാരത്തിലുള്ള ഗവേഷണം ഉറപ്പാക്കുന്നതിനാണ് ഇത്തരം സര്വ്വകലാശാലകള്. അതുപോലെ മോഡല് മള്ട്ടിഡിസിപ്ലിനറി കോളേജുകളും രാജ്യവ്യാപകമായി സ്ഥാപിക്കും.
ഉന്നതവിദ്യാഭ്യാസരംഗത്ത് തുല്യതയും സാമൂഹ്യനീതിയും എല്ലാവിഭാഗത്തെയും ഉള്ക്കൊള്ളുന്നതിനുമുള്ള ശ്രമങ്ങള് ഉണ്ടാവും. നിലവില് വരേണ്യവിഭാഗത്തിനാണ് നിലവാരമുള്ള ഉന്നതവിദ്യാഭ്യാസ സ്ഥാപനങ്ങളില് പഠിക്കാന് അവസരം ലഭിക്കുന്നത്. പുതിയ ദേശീയ നയപ്രകാരം, സാമൂഹികമായും സാമ്പത്തികമായും പിന്നാക്കം നില്ക്കുന്ന വിഭാഗങ്ങള്ക്ക് മതിയായ പ്രാതിനിധ്യം എല്ലാ ഉന്നത വിദ്യാഭ്യാസസ്ഥാപനങ്ങളിലും ലഭിക്കും. അത്തരം വിഭാഗങ്ങളെ സഹായിക്കുന്നതിന് വിവിധ പദ്ധതികള് ഉണ്ട്. ഒപ്പം കൂടുതല് ഉന്നതവിദ്യാഭ്യാസസ്ഥാപനങ്ങള് ജില്ലാതലത്തിലും പ്രത്യേക വിദ്യാഭ്യാസമേഖലകളിലും (SEZ) സ്ഥാപിക്കും. അടിസ്ഥാനജനവിഭാഗങ്ങള് ഈ സ്ഥാപനങ്ങളില് അഡ്മിഷന് എടുക്കുന്നു എന്ന് ഉറപ്പുവരുത്തും. വിവിധ ധനസഹായപദ്ധതികളും സ്കോളര്ഷിപ്പു പ്രോഗ്രാമുകളും കൂടെയുണ്ടാവും. ലിംഗസമത്വം ഉറപ്പാക്കുന്നതിനും കൂടുതല് ഫണ്ട് ലഭ്യമാക്കുന്നതിനും നടപടികള് ഉണ്ടാവും.
നിലവിലുള്ള ബി.എഡ്. പ്രോഗ്രാം നാലുവര്ഷമുള്ള ഇന്റഗ്രേറ്റഡ് ഡിഗ്രിയാക്കും. അതിനുവേണ്ടി മുകളില് സൂചിപ്പിച്ചതുപോലെ നിലവില് ബി.എഡ് മാത്രം നടത്തുന്ന കോളേജുകളെ മള്ട്ടിഡിസിപ്ലിനറി കോളേജുകളാക്കി പരിവര്ത്തനം ചെയ്യും. 2025 ആകുമ്പോള് നിലവിലെ ബി.എഡ്. പഠനം പൂര്ണ്ണമായും നാലുവര്ഷത്തെ ഇന്റഗ്രേറ്റഡ് കോഴ്സായി മാറും. സാങ്കേതിക വിദ്യാഭ്യാസവും തൊഴിലധിഷ്ഠിത വിദ്യാഭ്യാസവും ഉന്നത വിദ്യാഭ്യാസത്തിന്റെ സമഗ്രപദ്ധതിയില്പ്പെടും. ദേശീയ വിദ്യാഭ്യാസനയത്തിന്റെ ഏറ്റവും കാതലായ ഭാഗമാണ് ഗവേഷണത്തിന് നല്കുന്ന പ്രാധാന്യം. നാഷണല് റിസര്ച്ച് ഫൗണ്ടേഷന് (NRF) ഇതിനായി സ്ഥാപിക്കും. ഗവേഷണത്തിന് ധനസഹായം നല്കാനാണ് ഈ പദ്ധതി. ശാസ്ത്രം, സാമൂഹ്യശാസ്ത്രം, സാങ്കേതികരംഗം, കല തുടങ്ങി എല്ലാ ഗവേഷണ പ്രവര്ത്തനങ്ങള്ക്കും ഫണ്ട് നല്കുന്നത് എന്.