‘ജയ്ശ്രീരാം’ സവര്ണ്ണ ഹിന്ദുവിന്റെ പ്രതീകമാണെന്നു പ്രചരിപ്പിക്കുന്ന ഇടതുബുദ്ധിജീവികള് ബംഗാളിലെ കുച്ച് ബെഹാര്, അലിപുര്ദൗര് ജില്ലകളിലൊന്നു പോയി നോക്കണം. പകുതിയിലധികം ദളിത് വിഭാഗക്കാരാണ് ഈ ജില്ലകളില്. അവര് കൂട്ടമായി പങ്കെടുക്കുന്ന തിരഞ്ഞെടുപ്പുറാലികളില് മുഴങ്ങുന്നത് ‘ജയ്ശ്രീരാം’ മന്ത്രമാണ്. ബംഗാളിലെ ദളിത് വോട്ടുകളായിരുന്നു തൃണമൂലിന്റെയും സി.പി.എമ്മിന്റെയും മുഖ്യ അടിത്തറ. അതാണ് പ്രളയജലം പോലെ കുത്തിയൊലിച്ച് ബി.ജെ.പിയിലേക്കൊഴുകിയത്. 2019-ലെ ലോക്സഭാ തിരഞ്ഞെടുപ്പില് തന്നെ ഇതു പ്രകടമായി. ഇത്തവണ നിയമസഭാ തിരഞ്ഞെടുപ്പിലും അത് ആവര്ത്തിക്കാന് പോകുന്നു.
ജാതിയും സമുദായവും പറഞ്ഞ് ദളിതരെ മുഖ്യധാരയില് നിന്ന് അകറ്റിനിര്ത്തിയായിരുന്നു ഇടതന്മാര് അവരുടെ വോട്ടു നേടിയത്. നക്കാപിച്ച വാഗ്ദാനങ്ങള് നല്കി വോട്ടുവാങ്ങിയ ശേഷം അവഗണിക്കുന്നതായിരുന്നു രീതി. അവരെ ദേശീയ മുഖ്യധാരയിലേയ്ക്ക് അടുപ്പിക്കാന് ദേശഭക്തിയെ ഉപയോഗിക്കുകയാണ് ബി.ജെ.പി. ചെയ്തത്. രാജ്ബംഗ്ഷി ദളിത് വിഭാഗത്തിന്റെ പ്രധാന ആവശ്യം ഭാരതസേനയില് തങ്ങളുടെ പാരമ്പര്യത്തെ അനുസ്മരിപ്പിക്കുന്നവിധം നാരായണീ സേനാ റജിമെന്റ് വേണമെന്നായിരുന്നു. 16-ാം നൂറ്റാണ്ടില് ബംഗാളില് ഉണ്ടായിരുന്ന ദളിത് സൈന്യമായിരുന്നു നാരായണീ സേന. ഈ ആവശ്യം ബി.ജെ.പി. അംഗീകരിച്ചു. എന്നുമാത്രമല്ല നാരായണീ സേനയുടെ തലവനായിരുന്ന ചിലറായിയുടെ പേരില് ഈ റജിമെന്റിന്റെ പരിശീലനകേന്ദ്രം ആരംഭിക്കാനും തയ്യാറാണെന്ന് കേന്ദ്ര ആഭ്യന്തരമന്ത്രി അമിത്ഷാ ഒരു റാലിയില് പ്രഖ്യാപിച്ചു. ഇടതന്മാര് ഭിന്നിപ്പിച്ച ദളിതരെ ദേശീയവികാരം കൊണ്ട് ഒന്നിപ്പിച്ചു വോട്ടു നേടുകയാണ് ബി.ജെ.പി.