സമവായം

താമരപ്പൂവിതള്‍ നിന്മിഴിപോലെ-
യെന്നാണോ കുറിച്ചുവയ്‌ക്കേണ്ടൂ
താരകളൊക്കെയും നിന്‍ ചിരിപോലെ-
യെന്നാണോ ധരിച്ചു വയ്‌ക്കേണ്ടൂ
മാരിവില്ലിന്മേല്‍ തെളിഞ്ഞതാം ജാലങ്ങള്‍
നീ കണ്ട സ്വപ്നങ്ങളെന്നോ!
ഈ മഴക്കാറിന്നഴിച്ചിട്ട വാര്‍മുടി
നീ കെട്ടി വച്ചതാണെന്നോ!
നീലിച്ച രാത്രിതന്‍ ചക്രവാളങ്ങള്‍ നീ
വാലിട്ടെഴുതിയതെന്നോ!
പുളയുന്ന മിന്നല്‍ക്കൊടി നര്‍ത്തനത്തി-
നാലുലയുന്ന സ്വര്‍ണ്ണച്ചിലമ്പോ?
അങ്ങനെയാണെങ്കില്‍ നിന്‍ വിമ്മിട്ടമാകണം
ഇന്നലത്തെ ഉരുള്‍പൊട്ടല്‍
അങ്ങനെയെങ്കില്‍ നിന്‍ നെടുവീര്‍പ്പുകള്‍
ഇന്നലത്തെ കൊടുംകാറ്റും
നൊന്തുനൊന്തേറെ കരഞ്ഞതാകാം
ഞങ്ങള്‍ മുങ്ങി മരിച്ച പ്രളയം!!