ആര്.എഫ് ആയിരിക്കും. ഉന്നതവിദ്യാഭ്യാസ പദ്ധതികളെയും സ്ഥാപനങ്ങളെയും നിയന്ത്രിക്കാന് നാഷണല് ഹയര് എഡ്യുക്കേഷന് റെഗുലേറ്ററി അതോറിറ്റി (NHERA) രൂപീകരിക്കും. ഉന്നതവിദ്യാഭ്യാസമേഖലയിലെ കച്ചവടവല്ക്കരണം പൂര്ണ്ണമായും അവസാനിപ്പിക്കും. വിദൂര വിദ്യാഭ്യാസത്തിനും അനൗപചാരിക വിദ്യാഭ്യാസത്തിനും പ്രത്യേക ഊന്നല് ദേശീയ വിദ്യാഭ്യാസനയം നല്കുന്നുണ്ട്.
ദേശീയ വിദ്യാഭ്യാസനയത്തെ നിലവിലുണ്ടായിരുന്ന വിദ്യാഭ്യാസനയങ്ങളില് നിന്ന് വിഭിന്നമാക്കുന്നത് അത് വിദ്യാഭ്യാസ മണ്ഡലത്തില് സമഗ്രമായ മാറ്റം ആസൂത്രണം ചെയ്യുന്നു എന്നതുകൊണ്ടാണ്. രാജ്യത്തിന്റെ വിവിധ പ്രദേശങ്ങള് ഇന്നുംവിദ്യാഭ്യാസപരമായി പിന്നിലാണ്. വലിയൊരുവിഭാഗം ജനങ്ങളും ഉന്നത വിദ്യാഭ്യാസ പദ്ധതിയ്ക്ക് പുറത്താണ്. വിദ്യാഭ്യാസരംഗത്ത് സാമൂഹ്യനീതി കൈവരിക്കുന്നതില് രാജ്യം വന്പരാജയമാണ്. ഈ അവസ്ഥയെ മാറ്റാനാണ് പുതിയ നയം ലക്ഷ്യമാക്കുന്നത്. മാത്രമല്ല, വലിയൊരു വിദ്യാഭ്യാസ വിപ്ലവത്തിന് തുടക്കം കുറിക്കുകയാണ്. നിലവാരമുള്ളതും തുല്യത ഉറപ്പാക്കുന്നതും സാമൂഹ്യനീതി അടിസ്ഥാനപ്പെടുത്തിയും, ശാസ്ത്രബോധം വളര്ത്തി, സാമ്പത്തികവികസനത്തിന് കരുത്തുപകരുന്നു, ദേശീയ ഐക്യത്തെയും, രാഷ്ട്രപുരോഗതിയെയും ഉറപ്പാക്കുന്നു, സാംസ്കാരിക പൈതൃകത്തെ മാനിക്കുന്നു. പുതിയ ദേശീയ വിദ്യാഭ്യാസനയം യുവതലമുറയുടെ സമഗ്രവികസനം ഉറപ്പാക്കുക മാത്രമല്ല അവരുടെ വാസനകളെ വളര്ത്തി, നൈപുണ്യവികസനം പ്രാപ്തമാക്കി അവരെ ആത്മവിശ്വാസമുള്ളവരാക്കി മാറ്റുമെന്നതില് സംശയമില്ല.
