ദല്ഹി: കേരളത്തിന്റെ പ്രബുദ്ധതയുടെ പാരമ്പര്യം ഉപനിഷത്തിന്റേതാണെന്ന് രാഷ്ട്രീയ സ്വയംസേവക സംഘം (കേരളം) പ്രാന്തീയ സഹ സമ്പര്ക്ക പ്രമുഖ് കാ.ഭാ സുരേന്ദ്രന് പറഞ്ഞു. നവോദയം, ദല്ഹി സംഘടിപ്പിച്ച ‘പ്രബുദ്ധ കേരളം സ്വര്ഗീയ പി. പരമേശ്വരന്ജിയുടെ കാഴ്ചപ്പാടില്’ എന്ന വിഷയത്തില് നടത്തിയ വെബിനാറില് മുഖ്യ പ്രഭാഷണം നടത്തുകയായിരുന്നു അദ്ദേഹം. വേദകാല ഋഷി മുതല് വാല്മീകിയും വ്യാസനും ബുദ്ധനും ശങ്കരനും നാരായണഗുരുവും എല്ലാം അടങ്ങുന്ന ആര്ഷ പാരമ്പര്യമാണ് കേരളത്തെ എക്കാലവും പ്രബുദ്ധമാക്കിയത്. ആ പാരമ്പര്യത്തെ വീഴ്ച പറ്റാതെ മുമ്പോട്ടു കൊണ്ടുപോവുക എന്ന ദൗത്യമാണ് പി.പരമേശ്വര്ജി ഏറ്റെടുത്തത്.
അക്രമത്തിന്റെ രാഷ്ട്രീയവും കൊലപാതകത്തിന്റെ പ്രത്യയശാസ്ത്രവുമാണ് കമ്മ്യൂണിസ്റ്റു പാര്ട്ടി കേരളത്തില് അവതരിപ്പിച്ചത്. സംവാദാത്മക രാഷ്ട്രീയവും സമന്വയാത്മക ആത്മീയ ദര്ശനവും പരമേശ്വര്ജി അവതരിപ്പിച്ചു. ഈ സംവാദ രാഷ്ട്രീയത്തെയും സമന്വയ ദര്ശനത്തെയും തകര്ക്കാന് ശ്രമിക്കുകയായിരുന്നു നവോത്ഥാനത്തിന്റെ പേരില് കമ്മ്യൂണിസ്റ്റ് സര്ക്കാര് ചെയ്തതെന്നും സുരേന്ദ്രന് പറഞ്ഞു.
നവോദയം അധ്യക്ഷന് എം.പി. ബാലകൃഷ്ണന് ചടങ്ങില് അധ്യക്ഷത വഹിച്ചു, ജനറല് സെക്രട്ടറി എം.ആര്. വിജയന് വിഷയാവതരണം നടത്തി. നവോദയം രാമകൃഷ്ണപുരം യൂണിറ്റ് ചെയര്മാന് കെ.പി. ബാലചന്ദ്രന് സ്വാഗതവും, കേന്ദ്ര സമിതി അഡിഷണല് ജനറല് സെക്രട്ടറി ഇ.വി. രാമചന്ദ്രന് കൃതജ്ഞതയും പറഞ്ഞു.