കോഴിക്കോട്: 2021 മാര്ച്ച് 21 ലോക ഡൗണ് സിന്ഡ്രോം ദിനാചരണത്തോടനുബന്ധിച്ച് സക്ഷമ കോഴിക്കോട് ജില്ലാസമിതി ഈ രോഗാവസ്ഥയെ അതിജീവിച്ച് കലാരംഗത്ത് പ്രശസ്തയായി തീര്ന്ന കോഴിക്കോട് കോട്ടൂളിയിലെ പയ്യാക്കില് വിജയന്-ഗീത ദമ്പതികളുടെ മകള് കുമാരി. ധന്യാ വിജയനെ ഉപഹാരം നല്കി ആദരിച്ചു. 1986 ല് ജനിച്ച ധന്യ എസ്.എസ്.എല്. സി.വരെ പഠിച്ചത് സാധാരണ ഗവണ്മെന്റ് സ്കൂളില്. കലാമണ്ഡലം വിനോദിനി ടീച്ചറുടെ കീഴല് 12 വര്ഷം ഭരതനാട്യം പഠിച്ചു. 2016 ല് വേള്ഡ് ഡൗണ് സിന്ഡ്രേം കൗണ്സിലിലും 2019 ല് ബഹറിനിലും നൃത്തം അവതരിപ്പിച്ചു. 2017ല് തണല് സ്മൈല് സ്പെഷ്യല് സ്കൂളില് ലോകത്തെ ആദ്യത്തെ നൃത്ത അദ്ധ്യാപികയായി. ഡൗണ് സിന്ഡ്രോം അവസ്ഥയിലുള്ള നൃത്തം മാത്രമല്ല നല്ലൊരു നടി കൂടിയാണ് ധന്യ ടീച്ചര്. കലാദ്ധ്യാപകന് ദീപു തൃക്കോട്ടൂര് സംവിധാനം ചെയ്ത ‘ചിരിയിലേക്കുള്ള ദൂരം’, ‘കാലത്തിന്റെ താളില് ഒരു അമ്മയുടെ കൈയൊപ്പ്’ എന്നീ നാടകങ്ങളില് പ്രധാന കഥാപാത്രങ്ങളെ മനോഹരമായി അവതരിപ്പിച്ചു. കൂടാതെ ‘കുട്ടിക്കഥകളി’, ‘പച്ചത്തുള്ളന്’ എന്നീ നാടകങ്ങളിലും അഭിനയിച്ചു. സ്വദേശത്തും വിദേശത്തും നിരവധി വേദികളില് തന്റെ കലാവൈഭവം തെളിയിച്ച അനുഗ്രഹീത ദിവ്യാംഗ കലാകാരി ധന്യാ വിജയനെയും ഈ കലാകാരിയെ സ്നേഹം നല്കി വളര്ത്തിയ മാതാപിതാക്കളെയും ആദരിച്ചു. സക്ഷമ സംസ്ഥാന ഉപാദ്ധ്യക്ഷന് ആര്.രാമചന്ദ്രന്, ജില്ലാ ഉപാദ്ധ്യക്ഷ സി. എസ്. സത്യഭാമ, ജില്ലാ മഹിളാ പ്രമുഖ് പി.വി.പ്രേമകുമാരി, ജില്ലാ സെക്രട്ടറി പി.പ്രകാശന് എന്നിവര് ആദരിക്കല് ചടങ്ങില് സംബന്ധിച്ചു.