കോഴിക്കോട്: ഭക്ത സൂര്ദാസ് ജയന്തി ദിനമായ മെയ് 17ന് സംഗീതോത്സവ കലാദിനമായി സക്ഷമ ഓണ്ലൈന് വഴി ആഘോഷിച്ചു. പ്രസിദ്ധ സിനിമ പിന്നണി ഗായകന് ജി. വേണുഗോപാല് ഗാനാര്ച്ചന നടത്തി പരിപാടി ഉദ്ഘാടനം നിര്വ്വഹിച്ചു. സക്ഷമ സംസ്ഥാന ഉപാദ്ധ്യക്ഷന് ആര്.രാമചന്ദ്രന് തയ്യാറാക്കിയ സൂര്ദാസിന്റ ജീവചരിത്രം ചിത്ര സഹിതം ശബ്ദ സന്ദേശമായി അവതരിപ്പിച്ചു. തുടര്ന്ന് പ്രമുഖ പിന്നണി ഗായിക കെ.എസ്.ചിത്ര ഗാനാര്ച്ചന നടത്തി സക്ഷമ നടത്തുന്ന പ്രവര്ത്തനങ്ങള്ക്ക് ആശംസകള് നേര്ന്നു.
8 മണിക്കൂര് നീണ്ട പരിപാടിയില് ദിവ്യാംഗ കലാകാരന്മാരെ പ്രോത്സാഹിപ്പിച്ച് കൊണ്ട് സംഗീത ലോകത്തെ സിനിമ പിന്നണി ഗായകരും മറ്റ് പ്രഗത്ഭരായ സംഗീതജ്ഞരും ഗാന സമര്പ്പണം നടത്തി ആശംസകളര്പ്പിച്ചു. വിദേശത്തും സ്വദേശത്തുമായി സംഗീതകച്ചേരി നടത്തുന്ന പ്രതിഭകളായ കുട്ടികളും പരിപാടിയില് പങ്കാളികളായി.
ഇടയ്ക്ക, വീണ, വയലിന്, കീബോര്ഡ് തുടങ്ങിയ സംഗീതോപകരണ കാലാകാരന്മാരും ഗാനാര്ച്ചന നടത്തി. ദിവ്യാംഗരും മറ്റ് സംഗീതജ്ഞരുമടക്കം 50 ഓളം കലാകാരാന്മാര് ആഘോഷത്തില് പങ്ക് ചേര്ന്നു. തുടര്ന്ന് വൈകുന്നേരം 7 മണിക്ക് ഗൂഗിള് മീറ്റ് വഴി ചേര്ന്ന സമാപന സഭയില് ബിജെപി സംസ്ഥാന ഉപാധ്യക്ഷന് സി.സദാനന്ദന് മാസ്റ്റര് ഭക്തകവി സൂര്ദാസ് അനുസ്മരണ പ്രഭാഷണം നടത്തി. ജില്ലാ ഉപാദ്ധ്യക്ഷയും ഓണ്ലൈന് പരിപാടിയുടെ മുഖ്യ സംയോജകയുമായ ഭുവനേശ്വരി രവീന്ദ്രന് പരിപാടി അവലോകനം ചെയ്തു. സക്ഷമ ജില്ലാ അദ്ധ്യക്ഷന് എ.വിനോദ് അദ്ധ്യക്ഷത വഹിച്ച ചടങ്ങില് ജില്ലാ സെക്രട്ടറി പി.പ്രകാശന് സ്വാഗതവും ജില്ലാ സമിതി അംഗവും ബധിര-മൂക-ദിവ്യാംഗയായ പ്രസീന ടീച്ചര് ആംഗ്യ ഭാഷയില് നന്ദിയും രേഖപ്പെടുത്തി. പ്രസീനയുടെ മാതാവും ജില്ലാ മഹിളാ പ്രമുഖുമായ പി.വി.പ്രേമകുമാരി ആംഗ്യഭാഷ പരിഭാഷപ്പെടുത്തുകയുണ്ടായി.