ദേശീയവിദ്യാഭ്യാസനയം 2020 ന്റെ പ്രധാന സവിശേഷതകള്
1. മൂന്നുവയസ്സു മുതല് പതിനെട്ടുവയസ്സുവരെയുള്ള വിദ്യാര്ത്ഥികള്ക്ക് സാര്വ്വത്രികവും നിലവാരമുള്ളതുമായ വിദ്യാഭ്യാസം നിര്ബ്ബന്ധിതവും സൗജന്യവുമായിരിക്കും. സ്കൂള് വിദ്യാഭ്യാസ ക്രമത്തില് സമഗ്രമായ മാറ്റം.
2. മൂന്നുവയസ്സുമുതല് ആറുവയസ്സുവരെയുള്ള കുട്ടികള്ക്ക് സൗജന്യ പ്രീ-സ്കൂള് വിദ്യാഭ്യാസം ഉറപ്പാക്കും.
3. ജി.ഡി.പിയുടെ ആറുശതമാനം (6%) വിദ്യാഭ്യാസമേഖലക്ക് മാറ്റിവയ്ക്കും.
4. സാമൂഹികവും സാമ്പത്തികവുമായി പിന്നാക്കം നില്ക്കുന്ന കുട്ടികള്ക്ക് പ്രത്യേക പരിരക്ഷാ സ്കോളര്ഷിപ്പുകള്.
5. വിദ്യാഭ്യാസപരമായി പിന്നാക്കം നില്ക്കുന്ന മേഖലകളില് പ്രത്യേക വിദ്യാഭ്യാസ സോണുകള് (Special Education Zone) സൃഷ്ടിക്കും.
6. തൊഴിലധിഷ്ഠിത വിദ്യാഭ്യാസത്തിനും നൈപുണ്യവികസനത്തിനും ആറാം ക്ലാസുമുതല് ഊന്നല്.
7. മാതൃഭാഷാ പഠനത്തിന് പ്രത്യേക ഊന്നല്. അഞ്ചാം ക്ലാസുവരെ മാതൃഭാഷയില് പഠനം.
8. വിദ്യാലയങ്ങളില് നിന്ന് കുട്ടികള് കൊഴിഞ്ഞുപോകാതിരിക്കുന്നതിനുള്ള പ്രത്യേക കരുതല്. ഗ്രേസ് എന്റോള്മെന്റ് റേറ്റ് (GER നൂറുശതമാന (100%)മായി ഉയര്ത്തും. ഉന്നതവിദ്യാഭ്യാസ രംഗത്ത് അത് അമ്പത് (50%) ശതമാനമായിരിക്കും.
9. ഡിഗ്രിപഠനം പുനര്ക്രമീകരിക്കും. മൂന്നും നാലും വര്ഷം വീതം ഉള്ള രണ്ടുതരം ഡിഗ്രികോഴ്സുകള്.
10. ഗവേഷണത്തിന് ഊന്നല് നല്കാന് പ്രത്യേക സര്വ്വകലാശാലകള്. കൂടാതെ ദിശാബോധം നല്കാന് നാഷണല് റിസര്ച്ച് ഫൗണ്ടേഷന് (NRF)
11. ഉന്നതവിദ്യാഭ്യാസമേഖലയില് നയരൂപീകരണത്തിന് പുതിയ റെഗുലേറ്ററി സമിതികള്.
12. നിലവാരമുള്ള വിദ്യാഭ്യാസം എല്ലാ വിദ്യാര്ത്ഥികളുടെയും മൗലിക അവകാശമാക്കുന്നതിനുള്ള വ്യവസ്ഥകള്.
13. നിര്ബ്ബന്ധിത സൗജന്യ വിദ്യാഭ്യാസം നിലവിലെ 6-14 വയസ്സിന് ഇടയിലുള്ള കുട്ടികള്ക്കാണെങ്കില് പുതിയ നയം 3-18 വയസ്സിനു ഇടയിലുള്ള കുട്ടി കള്ക്കായി വിപുലീകരിച്ചു.
14. സാമൂഹ്യനീതിയും തുല്യതയും നിലവാരവും ഉറപ്പാക്കുന്നതിനുള്ള പദ്ധതികള്.
