എം.എല്.എ ആയില്ലെങ്കിലും കുഞ്ഞുമാണിയ്ക്ക് ക്യാബിനറ്റ് റാങ്കുവേണം. എം.എല്.എ ആയിരുന്നെങ്കില് ധനമന്ത്രിക്കസേര ഉറച്ചതായിരുന്നു. മാണി സി.കാപ്പന് അതു തട്ടിത്തെറിപ്പിച്ചു കളഞ്ഞു. രണ്ട് മന്ത്രിസ്ഥാനത്തിനു വിജയന് സഖാവും ബാലകൃഷ്ണന് സഖാവുമായി ഏ.കെ.ജി. സെന്ററില് നടത്തിയ മാരത്തോണ് ചര്ച്ചയില് ഒരു മന്ത്രി മതിയെന്ന തീരുമാനത്തിലെത്തുമ്പോഴുള്ള കരാര് കുഞ്ഞുമാണിയ്ക്ക് ക്യാബിനറ്റ് റാങ്ക് എന്നതാണെന്നു ചിലര് അടക്കം പറയുന്നുണ്ട്. എന്നാല് കുഞ്ഞുമാണിയ്ക്ക് ഏതു പദവി നല്കും? ബാലകൃഷ്ണപിള്ളയ്ക്ക് മുന്നാക്കകമ്മീഷന് അദ്ധ്യക്ഷസ്ഥാനം കൊടുത്തപോലെ ഒരു ക്രിസ്ത്യന് കമ്മീഷന് അദ്ധ്യക്ഷ പദവി കൊടുത്താലോ? അതു വല്ലാതെ ചെറുതായിപ്പോയോ എന്നൊരു സംശയം. എന്നാല് പിന്നെ ഒഴിഞ്ഞുകിടക്കുന്ന ഒരു കസേരയുണ്ട് വിജയന് സഖാവിന്റെ കസ്റ്റഡിയില്. ഉന്നതാധികാര കമ്മീഷന്. ആ കസേരയില് ആണിയടിച്ചിരുത്തിയാണ് വി.എസ്. അച്യുതാനന്ദനെ തളച്ചത്. 32 സേവകന്മാരെയും ഓഫീസും ക്യാബിനറ്റ് പദവിയും നല്കാമെന്നുപറഞ്ഞ് ഉന്നതാധികാര കമ്മീഷന് ഭരണപരമായ കാര്യങ്ങളില് ഉപദേശം നല്കാന് അധികാരം നല്കി. എന്നാല് ആദ്യം കമ്മീഷന് ഒരു മുറികിട്ടാന് അച്യുതാനന്ദന് ഒച്ച വെക്കേണ്ടി വന്നു. ഈ കമ്മീഷന് നല്കിയ ഒരു റിപ്പോര്ട്ടില് പോലും നടപടിയുണ്ടായില്ല. കോടികള് മുടക്കി കമ്മീഷനെ നിലനിര്ത്തിയതു വെറുതെ. ജനങ്ങളുടെ നികുതിപ്പണം മുടിക്കാനുള്ള മാര്ക്സിസ്റ്റു പാര്ട്ടിയുടെ പരിപാടി എന്നതില് കവിഞ്ഞ് ആ കമ്മീഷനെ കൊണ്ട് എന്തു ഗുണം? ശാപം പിടിച്ച ആ കമ്മീഷന്റെ അദ്ധ്യക്ഷനാകാനില്ലെന്ന് കുഞ്ഞിമാണി തുറന്നു പറഞ്ഞു കഴിഞ്ഞു. അതു ഒരു ഒതുക്കലായി വിലയിരുത്തപ്പെടും. പിന്നെയൊന്നുള്ളത് എം.പി.സ്ഥാനംപോയ സമ്പത്തിന് നല്കിയ ക്യാബിനറ്റ് റാങ്കാണ്. ദല്ഹിയില് കേരളത്തിനു വേണ്ടി പണിയെടുക്കുക എന്ന പേരിലുള്ള പദവി. അതു കിട്ടിയാല് കുഞ്ഞുമാണി പാലപോയ യക്ഷിയെപ്പോലെയാകും. പാര്ട്ടിയില് തനിക്കുള്ള ഗ്ലാമര് കുറഞ്ഞുപോകുമോ എന്ന സംശയം വേറെ.
കുഞ്ഞുമാണിയ്ക്ക് പറ്റിയ പദവി ഏതാണ്? വിജയന് സഖാവിനു മുകളിലാകരുത്; അതേസമയം മറ്റു എം.എല്.എമാരെക്കാള് ഉയരത്തിലായിരിക്കുകയുംവേണം. ക്രിസ്ത്യന് വോട്ടുകള്ക്ക് പ്രത്യുപകാരമാണ് ഈ പദവി എന്ന് പാതിരിമാര്ക്ക് ബോധ്യപ്പെടണം. മാണികോണ്ഗ്രസ് അദ്ധ്യക്ഷന് എന്ന നിലയ്ക്ക് മറ്റു നേതാക്കളില് നിന്നും എം.എല്.എമാരില് നിന്നും വളരെ ഉയരത്തിലാവുകയും വേണം. ഷെയ്ക്ക് അബ്ദുള്ള കാശ്മീരിന് ഒരു ‘രാഷ്ട്രപതി’യെ ഉണ്ടാക്കിയപോലെ വിജയന് സഖാവിന് കുഞ്ഞുമാണിയ്ക്കുവേണ്ടി പുതിയ പദവിയും ഓഫീസും സ്റ്റാഫുമൊക്കെ പടച്ചുണ്ടാക്കേണ്ട അവസ്ഥയാണ്.