പാരിസ്ഥിതിക വ്യവസ്ഥ തകിടം മറിക്കും
കവനമന്ദിരം പങ്കജാക്ഷന്‍
പ്രൊഫ. കോടോത്ത് പ്രഭാകരന്‍ നായര്‍ എഴുതിയ ”സില്‍വര്‍ലൈന്‍ പദ്ധതി കേരളത്തിന് അനുയോജ്യമോ?” എന്ന ലേഖനം (കേസരി നവം. 05) സവിശേഷമായ ചില കാര്യങ്ങളിലേക്ക് നമ്മെ കൊണ്ടുപോകുന്നു. എങ്കിലും വളരെ പ്രത്യാഘാതങ്ങളുണ്ടാക്കുന്ന ഒരു പ്രശ്‌നം അദ്ദേഹം കാണാതെപോയോ? അത് വളരെയേറെ പാരിസ്ഥിതിക ആഘാതം സൃഷ്ടിക്കുന്ന പാറഖനനമാണ്. വിഴിഞ്ഞം തുറമുഖത്തി ന്റെ പണി വൈകുന്നതിനു കാരണമായി പറയുന്നത് പാറയുടെ ലഭ്യതക്കുറവാണ്. പ്രാദേശികമായി കെട്ടിപ്പടുക്കുന്ന ആയിരക്കണക്കി നു ചെറുതും വലുതുമായ കെട്ടിടങ്ങളുടെയും റോഡുകളുടെയും നിര്‍മ്മിതിക്കുവേണ്ടിത്തന്നെ സര്‍ക്കാര്‍ അനുമതിയോടുകൂടി 600 ലധികം പാറമടകള്‍ പ്രവര്‍ത്തിക്കുന്നു. അനധികൃതമായി അത് ആറായിരത്തിലധികമുണ്ടെന്നും പറയപ്പെടുന്നു. ക്വാറികള്‍ അനധികൃതവും അധികൃതവുമായി നിര്‍മ്മിച്ച് പാറഖനനം നടത്തിയിട്ടും കേരളത്തിന്റെ അത്യാവശ്യങ്ങള്‍ക്കുവേണ്ടി പാറ ലഭ്യമല്ലാതെവരുന്നു. ഇപ്പോള്‍ ത്തന്നെ ആയിരക്കണക്കിനു പാറമടകള്‍ നമ്മുടെ നാടിനെ നശിപ്പിച്ചുകൊണ്ടിരിക്കുന്നു. അത്രയും മലകള്‍തന്നെ ഇടിച്ചുനിരത്തപ്പെട്ടുവെന്നു വേണം കരുതാന്‍. അതിന്റെ ഫലമായി വെള്ളപ്പൊക്കങ്ങളും പ്രകൃതിദുരന്തങ്ങളും നിരന്തരം മനുഷ്യനെ കടന്നാക്രമിക്കുന്നു. പ്രകൃതിയുടെ സന്തുലിതാവസ്ഥ ആകെ താറുമാറായിരിക്കുന്നു. ഈ പരിതസ്ഥിതിയില്‍ വെള്ളപ്പൊക്കം പോലെയുള്ള അനേകം ദുരന്തങ്ങളുടെയിടയിലാണ് കേരളം സില്‍വര്‍ ലൈന്‍ നിര്‍മ്മിക്കാന്‍ പോകുന്നത്. കേരളം ആകെ മരണശയ്യില്‍ കിടക്കുമ്പോള്‍ സര്‍ക്കാരിന് ആഘോഷത്തിമര്‍പ്പ്.
ഈ റെയില്‍വേ ലൈനിന്റെ നിര്‍മ്മിതിക്ക് ലഭ്യമാക്കേണ്ട പാറയുടെ അളവ് വളരെ വലുതാണ്. ബാക്കിയുള്ള മലകളും പാറകളും ഇടിച്ചുനിരത്തിയാലും ലൈന്‍ തീരുമോ എന്നു സംശയമുണ്ട്. കേരളമാകെ ഒരു മുറംപോലെ പരന്ന ഭൂമിയായി മാറുന്ന ദുരവസ്ഥയുണ്ടാകും. പ്രത്യേകിച്ച് കേരളത്തിന്റെ ഒരറ്റം മുതല്‍ മറ്റേയറ്റംവരെ, വളരെ ചെറിയസമയംകൊണ്ട് ഒരു റെയില്‍വേയ്ക്കുവേണ്ടി ഇന്നത്തെ കേരളത്തിന്റെ പരിസ്ഥിതിക്ക് വേണ്ടതായ പാറ കണ്ടെത്താന്‍ എങ്ങനെ സാധിക്കുമെന്ന് നാം ചിന്തിക്കേണ്ടതുണ്ട്. കേരളം മുഴുവന്‍ പാറയും മലയും കുഴിച്ചു കുളം തോണ്ടിയാലും മതിയാകാതെ വരുന്ന ഈ ബൃഹത് പദ്ധതി കേരളത്തിന്റെ സകലവിധ സാമൂഹ്യപാരിസ്ഥികവ്യവസ്ഥകളെയും തകിടം മറിക്കും എന്നതില്‍ സംശയമില്ല. ഈ ഒരൊറ്റ പദ്ധതികൊണ്ട് ജനകോടികളുടെ ജീവിതം പടുകുഴിയിലാക്കുമെന്നതില്‍ സംശയമില്ല.
Latest