15. പട്ടികജാതി പട്ടികവര്ഗ്ഗ വിഭാഗങ്ങള്, പിന്നാക്കവിഭാഗങ്ങള്, ന്യൂനപക്ഷങ്ങള്, അംഗപരിമിതര്, ചേരിനിവാസികള് തുടങ്ങിയ വിഭാഗങ്ങള്ക്ക് നിലവാരമുള്ള വിദ്യാഭ്യാസം നല്കുന്നതിനുള്ള ഊന്നല്.
16. സാങ്കേതിക തൊഴിലധിഷ്ഠിത വിദ്യാഭ്യാസത്തെ പൊതുവിദ്യാഭ്യാസ സ്ഥാപനങ്ങളുമായി ഏകോപിപ്പിക്കാനുള്ള പദ്ധതികള്.
17. അദ്ധ്യാപക പരിശീലനത്തിന് പ്രത്യേക പരിഗണന.
18. പ്രാദേശിക ഭാഷകള്, കല, സംസ്കാരം ഇവ പോഷിപ്പിക്കുന്നതിനുള്ള പദ്ധതികള്.
19. നിലവാരമുള്ള വിദ്യാഭ്യാസം ഉറപ്പാക്കുന്നതിനോടൊപ്പം കച്ചവടവല്ക്കരണം ഒഴിവാക്കാന് ഫീസ് നിയന്ത്രിക്കുന്നതിനുള്ള വ്യവസ്ഥയും റെഗുലേറ്ററി ബോഡിയും.
20. എം.ഫില് കോഴ്സ് നിര്ത്തലാക്കി.
21. മാനവവിഭവശേഷി വികസനമന്ത്രാലയത്തിന്റെ പേര് വിദ്യാഭ്യാസ മന്ത്രാലയം എന്നാക്കി പുനര്നാമകരണം ചെയ്തു.
22. മള്ട്ടിപ്പിള് എന്ട്രി, മള്ട്ടിപ്പിള് എക്സിറ്റ്(Multiple entry, Multiple exit) സമ്പ്രദായം ഡിഗ്രി തലത്തില് നടപ്പാക്കും.
23. ലിബറല് ആര്ട്ട് എഡ്യുക്കേഷന് ഊന്നല്
24. ലോകനിലവാരത്തിലുള്ള ഐഐടി മാതൃകയിലുള്ള റിസര്ച്ച് യൂണിവേഴ്സിറ്റികള് (MERU) രാജ്യമെമ്പാടും നിലവില്വരും.
25. ഉന്നതവിദ്യാഭ്യാസരംഗത്തെ നിയന്ത്രിക്കാന് ഹയര് എഡ്യുക്കേഷന് റഗുലേറ്ററി അതോറിറ്റി (HERA).
26. ബി.എഡ്. പഠനം 2025നകം നാലുവര്ഷത്തെ ഇന്റഗ്രേറ്റഡ് ഡിഗ്രിയുടെ ഭാഗമാക്കും.
27. അദ്ധ്യാപകരുടെ നിലവാരം ഉയര്ത്തുന്നതിന് വിവിധ പദ്ധതികള്.
28. മള്ട്ടി ഡിസിപ്ലിനറി കോഴ്സുകള്ക്ക് പ്രത്യേക ഊന്നല്. ശാസ്ത്ര അവബോധവും സാംസ്കാരിക മൂല്യങ്ങളുടെ സംരക്ഷണവും അത് ഉറപ്പാക്കും.
