കാറകളികാണാന് കുരുക്കള് അനുവാദം കൊടുത്തു. അരയാല്ത്തറയില് കാത്തിരിപ്പുണ്ട്
അടിയോടി. അടിയോടിയോടൊപ്പം ആരോമുണ്ണി കാറകളി നടക്കുന്ന പറമ്പിലേക്കു ചെന്നു.
കാറകളിക്കുന്ന പിള്ളേര് രണ്ടു സംഘമായിത്തിരിഞ്ഞ് കളിതുടങ്ങി. കളി കണ്ടുകൊണ്ട് ആരോമുണ്ണിയും അടിയോടിയും കുറച്ചു മാറിനിന്നു.
കളിക്കിടയില് കാറാമണി ആരോമുണ്ണിയുടെ കാല്ക്കല് വന്നുവീണു. കാലുകൊണ്ട് ഇരടിയെടുത്ത് ആരോമുണ്ണി കാറാമണി കൈക്കലാക്കി. കാറാമണിയില്ലാതെ കളിക്കാന് പറ്റില്ലല്ലോ. പിള്ളേര് ആരോമുണ്ണിയുടെ അടുത്തുകൂടി.
”കാറാമണി തായോ ആരോമുണ്ണ്യേ”
തരില്ലെന്ന് ആരോമുണ്ണി.
”കാറാമണി തന്നില്ലെങ്കില്, കാറാവടികൊണ്ടു തല്ലും ഞങ്ങള്”
”എന്നാലതൊന്നു കാണട്ടേ” എന്നായി ആരോമുണ്ണി.
പിള്ളേര് കാറാവടികൊണ്ട് ആരോമുണ്ണിയെ തല്ലി. തല്ലിയതല്ലൊക്കെ അവന് തടുത്തു. ഒരുത്തന്റെ വടി ബലമായിപ്പിടിച്ചു വാങ്ങി ആരോമുണ്ണി പിള്ളേരെ കണക്കിനു പ്രഹരിച്ചു. തല്ലുകൊണ്ട് രണ്ടുനാലു പിള്ളേര് നിലത്തും വീണു.
അപ്പോള് കാറാപ്പിള്ളേര് ആരോമുണ്ണിയെ വെല്ലുവിളിച്ചു.
”ഞങ്ങളോടല്ലാ നിന്റെ ഊറ്റം കാണേണ്ടത്. നിന്റെ അമ്മാവനെ ചതിച്ചുകൊന്ന ചന്തൂനോട് പകരം ചോദിക്ക്. കാണട്ടെ നിന്റെ ഊറ്റം”
കാറാമണി താനേ ആരോമുണ്ണിയുടെ കയ്യില്നിന്ന് ഊര്ന്നുവീണു. പിന്നീടവിടെ നിന്നില്ല. വേഗം ആറ്റുമ്മണമ്മേലേക്കു മടങ്ങി. തെക്കിനിയിലെ മുറിപ്പടിയില് കമിഴ്ന്നു കിടന്നു കരയാന് തുടങ്ങി.
അതു കാണ്കേ ഉണ്ണിയാര്ച്ച മകന്റെ അരികേ വന്നു.
”എന്തുപറ്റീ എന്റെ ഉണ്ണിക്ക്? കെട്ടിയ കച്ചയഴിച്ചിട്ടില്ല. കുളികഴിച്ച് മെഴുക്കിളക്കിയിട്ടില്ല. നിന്നെ ആരെങ്കിലും കൈയേറ്റം ചെയ്തോ? തൊടരുതാത്ത കുളം തൊട്ടോ? പിടിയരുതാത്ത കൈപിടിച്ചോ? കൊമ്പില്ലാത്ത മോഴ കുത്തിയോ മകനേ. പല്ലില്ലാത്ത പട്ടി കടിച്ചോ നിന്നെ.? എന്തുണ്ടെങ്കിലും അമ്മയോടു
പറയ്. ആളുകൊണ്ടോ അര്ത്ഥംകൊണ്ടോ അമ്മയുണ്ടല്ലോ നിണക്കു തുണയായിട്ട്. എഴുന്നേല്ക്ക്. വേഗം കുളിച്ചുവായോ. അമ്മ ഊണു വിളമ്പിത്തരാം”
”ആവകയൊന്നുമല്ലമ്മേ. മാനിഭക്കേടു വളരെക്കേട്ടു. ഈവക കേട്ട് ഞാന് ജീവനോടെ ഇരിക്കില്ല”
”ആരാണ് എന്റെ മകനെ മാനം കെടുത്തിയത്. എന്തേ ഉണ്ടായത് ?”
കാറാകളി കാണാന് അടിയോടിയോടൊപ്പം പോയതും കാറാപ്പിള്ളേരോട് കൊമ്പുകോര്ത്തതും പിള്ളേര് കാറാവടിയെടുത്തു തല്ലാനായിക്കൊണ്ടു വന്നതും തല്ലിയതൊക്കെ തടുത്ത് രണ്ടുനാലു പിള്ളേരെ തല്ലിവീഴ്ത്തിയതും എല്ലാം പറഞ്ഞൂ അമ്മയോട്.
”ഞങ്ങളോടല്ലാ ഊറ്റം വേണ്ടത്. നിന്റെ അമ്മാവനെ ചതിച്ചുകൊന്ന ചന്തൂനോടു കാണിക്ക് നിന്റെ ഊറ്റം” എന്ന് കാറാപ്പിള്ളേര് എന്റെ മുഖത്തുനോക്കിപ്പറഞ്ഞമ്മേ. എവിടെയാണമ്മേ എന്റെ അമ്മാവന്? അമ്മാവന് മരിച്ചതാണെങ്കില്, ആരാണമ്മേ അമ്മാവനെ കൊന്നത് ? ”
”നിണക്ക് നേരമ്മാവന് ഒരേ ഒരാളല്ലേ ഉണ്ണീ. അമ്മാവന് പതുശ്ശേരിക്കളരിയില് പയറ്റു പഠിപ്പിക്കുകയാണല്ലോ”
ആരോമുണ്ണിക്കു വിശ്വാസം വന്നില്ല.
”കള്ളമൊഴി പറയേണ്ടമ്മേ. അമ്മ സത്യം പറയുന്നില്ലെങ്കില്, കേമന്ചുരികയ്ക്ക് ഇരയാവും ഞാന്”
അതുംപറഞ്ഞ് ആരോമുണ്ണി മുറിപ്പടിയില് നിന്നെഴുന്നേറ്റു. ഉണ്ണിയാര്ച്ച ഭയപ്പെട്ട് മകനെത്തടുത്തു.
പടിയില് പിടിച്ചിരുത്തി. അരികത്തു താനും ഇരുന്നു. പഴയ കഥകളൊന്നും ഇനിയും മകനോട് ഒളിപ്പിച്ചുവെയ്ക്കേണ്ടതില്ലെന്ന് ഉള്ളിലുറപ്പിച്ചു. ഇവന് വയസ്സ് ഇരുപതായി. ഒത്തൊരു പുരുഷനായിരിക്കുന്നു.
നേരാങ്ങളയായ ആരോമര്ച്ചേകവരുടെ കഥ കണ്ണീരോടെ ആര്ച്ച മകനെ കേള്പ്പിച്ചു.
(തുടരും)