കോഴിക്കോട്: ഒരാശയത്തേയും അതേപടി സ്വീകരിക്കാതെ ശുദ്ധമാക്കി സ്വീകരിക്കണമെന്ന് കവി പി.കെ. ഗോപി അഭിപ്രായപ്പെട്ടു. മനുഷ്യന് ഈ കാലത്ത് കൂടുതല് ആവശ്യം വകതിരിവാണ്. ഓരോന്നിനേയും പ്രത്യേകം പ്രത്യേകം വേര്തിരിച്ച് അറിയാനുള്ള കഴിവാണ് വകതിരിവ്. അക്ഷരങ്ങള് ചേര്ത്തുവച്ചാല് പോര. അതിന്റെ മഹത്വം തിരിച്ചറിയണം. അക്ഷരത്തിന്റെ പ്രകാശത്തിലൂടെ ലോകം ചരിത്രത്തെ തിരിച്ചറിയുന്നു. ഒടുവില് മനുഷ്യന് തന്നെത്തന്നെ തിരിച്ചറിയുന്നു. അക്ഷരം മഹാശക്തിയായി സ്വീകരിക്കുകയും തിരിച്ചറിയുകയും ചെയ്ത മുതിര്ന്ന തലമുറ കാഴ്ചവെച്ചതാണ് കേസരി – അദ്ദേഹം പറഞ്ഞു.
കേസരി മാധ്യമ പഠന ഗവേഷണകേന്ദ്രത്തിന്റെ കെട്ടിട ഉദ്ഘാടനത്തിനായി രൂപീകരിച്ച സ്വാഗതസംഘ യോഗത്തിന്റെ ഉദ്ഘാടന കര്മ്മം നിര്വ്വഹിച്ചു സംസാരിക്കുകയായിരുന്നു അദ്ദേഹം.
കേസരി ആരംഭിക്കാന് പോകുന്ന മാധ്യമ പഠന ഗവേഷണ കേന്ദ്രത്തിന്റെ ഉദ്ഘാടനത്തിനായി രൂപീകരിച്ച സ്വാഗതസംഘത്തിന്റെയും കേസരി പ്രചാരമാസ പ്രവര്ത്തനത്തിന്റെയും ഉദ്ഘാടനം മലാപ്പറമ്പ് വേദവ്യാസ വിദ്യാലയത്തില് വെച്ച് നടന്നു. കേസരി പ്രചാരമാസ പ്രവര്ത്തനത്തിന്റെ ഉദ്ഘാടനം ചലച്ചിത്ര സംവിധായകന് അലി അക്ബറിനേയും കെ.കൃഷ്ണന് കുട്ടിയേയും ആജീവനാന്ത വരിക്കാരായി ചേര്ത്തുകൊണ്ട് നിര്വ്വഹിച്ചു. കെട്ടിട നിര്മ്മാണ ഫണ്ടിലേക്ക് 1 ലക്ഷം രൂപ നല്കിക്കൊണ്ട് എ.കെ. ധര്മ്മരാജന് ഫണ്ട് ശേഖരണത്തിന്റെ ഉദ്ഘാടനം നിര്വ്വഹിച്ചു.
ചടങ്ങില് ഹിന്ദുസ്ഥാന് പ്രകാശന് ട്രസ്റ്റ് മാനേജിങ്ങ് ട്രസ്റ്റി അഡ്വ.പി.കെ. ശ്രീകുമാര് അധ്യക്ഷത വഹിച്ചു. ആര്.എസ്.എസ്. അഖിലഭാരതീയ കാര്യകാരി പ്രത്യേക ക്ഷണിതാവ് എസ്. സേതുമാധവന് മുഖ്യപ്രഭാഷണം നടത്തി. കേസരി ഗ്രന്ഥശാലയിലേക്കുള്ള പുസ്തകശേഖരണത്തിന്റെ ഉദ്ഘാടനം കുരുക്ഷേത്ര ബുക്സില് നിന്നും വേദ ബുക്സില് നിന്നും പുസ്തകങ്ങള് സ്വീകരിച്ചുകൊണ്ട് സി.എം. രാമചന്ദ്രന് നിര്വ്വഹിച്ചു. സാഹിത്യകാരന് പി.ആര്.നാഥന് ആശംസാ ഭാഷണം നടത്തി. സി.എം. രാമചന്ദ്രന് നന്ദിപ്രകാശനം നിര്വ്വഹിച്ചു. പി.ആര്.നാഥന് അധ്യക്ഷനും ഡോ.എന്.ആര്.മധു മുഖ്യസംയോജകനുമായി 101 അംഗ സ്വാഗതസംഘം രൂപീകരിച്ചു.