ചില ആശങ്കകള്
ഒരു വിദ്യാഭ്യാസനയത്തെ കേവലം നയത്തിന്റെ തലത്തിലല്ല മറിച്ച് അത് നടപ്പാക്കി കഴിഞ്ഞതിനുശേഷമാണ് വിലയിരുത്തപ്പെടേണ്ടത്. 2020 ലെ നയം സൂക്ഷ്മമായി പരിശോധിക്കുമ്പോള് ഉന്നത വിദ്യാഭ്യാസരംഗത്തെ പരിഷ്കരണങ്ങള് അമേരിക്കന് മാതൃകയെ ആശ്രയിച്ചാണ് എന്ന് പറയേണ്ടിവരും. ഇന്ത്യന് നോളേജ് സിസ്റ്റം പ്രോത്സാഹിപ്പിച്ചുകാണുന്നില്ല. നിലവിലെ ഇന്ത്യന് സര്വ്വകലാശാലാവിദ്യാഭ്യാസം യുവാക്കള്ക്ക് ആത്മവിശ്വാസം പകര്ന്നു നല്കുന്ന ഒന്നല്ല. ലക്ഷക്കണക്കിന് ഇടത്തരക്കാര് തങ്ങളുടെ കുട്ടികളെ അമേരിക്ക, ആസ്ട്രേലിയ, കാനഡ, ബ്രിട്ടണ് തുടങ്ങിയ രാജ്യങ്ങളില് വിട്ട് പഠിപ്പിക്കുന്ന സാഹചര്യം ഇന്ന് ഉണ്ട്. പുതിയ നയം പ്രകാരം സ്കൂള് വിദ്യാഭ്യാസപദ്ധതിയില് ഉണ്ടാകുന്നതുപോലുള്ള അഴിച്ചു പണിയല്ല ഉന്നതവിദ്യാഭ്യാസരംഗത്ത് നടപ്പാക്കുന്നത്. ലിബറല് ആര്ട്ട് എഡ്യുക്കേഷന്(Liberal Art Education) എന്ന അമേരിക്കന് ഫോര്മുല ഇന്ത്യന് സാഹചര്യത്തില് ഗുണം ചെയ്യുമോ എന്നതില് സംശയമുണ്ട്. ഏറെ രാഷ്ട്രീയവല്ക്കരിച്ച ഇന്ത്യന് സര്വ്വകലാശാലകളില് മള്ട്ടിപ്പിള് എന്ട്രിയും (Multiple entry) മള്ട്ടിപ്പിള് എക്സിറ്റും(Multiple Exit) ഗുണം ചെയ്യുമെന്ന് ഈ ലേഖകന് വിശ്വസിക്കുന്നില്ല. ഒന്നും രണ്ടും വര്ഷങ്ങള് പഠിച്ച് പുറത്തുപോയവര് കുറേ വര്ഷങ്ങള്ക്കുശേഷം തിരിച്ച് ക്യാമ്പസില് വന്ന് പഠിക്കുന്ന സംവിധാനം ഏറെ രാഷ്ട്രീയവല്ക്കരിച്ച കേരളത്തിലെ കാമ്പസുകള്ക്ക് ഗുണം ചെയ്യാന് വഴിയില്ല. അതുപോലെ ലിബറല് ആര്ട്ട് വിദ്യാഭ്യാസ രീതിയുടെ ഭാഗമായി ‘ഇന്റര് ഡിസിപ്ലിനറി’ – ‘മള്ട്ടി ഡിസിപ്ലിനറി’ കോഴ്സുകള് ചിട്ടപ്പെടുത്തുമ്പോള് ഒരു വിഷയത്തിലുള്ള പ്രാവീണ്യം നഷ്ടമാകും.
