ഒരു വശത്ത് കുടുംബാസൂത്രണ നിയമങ്ങളെ കാറ്റില് പറത്തി ജനസംഖ്യ വര്ദ്ധിപ്പിക്കുക; മറുവശത്ത് കിട്ടാവുന്ന ക്ഷേമപെന്ഷനുകളെല്ലാം തലയെണ്ണി കീശയിലാക്കുക – ഈ തന്ത്രം ഇനി നടപ്പില്ല എന്നാണ് യു.പി. സര്ക്കാര് പറയുന്നത്. ആദിത്യനാഥ് സര്ക്കാര് ജനസംഖ്യ സംബന്ധിച്ച പുതിയ ഒരു നിയമം കൊണ്ടുവരാന് പോകുന്നു. രണ്ടില് കൂടുതല് കുട്ടികളുള്ളവര്ക്ക് ക്ഷേമപെന്ഷന് കിട്ടില്ല എന്നതാണ് ഈ ബില്ലിലെ ഒരു വ്യവസ്ഥ. യു.പി. സര്ക്കാരിന്റെ നിയമകാര്യ കമ്മീഷനാണ് ബില്ല് തയ്യാറാക്കി അവരുടെ വെബ്സൈറ്റില് പ്രദര്ശിപ്പിച്ചത്. ജനങ്ങളുടെ നിര്ദ്ദേശം തേടുകയും ചെയ്തു. 8500 പേര് നിര്ദ്ദേശങ്ങള് അയച്ചതില് 8200 പേരും ഈ വ്യവസ്ഥയെ പിന്തുണച്ചു. ബില്ലിന്റെ കരടും റിപ്പോര്ട്ടും കൂടി നിയമപാനലിന്റെ അദ്ധ്യക്ഷന് ജസ്റ്റിസ് ആദിത്യനാഥ് മിത്തല് മുഖ്യമന്ത്രിയ്ക്ക് സമര്പ്പിച്ചു. മന്ത്രിസഭയും നിയമസഭയും ഇത് അംഗീകരിച്ചാല് അത് നിയമമായി മാറും. ന്യൂനപക്ഷ പ്രീണന വീരന്മാരായ ‘മതേതര’ കക്ഷി നേതാക്കള് ഈ ബില്ലിനെതിരെ ബഹളംവെക്കും എന്നതില് സംശയമില്ല.