അഖിലേഷ് യാദവിന്റെ രാമരാജ്യസ്വപ്നം

‘സ്വപ്നം ചിലര്‍ക്ക് ചിലകാലമെത്തിടും’ എന്ന് തുഞ്ചത്തെഴുത്തച്ഛന്‍ പറഞ്ഞിട്ടുണ്ട്. പുലര്‍കാലത്ത് കാണുന്ന സ്വപ്‌നം ഫലിക്കുമെന്നാണ് ചിലരുടെ വിശ്വാസം. അക്കൂട്ടത്തിലൊരാളാണ് സമാജ്‌വാദി പാര്‍ട്ടി അദ്ധ്യക്ഷനും മുന്‍ ഉത്തര്‍പ്രദേശ് മുഖ്യമന്ത്രിയുമായ അഖിലേഷ് യാദവ്. അദ്ദേഹം നിത്യേന പുലര്‍കാലത്ത് ഭഗവാന്‍ കൃഷ്ണനെ സ്വപ്‌നം കാണുകയാണ്. സ്വപ്‌നത്തില്‍ വന്നു കൃഷ്ണന്‍ അഖിലേഷിന് ചില ഉപദേശങ്ങള്‍ നല്‍കിയിട്ടുണ്ട്. കുരുക്ഷേത്രഭൂമിയില്‍ വെച്ച് അര്‍ജുനന് നല്‍കിയ ഉപദേശം പോലുള്ള വേദാന്തതത്വങ്ങളൊന്നുമല്ല അഖിലേഷിന് കിട്ടിയത്, പകരം തനി സോഷ്യലിസമാണ്. ഉത്തര്‍പ്രദേശിനെ രാമരാജ്യമാക്കി മാറ്റണമെന്നും അതിനുള്ളവഴി സമാജ്‌വാദി (സോഷ്യലിസം) ആണെന്നുമാണ് ഉപദേശത്തിന്റെ രത്‌നച്ചുരുക്കം. സോഷ്യലിസം നടപ്പാക്കാനുള്ള ചുമതല കൃഷ്ണന്‍ ഏല്‍പിക്കുന്നത് അഖിലേഷ് യാദവിനെയാണ്. രണ്ടുപേരും യാദവന്മാരായതിനാല്‍ ഇതില്‍ കുറ്റമൊന്നും പറയാന്‍ പറ്റില്ല. അഖിലേഷ് തിരഞ്ഞെടുപ്പില്‍ വിജയിക്കുന്നതോടെ സോഷ്യലിസം (സമാജ്‌വാദി) സ്ഥാപിക്കപ്പെടും. അതോടെ യു.പി. രാമരാജ്യമായി മാറും. ഇതാണ് താന്‍ കണ്ട സ്വപ്‌നമെന്ന് അഖിലേഷ് തന്നെ ഒരു പൊതുയോഗത്തില്‍ പരസ്യമായി പറഞ്ഞതാണ്. ഒരു ബി.ജെ.പി എം.എല്‍.എയെ സമാജ്‌വാദി പാര്‍ട്ടിയില്‍ ചേര്‍ക്കുന്ന ചടങ്ങിലാണ് അഖിലേഷ് ഇക്കാര്യം പറഞ്ഞത്.

ബീഹാറില്‍ ഇതുപോലെ സ്വപ്‌നം കണ്ട ഒരു യാദവന്‍ ഉണ്ട്. മോദിയെ ദല്‍ഹിയില്‍ നിന്നും അടിച്ചോടിക്കാന്‍ തനിക്കാണ് നിയോഗമുള്ളത് എന്ന സ്വപ്‌ന വിവരം പരസ്യമായി പ്രഖ്യാപിച്ച ലാലുപ്രസാദ് യാദവ്. പ്രതിപക്ഷത്തെ ഈ കിരീടമില്ലാത്ത രാജാവിനെ പിന്നെ നാം കണ്ടത് പാറ്റ്‌നയിലെ ജയിലിലാണ്. കാലിത്തീറ്റയില്‍ കയ്യിട്ടുവാരിയതിനാണ് അകത്തായത്. ദീര്‍ഘകാലത്തെ ജയില്‍ വാസം കഴിഞ്ഞ് കഫം തുപ്പി ചികിത്സയ്ക്കായി ജയിലില്‍ നിന്നും പുറത്തുവന്ന ആ യാദവന്‍ ഗോശാപം പേറി ശിഷ്ടകാലം കഴിയ്ക്കുകയാണ്. അയോദ്ധ്യയിലെ കാര്‍സേവകരുടെ രക്തക്കറ പുരണ്ട മുലായംസിംഗ് യാദവന്‍ അയോദ്ധ്യയില്‍ പള്ളി പണിയുമെന്നു ശപഥം ചെയ്ത ആളായിരുന്നു. അദ്ദേഹത്തിന്റെ അവസാനകാലം ദുരന്തപൂര്‍ണ്ണമായിരുന്നു. കാലം മാറിയെന്നു കണ്ട് തലയിലെ തുര്‍ക്കിത്തൊപ്പി കീശയിലിട്ട് സമാജ്‌വാദിയിലൂടെ രാമരാജ്യമുണ്ടാക്കുമെന്നു സ്വപ്‌നം കാണുന്ന അഖിലേഷ് യാദവന്റെ ഗതി എന്ത് എന്നത് അടുത്ത തിരഞ്ഞെടുപ്പില്‍ അറിയാം. കാണാന്‍ പോകുന്ന പൂരം പറഞ്ഞറിയിക്കണ്ടല്ലോ?