കെ.എന്‍.എ ഖാദറിനെതിരായ സമീപനം രാഷ്ട്രീയ കാപട്യം: ഭാരതീയവിചാരകേന്ദ്രം
തിരുവനന്തപുരം: അന്താരാഷ്ട്ര യോഗാ ദിനത്തില്‍ കേസരി വാരിക സംഘടിപ്പിച്ച സ്‌നേഹബോധി സാംസ്‌കാരിക സമ്മേളനത്തില്‍ കെ.എന്‍.എ ഖാദര്‍ പങ്കടുത്തതിനെ ചൊല്ലി വിവാദം സൃഷ്ടിക്കുന്നവര്‍ തങ്ങളുടെ രാഷ്ട്രീയ അസഹിഷ്ണുതയാണ് പ്രകടിപ്പിക്കുന്നതെന്ന് ഭാരതീയവിചാരകേന്ദ്രം. ഇത്തരം സങ്കുചിത സമീപനങ്ങള്‍ ഈ നാട് ഉയര്‍ത്തിപ്പിടിക്കുന്ന ജനാധിപത്യ ബോധത്തെ അപഹസിക്കുന്നതിന് തുല്യമാണ്. മുന്‍ എം.എല്‍.എയും അറിയപ്പെടുന്ന പൊതുപ്രവര്‍ത്തകനുമായ ഖാദര്‍ ഒരു സാം സ്‌കാരിക പരിപാടിയില്‍ പങ്കെടുക്കരുത് എന്ന് വാശിപിടിക്കുന്നവരോട് സഹതപിക്കാനേ നിര്‍വ്വാഹമുള്ളൂ. ആശയപരമായി വിയോജിക്കുമ്പോഴും വ്യക്തികളും പ്രസ്ഥാനങ്ങളും പരസ്പരം അംഗീകരിക്കുകയും പരസ്പര സംവാദത്തിന് അനുകൂലമായ സാഹചര്യം സൃഷ്ടിക്കേണ്ടതും ജനാധിപത്യപരമായ നമ്മുടെ മുന്നേറ്റത്തിന് അനിവാര്യമാണ്. അതിനനുകൂലമായ കാര്യങ്ങളെ അട്ടിമറിക്കാന്‍ ശ്രമിക്കുന്നവര്‍ തങ്ങളുടെ രാഷ്ട്രീയമായ കാപട്യത്തെയാണ് വിളംബരം ചെയ്യുന്നത്. സാമാന്യ ബോധമുള്ളവര്‍ ഇക്കാര്യം തിരിച്ചറിയുമെന്ന് ഭാരതീയവിചാരകേന്ദ്രം സംസ്ഥാനസമിതി പത്രപ്രസ്താവനയിലൂടെ അറിയിച്ചു. ആര്‍.സഞ്ജയന്‍ അധ്യക്ഷത വഹിച്ച യോഗത്തില്‍ കെ.സി. സുധീര്‍ബാബു, വി.മഹേഷ്, ഡോ.കെ.എന്‍. മധുസൂദനന്‍പിള്ള തുടങ്ങിയവര്‍ സംസാരിച്ചു.
Related Posts
Latest
