കര്‍ക്കിടകമാസത്തിലെ ജ്വരാസുര സംഹാരം

രാമായണമാസമായ കര്‍ക്കിടകം ഒരേസമയത്ത് പുണ്യവും ദുരിതവും വിതയ്ക്കുന്ന മാസമാണ്. ശരീരത്തെയും മനസ്സിനെയും ആരോഗ്യപൂര്‍ണ്ണമായി നിലനിര്‍ത്താന്‍ രാമായണ പാരായണത്തിലൂടെയും പഠനത്തിലൂടെയും സാധിക്കും. കര്‍ക്കിടകമാസത്തില്‍ സാധാരണയായി കേരളീയനെ ഏറ്റവുമധികം ബാധിക്കുന്ന രോഗമാണ് പനിരാക്ഷന്‍ അഥവാ ജ്വരാസുരന്‍. ഇതിനെ മറികടക്കാന്‍ നമ്മുടെ ശാസ്ത്രവും പുരാണവും നിരവധി കാര്യങ്ങള്‍ നിര്‍ദ്ദേശിക്കുന്നുണ്ട്.

കര്‍ക്കിടക മാസത്തില്‍ അന്തരീക്ഷശുദ്ധി വരുത്താനായിട്ട് സാധാരണയായി നാം ഗണപതി ഹോമം ചെയ്യാറുണ്ട്. അഗ്നിഹോത്രധൂമങ്ങള്‍ വിഷരോഗാണുക്കളെ ഇല്ലാതാക്കുമെന്നതാണിതിന്റെ സവിശേഷത. കൊതുകിനെ തുരത്താനായിട്ടാണല്ലോ സന്ധ്യക്ക് വീട്ടുമുറ്റത്ത് നെരിപ്പോടു വെക്കുന്നത്.

കര്‍ക്കിടകമാസത്തിന്റെ ഭാഗമായി ജ്യേഷ്ഠഭഗവതിയെ വീട്ടില്‍ നിന്നു പുറത്താക്കി ശീവോതിമാരെ അകത്തിരുത്തുന്ന ചടങ്ങ് പണ്ടുകാലം മുതലേ നടത്തിവരുന്ന ആചാരമാണ്. മുറ്റം വൃത്തിയാക്കി ചാണകവെള്ളം തളിക്കുന്നത് പരിസരം രോഗാണു മുക്തമാക്കുവാന്‍ വേണ്ടിയാണ്.

കര്‍ക്കിടകമാസത്തിലാണ് സാധാരണയായി ആളുകള്‍ ഉഴിച്ചില്‍ നടത്തുന്നത്. ശരീരത്തെ പുഷ്ടിപ്പെടുത്താനുള്ള ‘വാര്‍ഷിക സര്‍വ്വീസിംഗ്’ ആണിത്. അതോടൊപ്പം തന്നെ വിവിധ മരുന്നുകളടങ്ങിയ ഔഷധക്കഞ്ഞി സേവയും ഈ കാലത്ത് നടത്താറുണ്ട്. രസായനസേവയാല്‍ മനുഷ്യന്‍ രോഗപ്രതിരോധ ശക്തി നേടിയെടുക്കാനും ഇക്കാലത്ത് ശ്രമിക്കാറുണ്ട്. അഷ്ടാംഗഹൃദയ പ്രോക്തമായ അപരാജിതധൂമം പുകച്ചു ജ്വരാസുരന്മാരെ സംഹരിക്കാനും കര്‍ക്കിടകമാസം സഹായകമാകുന്നു. കര്‍ക്കിടകമാസത്തില്‍ ശുദ്ധാഹാരം കൊണ്ട് ആരോഗ്യംസംരക്ഷിക്കുന്നു. ഇതിന്റെ ഭാഗമായിട്ടാണ് ‘പത്തില’ ഉപ്പേരി കഴിക്കുന്നത്. ഭൂമി, ആകാശം, അഗ്നി, വായു, ജലം എന്നീ പഞ്ചഭൂതങ്ങളെ മലിനമാകാതെ നോക്കേണ്ടതുണ്ട്, പ്രത്യേകിച്ച് കര്‍ക്കിടകമാസത്തില്‍.

കര്‍ക്കിടകമാസത്തില്‍ ശാരീരികമായ പുഷ്ടിയും പ്രതിരോധവും സൃഷ്ടിക്കുമ്പോള്‍ തന്നെ മാനസികാരോഗ്യവും വര്‍ദ്ധിപ്പിക്കേണ്ടതുണ്ട്. അതാണ് രാമായണ പാരായണത്തിലൂടെയും നാമജപത്തിലൂടെയും സാധ്യമാകുന്നത്. ജരാസന്ധനെപ്പോലെ ജ്വരാസുരനെ തകര്‍ക്കാന്‍ നേരിട്ടു സാധിക്കണം. അതിനുള്ളതാവണം കര്‍ക്കിടകമാസത്തിലെ രാമായണമാസാചരണം.