ന്യൂനപക്ഷ ആനുകൂല്യങ്ങള്‍ തുല്യതയോടെ നടപ്പാക്കണം: വി.മുരളീധരന്‍

തിരുവനന്തപുരം : ന്യൂനപക്ഷങ്ങള്‍ക്കുള്ള ആനുകൂല്യം എല്ലാ മത ന്യൂനപക്ഷങ്ങള്‍ക്കും തുല്യതയോടെ നടപ്പാക്കണമെന്ന് കേന്ദ്രമന്ത്രി വി. മുരളീധരന്‍ പറഞ്ഞു. ന്യൂനപക്ഷ ആനുകൂല്യം എന്ന പേരില്‍ ഒരു പ്രത്യേക മതവിഭാഗത്തിന് മാത്രം ആനുകൂല്യങ്ങള്‍ നല്‍കാനുള്ള ശ്രമമാണ് ഇടത് – വലത് സര്‍ക്കാരുകള്‍ നടത്തിയത്. ഒരു മതവിഭാഗത്തിന് മാത്രം ആനുകൂല്യങ്ങള്‍ തീറെഴുതി കൊടുക്കുന്നതിനോട് യോജിക്കാന്‍ കഴിയില്ല. ന്യൂനപക്ഷത്തില്‍ പെട്ട എല്ലാ മതവിഭാഗങ്ങള്‍ക്കും ആനുകൂല്യങ്ങള്‍ തുല്യമായി ലഭിക്കണം – അദ്ദേഹം പറഞ്ഞു.
ന്യൂനപക്ഷ ആനുകൂല്യത്തിന്റെയും ലക്ഷദ്വീപിന്റെയും പേരില്‍ ഇടത്-വലത് മുന്നണികള്‍ രാഷ്ട്രീയ മുതലെടുപ്പ് നടത്തുകയാണ്. ലക്ഷദ്വീപില്‍ കേന്ദ്രസര്‍ക്കാര്‍ നടത്തുന്ന വികസന പദ്ധതികളെക്കുറിച്ച് കളക്ടര്‍ വ്യക്തമാക്കിയിട്ടുള്ളതാണ്. എന്നിട്ടും ദുഷ്പ്രചരണവുമായി മുന്നോട്ടുപോകുന്നത് നിക്ഷിപ്ത താല്‍പ്പര്യത്തോടുകൂടിയാണ് – മുരളീധരന്‍ വ്യക്തമാക്കി.