ഫിസിക്സിനൊപ്പം സംഗീതവും കെമിസ്ട്രിയോടൊപ്പം ഹിസ്റ്ററിയും എക്കണോമിക്സും നൃത്തവും ഒക്കെ പഠിക്കാന് അവസരം നല്കുന്നത് ‘ലിബറല് ആര്ട്ട്’ വിദ്യാഭ്യാസത്തിന്റെ ഭാഗമാണ്. അമേരിക്കയില് ചില സ്ഥാപനങ്ങളില് ഇതൊക്കെ ഉണ്ടെങ്കിലും ലോകനിലവാരമുള്ള ജപ്പാന്, സിംഗപ്പൂര്, മറ്റു യൂറോപ്യന് സര്വ്വകലാശാലകളൊക്കെ അതാതുവിഷയങ്ങളില് ആഴത്തിലുള്ള പഠനവും സ്പെഷ്യലൈസേഷനും പ്രോത്സാഹിപ്പിക്കുന്ന നയമാണ് സ്വീകരിച്ചിരിക്കുന്നത്. ഇന്ത്യയില് മള്ട്ടിഡിസിപ്ലിനറി സമ്പ്രദായം സാര്വ്വത്രികമായി നടപ്പാക്കിയാല് പുറത്തിറങ്ങുന്ന വിദ്യാര്ത്ഥികള്ക്ക് ഒന്നിലും ആഴത്തിലുള്ള അറിവുണ്ടാകണമെന്നില്ല. ഡിഗ്രിതലത്തില് ത്രിമെയിന് (Threemain) സമ്പ്രദായം ഇന്നു നിലവിലുണ്ട്. അത് ഫലത്തില് പോസ്റ്റ് ഗ്രാജുവേഷനുപോകുമ്പോള് സിംഗിള് മെയിന് പഠിച്ചവരെപോലെ വിജയംവരിക്കാന് സഹായകമല്ല എന്ന് ഇതിനകം ഇന്ത്യയില് തെളിയിക്കപ്പെട്ടതാണ്.
ദേശീയ വിദ്യാഭ്യാസനയം 2020-ല് സര്വ്വകലാശാല വിദ്യാഭ്യാസത്തെക്കുറിച്ച് പറയുന്നിടത്ത് ഈ പരിഷ്കരണങ്ങളുടെ ലക്ഷ്യം അമേരിക്കയിലെ ഐവി ലീഗ് (Ivy League) സര്വ്വകലാശാലകളെ പോലെ ലോകനിലവാരത്തിലേയ്ക്ക് ഉയരണം എന്നു പറയുന്നുണ്ട്. അമേരിക്കയിലെ ഏറ്റവും പ്രശസ്തമായ Harvard University,Princeton University, Yale University, Brown University, Columbia University, Cornell University, Pennsylvania University തുടങ്ങിയവയാണ് ഐവി ലീഗ് സര്വ്വകലാശാലകളില്പ്പെടുന്നത്. ദേശീയനയത്തില് അമേരിക്കന് മാതൃക ഉയര്ത്തി കാണിക്കുന്നതില് ഈ ലേഖകന് വിമര്ശനമുണ്ട്. ലോകത്തിലെ ആദ്യ സര്വ്വകലാശാലകള് ആരംഭിച്ച നാടാണ് ഭാരതം. നമ്മുടെ ലക്ഷ്യം ലോകനിലവാരം തന്നെയാകണം. പക്ഷെ അനുകരണമാകരുത്. ഐവി ലീഗ് സര്വ്വകലാശാലകള്ക്കും മുകളില് ലക്ഷ്യം വെയ്ക്കുന്നതില് തെറ്റില്ലല്ലോ?
ദേശീയ വിദ്യാഭ്യാസനയത്തിലെ സ്കൂള് വിദ്യാഭ്യാസ പരിഷ്കരണങ്ങള് കൂടുതല് ഗുണകരമായിതോന്നുന്നുണ്ട്. സര്വ്വകലാശാലതലത്തില് ഉള്ളതുപോലെയുള്ള ആശങ്ക സ്കൂള് വിദ്യാഭ്യാസപരിഷ്കരണത്തില് ഇല്ല. എന്നിരുന്നാലും ഈ പരിഷ്കരണങ്ങള് പൂര്ണ്ണമായൂം നടപ്പാക്കുന്നതിന് വമ്പിച്ചസാമ്പത്തിക പിന്തുണവേണം. നിലവില് തന്നെ ലക്ഷക്കണക്കിന് അദ്ധ്യാപക