ഹുസൈന്‍ മടവൂരിന് വൈകിവന്ന ബുദ്ധി

മുജാഹിദ് വിഭാഗത്തിലെ മതപണ്ഡിതനായ ഹുസൈന്‍ മടവൂര്‍ ഈ കര്‍ക്കിടകമാസത്തില്‍ രാമായണം വായിച്ചു എന്നാണ് തോന്നുന്നത്. രാമായണം വായിച്ചാല്‍ സദ്ബുദ്ധിയുണ്ടാകുമെന്ന് പഴമക്കാര്‍ പറയാറുണ്ടല്ലോ. ഹുസൈന്‍ മടവൂരിന് ഇയ്യിടെ സദ്ബുദ്ധി തോന്നിത്തുടങ്ങിയിരിക്കുന്നു. ബാബരി പള്ളി മുസ്ലിങ്ങള്‍ക്ക് മക്കാ, മദീന പള്ളികള്‍ പോലെ പ്രത്യേക പുണ്യമുള്ള പള്ളിയൊന്നുമല്ല, അറബിനാടുകളില്‍ റോഡ് വികസനത്തിനും മാര്‍ക്കറ്റുകള്‍ വലുതാക്കാനുമൊക്കെ എത്രയോ പള്ളികള്‍ പൊളിച്ചുമാറ്റിയിട്ടുണ്ട്, ബാബര്‍ ഒരു ചക്രവര്‍ത്തിയായിരുന്നു എന്നല്ലാതെ മുസ്ലീങ്ങള്‍ക്ക് ഒരു പുണ്യപുരുഷനൊന്നുമല്ല എന്നൊക്കെയാണ് അദ്ദേഹം മുസ്ലീം സമുദായത്തെ ഇയ്യിടെ ഉദ്‌ബോധിപ്പിച്ചത്. ഇതായിരുന്നില്ല, രാമായണമാസത്തിനു തൊട്ടുമുമ്പുവരെ ഹുസൈന്റെയും മുജാഹിദുകാരുടെയുമൊന്നും അഭിപ്രായം. ബാബരി പള്ളി അവിടെതന്നെ പണിയുമെന്നും ഒരിക്കല്‍ നിസ്‌കരിക്കല്‍ നടന്ന സ്ഥലം മുസ്ലീങ്ങള്‍ക്ക് പുണ്യസ്ഥലമാണെന്നും അതിനാല്‍ അതു വിട്ടുകൊടുക്കുന്ന പ്രശ്‌നമില്ല എന്നുമായിരുന്നു തറപ്പിച്ച നിലപാട്.

അയോദ്ധ്യാവിഷയത്തില്‍ സുല്ലിട്ട്അവസാനിപ്പിക്കാമെന്നാണ് ഹുസൈന്റെ നിലപാട്. കോടതിയുടെ അന്തിമവിധി അപ്പീലില്ലാത്ത വിധം വന്ന നിലയ്ക്ക് ക്ഷേത്രവും പള്ളിയും അതാതു സ്ഥലത്തു നിര്‍മ്മിക്കുന്നതിനെ അംഗീകരിക്കാനാണ് മുസ്ലിം മത നേതാക്കളോടുള്ള അദ്ദേഹത്തിന്റെ അഭ്യര്‍ത്ഥന. ഈ ബുദ്ധി കുറച്ചു മുമ്പേ വരേണ്ടതായിരുന്നില്ലേ? കമ്മ്യൂണിസ്റ്റു ചരിത്രകാരന്മാരും കോണ്‍ഗ്രസ് ഉള്‍പ്പെടെയുള്ള രാഷ്ട്രീയക്കാരും വിരിച്ച കെണിയില്‍ വീണു ഹിന്ദുക്കള്‍ക്കുനേരെ രാമക്ഷേത്രത്തിന്റെ പേരില്‍ കലാപത്തിനിറങ്ങുകയായിരുന്നു മുസ്ലീം മതനേതൃത്വം. ഇതിന്റെ കോട്ടമുണ്ടായത് മുസ്ലീം സമൂഹത്തിനായിരുന്നെങ്കില്‍ നേട്ടം ഇസ്ലാമിക തീവ്രവാദി വിഭാഗങ്ങള്‍ക്കായിരുന്നു. മുസ്ലീം ചെറുപ്പക്കാര്‍ തീവ്രവാദത്തിലേയ്ക്ക് ആകൃഷ്ടരായതോടെ ഹുസൈന്‍ ഉള്‍പ്പെടെയുള്ളവര്‍ക്കു പിന്നില്‍ ആളില്ലാതായി. വെള്ളം മുഴുവന്‍ ഒഴുകിപ്പോയ ശേഷം ഹുസൈന്‍ സാഹിബ് അണകെട്ടാന്‍ തുടങ്ങിയിരിക്കുകയാണ്. എന്നാലും രാമായണമാസത്തിലെങ്കിലും അദ്ദേഹത്തിന് സദ്ബുദ്ധി ഉണ്ടായല്ലോ. സാധാരണ മുസ്ലിങ്ങളുടെ ജീവിതവുമായി ഒരു ബന്ധവുമില്ലാത്ത ബാബരി പള്ളിയുടെ പേരില്‍ സമുദായ ഭിന്നത രൂക്ഷമാക്കാന്‍ ശ്രമിച്ചതിന്റെ കുറ്റബോധം കൂടി അദ്ദേഹത്തിന്റെ വാക്കുകളില്‍ കാണാം. ഹിന്ദുസമൂഹത്തോട് വിശ്വാസം പുലര്‍ത്തുകയും പരസ്പരം കൊടുക്കല്‍ വാങ്ങല്‍ നടത്തുകയും ചെയ്യുന്ന പഴയ കാലത്തിലേക്ക് തിരിച്ചുപോകാന്‍ ഹുസൈനെപോലുള്ളവരെ ചിന്തിപ്പിക്കുന്നതിനു പിന്നിലുള്ളത് സര്‍വ്വധര്‍മ്മ സമഭാവനയുടെ ഹൈന്ദവ പൈതൃകമാണ് എന്നും മറന്നു പോകരുത്.