വിദ്യാഭ്യാസ മേഖലയിലെ പരിഷ്‌കാരങ്ങള്‍ തീരുമാനിക്കേണ്ടത് മതസംഘടനകളല്ല: എബിവിപി

തിരുവനന്തപുരം: വിദ്യാഭ്യാസ മേഖലയിലെ പരിഷ്‌കാരങ്ങള്‍ തീരുമാനിക്കേണ്ടത് മതസംഘടനകളല്ലെന്നും മതസംഘടനകളുടെ അഭിപ്രായത്തിനനുസരച്ച് വിദ്യാഭ്യാസ മന്ത്രി യൂടേണ്‍ അടിക്കരുതെന്നും എബിവിപി സംസ്ഥാന സെക്രട്ടറി ഈ.യു.ഈശ്വരപ്രസാദ്.

ലഹരിക്കെതിരെയുള്ള ക്യാമ്പയിന്റെ ഭാഗമായി നടന്ന യോഗത്തില്‍ മുഖ്യമന്ത്രി സൂംബ ഡാന്‍സ് ആശയം ഉന്നയിച്ചപ്പോള്‍ വിദ്യാഭ്യാസ മേഖലയിലെ മുഴുവന്‍ സംഘടനകളും അംഗീകരിച്ചതാണ്. കേരളത്തില്‍ ഈ സര്‍ക്കാരിന്റെ സമയത്ത് പല വിഷയങ്ങളില്‍ ചില മത സംഘടനകള്‍ അഭിപ്രായം പറയുമ്പോള്‍ വോട്ട് ബാങ്കിന് വേണ്ടി സര്‍ക്കാര്‍ തീരുമാനങ്ങളില്‍ നിന്നും പിന്മാറുന്നത് കണ്ടിട്ടുണ്ട്. രാഷ്‌ട്രീയത്തിനപ്പുറം വിദ്യാഭ്യാസമേഖലയില്‍ കാലാനുസൃതമായ പരിഷ്‌കാരം നടത്തുവാന്‍ സര്‍ക്കാര്‍ തയ്യാറാകണം.

മതസംഘടനകള്‍ തങ്ങളുടെ ഇംഗിതം വിദ്യാഭ്യാസമേഖയില്‍ നടത്തുവാന്‍ ശ്രമിക്കരുത്. മതപാഠശാലയല്ല സ്‌കൂളുകള്‍ എന്ന് അത്തരക്കാര്‍ മനസ്സിലാക്കണം. നിലവില്‍ വിദ്യാഭ്യാസ വകുപ്പ് സൂംബ ഡാന്‍സ് വിദ്യാലയങ്ങളില്‍ നടപ്പിലാക്കുമെന്ന തീരുമാനത്തില്‍ ഉറച്ചുനില്‍ക്കുന്നത് സ്വാഗതം ചെയ്യുന്നുവെന്നും അദ്ദേഹം പറഞ്ഞു.