ഒഴിവുകള് നികത്താതെയാണ് കൊണ്ടുപോകുന്നത്. ഭൗതിക സാഹചര്യങ്ങള് ഏറെ മെച്ചപ്പെടുത്തേണ്ടതുണ്ട്. സര്ക്കാര് പൊതുവിദ്യാലയങ്ങള് നിലവാരത്തില് ഏറെ പിന്നിലാണ്. രണ്ടുതരം പൗരന്മാരെ സൃഷ്ടിക്കുന്ന നിലവിലെ വിദ്യാഭ്യാസ സാഹചര്യം ഇനിയും തുടരാന് കഴിയില്ല. ഇംഗ്ലീഷ് മീഡിയത്തിനുപുറത്ത് പഠിക്കുന്ന ഗ്രാമീണ വിദ്യാര്ത്ഥികള്ക്ക് പൊതു മത്സരപരീക്ഷയിലൂടെ ഉയര്ന്ന സ്ഥാനങ്ങളിലേയ്ക്ക് കടന്നുവരാന് കഴിയാത്ത സാഹചര്യം ഇന്ന് ഉണ്ട്. ഇനിയും ഈ വിവേചനം തുടരാന് പാടില്ല. നമ്മുടെ ഭരണഘടന പ്രകാരം (അനുച്ഛേദം – ഒന്ന്) പ്രകാരം നമ്മുടെ രാജ്യത്തിന് രണ്ട് നാമങ്ങളുണ്ട്. ”ഇന്ത്യ, ഭാരതം”. യഥാര്ത്ഥത്തില് ഇന്ത്യന് വിദ്യാഭ്യാസരംഗത്ത് ഈ വ്യത്യാസം കാണാം. പ്രാദേശിക മീഡിയത്തില് പഠിക്കുന്ന ‘ഭാരതീയരും’ ഇംഗ്ലീഷ് മീഡിയത്തില് രാജ്യത്തിന് അകത്തും പുറത്തും പഠിക്കുന്ന ”ഇന്ത്യക്കാരും”. അധികാര കേന്ദ്രങ്ങളിലും ഉയര്ന്ന വിദ്യാഭ്യാസസ്ഥാപനങ്ങളിലും വിശേഷിച്ച് ഐഐടി, ഐഐഎം, എഐഎംഎസ് തുടങ്ങിയ സ്ഥാപനങ്ങളില് മത്സരപരീക്ഷയിലൂടെ കടന്നുവരാന് പ്രാദേശിക മീഡിയത്തില് പഠിക്കുന്ന ‘ഭാരതീയ’രായ കുട്ടികള്ക്ക് ഏറെ പ്രയാസമുണ്ട്. പുതിയ വിദ്യാഭ്യാസനയം നടപ്പാക്കുമ്പോള് ഈ ‘ഇന്ത്യക്കാരും’ ‘ഭാരതീയരും’ തമ്മിലുള്ള വ്യത്യാസം ഇല്ലതാകും എന്ന് പ്രതീക്ഷിക്കുകയാണ്. മത്സരാധിഷ്ഠിതവ്യവസ്ഥയില് നല്ല പരിശീലനം ലഭിക്കുന്ന കുട്ടികള്ക്കും, ഒന്നാം ക്ലാസുമുതല് നല്ല നിലവാരമുള്ള വിദ്യാഭ്യാസം ലഭിച്ച കുട്ടികള്ക്കുമാണ് വിജയം നേടി മുന്നില് വരാന് കഴിയുന്നത് എന്നു കൂടെ ഓര്ക്കേണ്ടതുണ്ട്. ‘ലിബറല് ആര്ട്ട് വ്യവസ്ഥ’ നമ്മുടെ ഉന്നത വിദ്യാഭ്യാസത്തെ മുന്നോട്ട് തന്നെ നയിക്കും എന്ന് ആശിക്കുകയാണ്. ദേശീയ വിദ്യാഭ്യാസനയത്തില് സ്കൂള് തലത്തിലുള്ള ദേശീയ വീക്ഷണം, സര്വ്വകലാശാലതലത്തില് കാണുന്നില്ല എന്നതും എടുത്തു പറയേണ്ടതുണ്ട്. ബന്ധപ്പെട്ടവര് ഇതുമായി ബന്ധപ്പെട്ട് കര്മ്മപദ്ധതികള് ആവിഷ്കരിക്കുമ്പോള് ഇക്കാര്യങ്ങള് ശ്രദ്ധിക്കും എന്നു പ്രതീക്ഷിക്കുകയാണ്. എടുത്തുപറയേണ്ട മറ്റൊരു വസ്തുത ദേശീയ വിദ്യാഭ്യാസനയത്തില് ഒരു ”ബ്യൂറോക്രാറ്റിക് ടച്ച്” നിറഞ്ഞുനില്ക്കുന്നത് കാണാം. ‘ദേശീയതയെ’ ‘ബ്യൂറോക്രസി’ കവര്ന്നെടുത്തു എന്നും തോന്നാം.
