വിദഗ്ധസമിതി രൂപീകരിക്കണം; ഗവര്‍ണര്‍ക്ക് നിവേദനം നല്‍കി

തിരുവനന്തപുരം: ദേശീയ വിദ്യാഭ്യാസ നയം നടപ്പാക്കുന്നതിന് സംസ്ഥാനത്ത് വിദഗ്ധസമിതി രൂപീകരിക്കണമെന്ന് ആവശ്യപ്പെട്ട് വിദ്യാഭ്യാസ വികാസ കേന്ദ്രത്തിന്റെ ആഭിമുഖ്യത്തില്‍ വിദ്യാഭ്യാസമേഖലയിലെ പ്രമുഖരുടെ പ്രതിനിധി സംഘം ഗവര്‍ണ്ണര്‍ക്ക് നിവേദനം നല്‍കി. സംഘത്തില്‍ കോഴിക്കോട് സര്‍വകലാശാല മുന്‍ വൈസ് ചാന്‍സലര്‍ ഡോ.എം.അബ്ദുല്‍ സലാം, പ്രമുഖ പരിസ്ഥിതി ശാസ്ത്രജ്ഞനായ ഡോ.എന്‍.സി. ഇന്ദുചൂഡന്‍, വിദ്യാഭ്യാസ സംരക്ഷണ സമിതി സംസ്ഥാന സംയോജകന്‍ ബി.കെ. പ്രിയേഷ് കുമാര്‍, കേരള ഗവേഷണ വേദി സംസ്ഥാന സംയോജകന്‍ ഡോ.ജിതിന്‍ രവീന്ദ്രന്‍, കേന്ദ്ര സര്‍ക്കാരിന്റെ ദേശീയ വിദ്യാഭ്യാസ മേല്‍നോട്ട സമിതി അംഗം എ. വിനോദ് എന്നിവരുടെ നേതൃത്വത്തില്‍ ആണ് രാജ്ഭവനില്‍ ഗവര്‍ണ്ണര്‍ക്ക് നിവേദനം സമര്‍പ്പിച്ചത്.

മുഖ്യമന്ത്രിയും വിദ്യാഭ്യാസമന്ത്രിയും ദേശീയ വിദ്യാഭ്യാസ നയം തള്ളിക്കളയണമെന്ന പ്രചരണത്തിന് നേതൃത്വം നല്‍കുന്നത് എന്തുകൊണ്ടാണെന്ന് മനസ്സിലാകുന്നില്ല. എല്ലാ സര്‍വകലാശാലകളിലും പ്രത്യേകം നിര്‍വ്വഹണ സമിതികള്‍ രൂപീകരിക്കുകയാണ് വേണ്ടത്. കേരളത്തിലെ ഓരോ സര്‍വ്വകലാശാലയും ഓരോ ജില്ല ദത്തെടുക്കുകയും സമഗ്ര വിദ്യാഭ്യാസ വികസനം നടപ്പാക്കുകയും വേണം. സര്‍വ്വകലാശാലയുടെ ഭരണപരവും സാമ്പത്തികവുമായ കാര്യങ്ങളുടെ മേല്‍നോട്ടം വഹിക്കുന്നതിനുവേണ്ടി ഗവര്‍ണറുടെ നേതൃത്വത്തില്‍ പരിചയസമ്പന്നരായ വിദ്യാഭ്യാസ വിദഗ്ധരുടെ പ്രത്യേക സമിതി രൂപീകരിക്കണമെന്നും സംഘം ഗവര്‍ണറോട് ആവശ്യപ്പെട്ടു.

കോഴിക്കോട് സര്‍വകലാശാലയിലെ വിവാദ പാഠപുസ്തകം പിന്‍വലിക്കാനും, ചട്ടങ്ങള്‍ ലംഘിച്ചു അധ്യാപക നിയമനം നടത്താനുള്ള നീക്കം തടയാനും ഗവര്‍ണര്‍ ഇടപെടണം എന്നും നിവേദനത്തില്‍ ആവശ്യപ്പെട്ടു.