സാധുശീലന്റെ ഗ്രന്ഥങ്ങള്‍ മുതല്‍ക്കൂട്ട്

സ്വാമി പരമേശ്വരാനന്ദയെ (സാധുശീലന്‍ പരമേശ്വരന് പിള്ള) അനുസ്മരിച്ചുകൊണ്ടുള്ള കെ.രാമന്‍ പിള്ളയുടെ ലേഖനം (കേസരി, ജൂലായ് 24) സമയോചിതമായി.

ഒരൊറ്റ ജീവിതകാലത്ത് തന്നെ നാലാശ്രമത്തിലൂടെയും കടന്നു പോകാനുള്ള ഭാഗ്യം ചുരുക്കം ചിലര്‍ക്കേ സാധ്യമാവൂ. സാധുശീലന്‍ അക്കാര്യത്തില്‍ പൂര്‍വ്വ ജന്മപുണ്യം അനുഭവിച്ച ഭാഗ്യവാനാണ്. ബഹു ഭൂരിപക്ഷത്തിനും ബ്രഹ്മചര്യവും ഗാര്‍ഹസ്ഥ്യവും മാത്രമേ പറഞ്ഞി ട്ടുള്ളൂ. വാനപ്രസ്ഥവും സന്യാസവും പലരില്‍നിന്നും അകന്നു നില്‍ക്കുന്ന ആശ്രമസ്വപ്നങ്ങള്‍ മാത്രം. ഈ രണ്ടാശ്രമങ്ങളുടെ ഗുണപൗഷ്‌കല്യവും അനുഭവികാനുഭൂതിയും എത്ര എത്ര അകലെയാണ് സാധാരണക്കാരനെ സംബന്ധിച്ചിടത്തോളം. അതൊരു മരീചിക പോലെ അകന്നകന്നു പോകുന്ന മിഥ്യാ ഭ്രമങ്ങളോ?

സ്വാമിയുടെ ഉല്‍കൃഷ്ടമായ ഗ്രന്ഥങ്ങളെ കുറിച്ചും കൂടി ലേഖനത്തില്‍ പരാമര്‍ശിക്കാമായിരു ന്നു. അദ്ദേഹത്തിന്റെ എക്കാലത്തെയും മികച്ച ഒരു ഗ്രന്ഥമായി ജ്വലിച്ചു നില്‍ക്കുന്നു, ഹിന്ദു ധര്‍മ്മപരിചയം. ശ്രീരാമകൃഷ്ണ മഠം പുറത്തിറക്കിയ ആ അനശ്വര ഗ്രന്ഥം ഹിന്ദു ധര്‍മ്മ ഗ്രന്ഥങ്ങള്‍ക്കിടയിലൊരു മണിമുത്താണ്. സനാതന ധര്‍മ്മശാസ്ത്ര വിഷയങ്ങളെ സാംഗോപാംഗം സ്പര്‍ശിച്ചു പോകുന്ന ഹിന്ദു ധര്‍മ്മപരിചയം മലയാളത്തിനു ലഭിച്ച വര ദാനമാണെന്നതില്‍ സംശയമില്ല. ധര്‍മ്മരശ്മികളാണ് അദ്ദേഹത്തിന്റെ മറ്റൊരു ഈടുറ്റ ഗ്രന്ഥം. രണ്ടും ആദ്ധ്യാത്മിക സാഹിത്യ ശാഖയിലെ കനത്ത മുതല്‍ക്കൂട്ട് തന്നെ.

അദ്ദേഹത്തെ അനുസ്മരിച്ചു കൊണ്ടുള്ള ലേഖനം വല്ലാത്ത സന്തോഷം പകര്‍ന്നുതന്നു. ലേഖ കനും കേസരി വാരികയ്ക്കും നന്ദി.