കേസരി ചേര്‍ക്കുന്നത് തപസ്യയാക്കിയ അനന്തേട്ടന്‍

കണ്ണൂര്‍: വയസ്സ് 83 കഴിഞ്ഞെങ്കിലും കേസരി വാരിക ചേര്‍ക്കുക എന്നത് അനന്തേട്ടന് ഒരു തപസ്സാണ്. കേസരി പ്രചാരമാസം തുടങ്ങിയാല്‍ രാവിലെത്തന്നെ തോള്‍സഞ്ചിയുമായി ഇറങ്ങും. സുഹൃത്തുക്കളേയും ബന്ധുക്കളേയും പരിചയക്കാരേയുമെല്ലാം ഒരുമടിയും കൂടാതെ സമീപിക്കും. കേസരി വായിക്കേണ്ടതിന്റേയും പ്രചരിപ്പിക്കേണ്ടതിന്റെയും ആവശ്യകത പറഞ്ഞ് ബോധ്യപ്പെടുത്തും. കുറേപേര്‍ ചേരും.

എല്ലാ ആഴ്ചയിലും കേസരി വരാനായി കാത്തിരിക്കും. വന്നു കഴിഞ്ഞാല്‍ ഒരു വരിയൊഴിയാതെ വായിക്കും. തന്റെ കാഴ്ചപ്പാട് രൂപീകരിക്കും. അത് മറ്റുള്ളവരോട് ഒരു മടിയും കൂടാതെ പറയും. കേസരി പ്രചാരമാസത്തിന്റെ ആദ്യദിവസം തന്നെ 10 പേരെ വരിക്കാരാക്കി കഴിഞ്ഞു. എല്ലാദിവസവും മുടക്കം കൂടാതെ കേസരി പ്രചാരണത്തിനായി വീടുകള്‍ കയറി ഇറങ്ങും.

നേരത്തെ സിപിഎം പ്രവര്‍ത്തകനായിരുന്ന അനന്തേട്ടന്‍ 1986 വരെ ലോക്കല്‍ കമ്മറ്റി അംഗമായിരുന്നു. പിന്നീട് ദേശീയ ആദര്‍ശങ്ങളില്‍ ആകൃഷ്ടനായി സംഘപ്രസ്ഥാനങ്ങളുമായി അടുക്കുകയായിരുന്നു. തുടര്‍ന്ന് ആര്‍.എസ്.എസ്. കേളകം മണ്ഡല്‍ കാര്യവാഹ് ആയി. നിലവില്‍ മണ്ഡല്‍ പ്രൗഢപ്രമുഖാണ്. മികച്ച കര്‍ഷകന്‍ കൂടിയായ അനന്തേട്ടന്‍ അവിവാഹിതനാണ്. ഊര്‍ജ്ജസ്വലനായി കേസരി പ്രവര്‍ത്തനത്തിലേര്‍പ്പെട്ടിരിക്കുന്ന അനന്തേട്ടന്‍ എല്ലാ സ്വയംസേവകര്‍ക്കും പ്രേരണയാണ്.