ചുരുക്കത്തില് 2020-ലെ ദേശീയ വിദ്യാഭ്യാസനയം ഭാരതത്തിന്റെ വിദ്യാഭ്യാസ പദ്ധതികളെ സമഗ്രമായി പരിഷ്കരിച്ച് ലോകനിലവാരത്തിലേക്ക് നമ്മുടെ വിദ്യാഭ്യാസ സ്ഥാപനങ്ങളെ കൊണ്ടുപോകാന് പ്രതിജ്ഞാബദ്ധമാണ്. സമയബന്ധിതമായി പരിഷ്കാരത്തെ ആകര്ഷകമാക്കി മുന്പദ്ധതികളില് നിന്നു വിഭിന്നമായി ഓരോ വിദ്യാര്ത്ഥിയ്ക്കും നിലവാരമുള്ള വിദ്യാഭ്യാസം ലഭ്യമാക്കി എന്ന് ഉറപ്പുവരുത്തുന്നതിനുള്ള സംവിധാനങ്ങളുണ്ടാവും. കൂടാതെ സാമൂഹ്യനീതിയിലധിഷ്ഠിതമായ പരിഷ്കാരങ്ങളാണ് നടപ്പാക്കുന്നത്. 21-ാം നൂറ്റാണ്ടിലെ വെല്ലുവിളികളെ അതിജീവിക്കുന്നതിനും സാദ്ധ്യതകളെ ഉപയോഗപ്പെടുത്തുന്നതിനും ഈ വിദ്യാഭ്യാസനയം പദ്ധതികള് ആവിഷ്കരിച്ചിട്ടുണ്ട്. ജിഡിപിയുടെ ആറുശതമാനം (6%) വിദ്യാഭ്യാസത്തിനായി മാറ്റിവയ്ക്കുന്നതോടെ ഗവേഷണ മേഖലയില് വമ്പിച്ച കുതിപ്പ് ഉണ്ടാകും. വിദ്യാഭ്യാസപരമായി പിന്നാക്കം നില്ക്കുന്ന പ്രദേശങ്ങളും ജനവിഭാഗങ്ങളും പ്രത്യേകം പരിഗണിക്കപ്പെടും. ഉന്നതവിദ്യാഭ്യാസ മണ്ഡലവും സമഗ്രമായ പരിഷ്കരണങ്ങള്ക്ക് വിധേയമാകും. മുകളില് സൂചിപ്പിച്ചപ്പോലെ ഗവേണത്തില് ഊന്നല് നല്കുന്ന സര്വ്വകലാശാലകള്, മോഡല് കോളേജുകള് എന്നിവ പുതിയ ചുവടുവയ്പാണ്. രാജ്യത്തെ പരംവൈഭവത്തിലേയ്ക്ക് എത്തിക്കാന് ഈ വിദ്യാഭ്യാസനയത്തിന് കഴിയും. ആത്മനിര്ഭര് ഭാരതത്തിലേയ്ക്കുള്ള ചവിട്ടുപടികൂടിയാണ് ഈ വിദ്യാഭ്യാസനയം.
(ഡീന്, സ്കൂള് ഓഫ് ഗ്ലോബല് സ്റ്റഡീസ്, സെന്ട്രല് യൂണിവേഴ്സിറ്റി ഓഫ് കേരള, കാസര്കോട്)