‘സമസ്ത’ കടംകൊണ്ട അടവുനയം

‘സമസ്ത’ ഇടത്തോട്ട് ചരിഞ്ഞ് ചരിഞ്ഞു വരുന്നത് കണ്ടിട്ട് അത്ഭുതപ്പെടേണ്ട. അത് ‘സമസ്ത’യുടെ അടവുനയമാണ്. കമ്യൂണിസ്റ്റുകാരില്‍ നിന്ന് ‘സമസ്ത’ കടംകൊണ്ട അടവുനയം. ഇത് തിരിച്ചറിയാന്‍ കഴിവില്ലാത്ത കോയമാര്‍ക്ക് ‘പുത്തി’ ഉദിക്കാന്‍ സമസ്ത കേരള സുന്നി യുവജന സംഘത്തിന്റെ തലനരച്ച നേതാവ് അബ്ദുല്‍ സമദ് പൂക്കോട്ടൂര്‍ ചില കാര്യങ്ങള്‍ ഓതിത്തരുന്നുണ്ട്. ദൈവഭയമുള്ള ഒരു മുസ്ലിമും കമ്മ്യൂണിസ്റ്റ് ആവില്ല എന്നതാണ് ആദ്യത്തെ ഓത്ത്. ചില സാഹചര്യം കൊണ്ട് ചിലര്‍ക്ക് കമ്മ്യൂണിസ്റ്റുകാരോട് സഹകരിക്കേണ്ടിവരും. അത് വേറെ വഴി ഇല്ലാത്തതുകൊണ്ടും ചില നേട്ടങ്ങള്‍ ഉണ്ടാക്കാനും ആണ്. അതില്‍ തെറ്റൊന്നുമില്ല. ഇടതു സര്‍ക്കാറുമായി ഉടക്കി നില്‍ക്കുന്നതിലും നല്ലത് സഹകരണത്തിലൂടെ കാര്യം നേടുന്നതാണ്. എന്നു കരുതി മുസ്ലിങ്ങള്‍ കമ്മ്യൂണിസ്റ്റായി എന്ന് തെറ്റിദ്ധരിക്കേണ്ട എന്ന് പൂക്കോട്ടൂര്‍ തീര്‍ത്തു പറയുന്നുമുണ്ട്. ‘സമസ്ത’യുടെ നേതാക്കളായ മുഹമ്മദ് ജിഫ്രിപൂക്കോയ തങ്ങള്‍ക്കും പൂക്കോട്ടൂരിനുമൊക്കെ ഈ അടവുനയം ഉപദേശിച്ചത് ആരാണ് എന്ന് അദ്ദേഹം പത്രക്കാരോട് പറഞ്ഞിട്ടില്ല. വഫഖ് വിഷയത്തില്‍ ‘സമസ്ത’യുടെ അടവുനയത്തെ ന്യായീകരിക്കാന്‍ ആദ്യം മുന്നോട്ടുവന്നത് ഐ.എന്‍.എല്ലും കെ.ടി. ജലീലും ഒക്കെയാണ്. മുമ്പ് കാന്തപുരം തങ്ങള്‍ ഇടത്തോട്ടു ചാഞ്ഞപ്പോള്‍ അരിവാള്‍ സുന്നി എന്ന് കളിയാക്കി വിളിച്ചവര്‍ ആണ് ‘സമസ്ത’ക്കാര്‍. അവര്‍ക്ക് ഇടത് ചായ്‌വിന്റെ ഗുണം മനസ്സിലാക്കി കൊടുക്കാന്‍ അനുഭവസ്ഥര്‍ തന്നെ വേണമല്ലോ.